fbpx

AFMÆLISHELGIN MÍN

PERSÓNULEGT

Hamingjukast á sunnudagskvöldi eftir dásamlega afmælishelgi, en í gær varð ég 28 ára. Ég vaknaði við afmælissöng og pönnukökulykt og átti fullkomna morgunstund með Arnóri og Aþenu Röfn. Eftir hádegi fékk ég svo yndislegar vinkonur í afmæliskaffi og er búin að hugsa það alla helgina hversu heppin ég er að eiga svona nánar vinkonur búsettar í nærumhverfinu mínu, allar í Köben nema ein sem býr í næstu götu við mig (!) hérna í Malmö. Rúsínan í pylsuendanum var svo þegar bankað var á dyrnar hjá mér og fyrir utan stóð Denise besta vinkona mín sem býr í Hong Kong. Hún kom mér svo mikið á óvart að ég æpti og skríkti af hamingju. Stelpurnar sátu hjá mér fram yfir kvöldmatarleyti og fylltu heldur betur á gleðibankann hjá afmælisbarninu. Á meðan spilaði Arnór leik í bikarnum sem þeir rúlluðu upp og um kvöldið áttum við svo pizzu og rauðvínsdeit hérna heima eftir að Aþena Röfn sofnaði, jafn glöð og ég með gestagang dagsins. Frábær afmælisdagur og gjörólíkur þeim sem ég átti fyrir ári síðan, gengin 41 viku.Ég fékk nokkrar spurningar út í kjólinn en hann er frá Acne Studios

Sjáiði hvað ég fékk fína afmælisgjöf!! Ég æfði á píanó í mörg mörg ár þegar ég var yngri og langar svo stundum að geta gleymt mér um stund við að rifja upp og læra ný lög. Hljómborð er fullkomið þangað til við kaupum okkur píanó á framtíðarheimilið.

Fyrir kaffihúsadeit dagsins með Malmö vinkonunum sem gáfu mér þennan guðdómlega blómvönd. Næst á dagskrá er svo EINS ÁRS afmæli grallarans míns eftir aðeins fjóra daga. Ég skil núna hvað fólk meinar þegar það vill hægja aðeins á tímanum!

Andrea Röfn

Fylgið mér á instagram @andrearofn

BARNAHERBERGIÐ

AÞENA RÖFN

Þessa dagana er ég með hugann við herbergið hennar Aþenu Rafnar. Til að byrja með fannst mér ekki nauðsynlegt að útbúa barnaherbergi fyrir hana og þar sem við fáum gesti reglulega ákváðum við að halda gestaherberginu óbreyttu í bili. Núna er hún hins vegar að verða eins árs og við erum farin að huga að breytingum heima, þannig að stofan verði ekki lengur undirlögð af dótinu hennar heldur sé það allt á sama stað í hennar herbergi. Gestaherbergið verður að herberginu hennar og í stað gestarúmsins kemur svefnsófi sem mun nýtast þegar við fáum heimsóknir.

Innblástur héðan og þaðan – það er sko ekki amalegt að hafa eina Svönu hérna á Trendnet sem er dugleg að blogga um falleg barnaherbergi. Sæhesturinn frá Ferm Living er efstur á lista enda allt of sætur bæði á vegg og á gólfi. Svo elska ég regnbogann frá Petit.is sem við fengum í gjöf á dögunum. Annars langar mig ekki að fylla herbergið af dóti og kaupa of mikið þar sem við búum ekki á framtíðarheimilinu okkar núna og gætum flutt í allt öðruvísi húsnæði áður en við vitum af. Aþena Röfn hefur líka fengið gjafir síðasta árið sem munu loksins fá sinn stað á heimilinu.

Andrea Röfn

Fylgið mér á instagram @andrearofn

ÞRENNT Á ÞRIÐJUDEGI

ÓSKALISTINN

Þrennt fínt á þriðjudegi.. Peysa: & Other Stories – þessi litur æpir á mig. Buxur: Cypress frá Eytys – Húrra Reykjavík. Ég á þessar buxur í gallabuxnaefni og þær passa loksins eftir meðgönguna – sniðið er tryllt og ég fíla þessa áferð í botn. Buxurnar eru á útsölu núna, ég mæli með. Skór: Balenciaga – ég hef verið veik fyrir reimuðum boots síðan ég eignaðist mitt fyrsta par í grunnskóla. Þessir líta virkilega vel út og eru bæði veglegir og gæjalegir.

Andrea Röfn

Fylgið mér á instagram: @andrearofn

MOTHERHOOD – HULDA SIF

AÞENA RÖFNPERSÓNULEGT

Við mæðgurnar fengum svo skemmtilega heimsókn frá Köben í nóvember frá Huldu Sif ljósmyndara. Hulda hefur síðustu ár birt myndir úr seríunni sinni Motherhood sem hún lýsir á eftirfarandi máta:

Mæður og móðurhlutverkið hafa löngum verið viðfangsefni listamanna og menningaráhugasinna, þó að hugmyndin um hina heilögu móður hafi breyst eru mæður oft kynntar sem fulltrúar staðalímynda. Móðir, dýrlingur, madonnan; sú sem ber ábyrgðina á barninu og heimilinu. Ég beini sjónum að mæðrum, stöðu þeirra í vestrænu samfélagi og hlutverki mæðra. Móðirin sem aldrei fær neina hvíld, spennan sem myndast þegar við erum að vernda börnin okkar; kenna þeim, líta eftir þeim og hlúa að. Barnið verður einhverskonar viðhengi, við erum föst í hlutverkum okkar sem mæður hvort sem okkur líkar það betur eða verr. Hlutverkið er dásamlegt og það allra mikilvægasta en á sama tíma þvingandi. Með röð portretta reyni ég að fanga ákveðið augnablik og spennu sem lýsir alhliða tilfinningu móðurhlutverksins.
Ég held að flestar mæður tengi við þessa túlkun á móðurhlutverkinu – að minnsta kosti finnst mér hún spot on. Það einhvern veginn breytist allt, áherslurnar, ákvarðanirnar, hversdagsleikinn. Þið þurfið nú ekki að leita lengra en í færslurnar mínar og instagram myndir síðasta árið til að sjá að lífið hefur meira og minna snúist um þetta nýja hlutverk í tæpt ár! Móðurhlutverkið er dásamlegt, mikilvægt, krefjandi og allt þess á milli.
Fleiri myndir úr seríunni er að finna á huldasif.com
x
Andrea Röfn
Fylgið mér á instagram: @andrearofn

LÍFIÐ

ANDREA RÖFNAÞENA RÖFNPERSÓNULEGT

Janúar er að klárast en hingað er ég mætt í fyrsta bloggi ársins að óska ykkur gleðilegs árs. Hingað til hef ég ekkert haft á móti þessum fyrsta mánuði ársins, bróðir minn og bestu vinkonur fagna afmæli í janúar, það er alltaf nóg að gera og tilhlökkun fyrir nýju ári ræður ríkjum hjá mér. Þessi mánuður hefur hins vegar verið eitt stórt bíó hingað til með ferðalaga-örðugleikum, týndum ferðatöskum, veikindum hjá Aþenu Röfn og smá óhappi sem endaði með heimsókn á slysó. Ég er ekki vön því að blogga um eitthvað svona „neikvætt“ en  er ekki bara best að sýna raunveruleikann eins og hann er? Annars vil ég meina að það sé ágætt að byrja árið á skelli því þá hlýtur leiðin að liggja upp á við! Haha. Við fjölskyldan erum að minnsta kosti komin heim til Malmö, en við mæðgurnar höfðum verið að heiman síðan 30. nóvember. Sex vikur fullar af samveru með fólkinu okkar að baki, við fögnuðum fyrstu jólum Aþenu Rafnar í faðmi fjölskyldunnar í Florida og milli jóla og nýárs kom tengdafjölskyldan út og slóst með í fjörið. Hugurinn og hjartað eru full af þakklæti og yndislegum minningum.

Nokkrar myndir frá síðustu vikum –

Fyrst á dagskrá á Íslandi var að sjá stjörnur Þjóðleikhússins eiga stórleik í Atómstöðinni. Ebba Katrín og Hildur Vala fengu okkur Katrínu til að tárast úr stolti í salnum. Enn bættist á vinkonustoltið í vikunni eftir þegar Indíana Nanna gaf út bókina sína Fjarþjálfun. Ég hlakka svo til að fylgja æfingum og uppskriftum úr bókinni – fyrst á dagskrá verður 4 vikna hlaupaplanið hennar, mig langar svo að verða betri í að hlaupa.

Sumarbústaður, kaffihúsadeit og jólagjafainnkaup voru aðallega á dagskrá. Ég nýtti einnig tímann í að selja í Extraloppunni og mæli heilshugar með því fyrir þá sem vilja losa sig við gamlar flíkur og gefa þeim nýtt líf. Algeng spurning sem ég fæ á Instagram eru út í yfirhafnir okkar mæðgnanna. Úlpan mín er Askja frá 66°Norður og gallann hennar Aþenu Rafnar fengum við frá Petit.is

Fjölskyldan í Florida – golf, gott veður (oftast!) en fyrst og fremst samvera með fjölskyldunni.
Jólakjóllinn minn er frá Acne Studios – þessi hér. Áramótakjóllinn er frá & Other Stories og skórnir líka.

Hversdagsleikinn tekinn við og ég er líka að elska það. Við skelltum okkur á landsleik Íslands á EM hérna í Malmö og erum strax búin að fá yndislega heimsókn frá góðum vinum. Mamma er svo hjá okkur í þessum skrifuðu orðum en fluginu hennar í dag var aflýst. Við grátum það ekki enda einum of notalegt að hafa hana hjá okkur.

Þangað til næst og gleðilegt ár

Andrea Röfn

Fylgið mér á instagram: @andrearofn

MÓÐURMÁL

ANDREA RÖFNAÞENA RÖFNMEÐGANGAN

Á dögunum birtist viðtal við mig í Lífinu á Vísi.is. Viðtalið var í flokknum Móðurmál og líkt og nafnið gefur til kynna var móðurhlutverkið í aðalhlutverki. Ég naut þess að svara þessum spurningum og leiða hugann aftur að síðastliðnum mánuðum, breytingunum sem hafa átt sér stað og öllu því sem ég hef lært. Móðurhlutverkið er magnað og lífið hefur svo sannarlega tekið stakkaskiptum á allan máta. Ég var spurð að því hvort mér þætti ég sjálf hafa breyst við það að verða mamma og svarið mitt var: „Ég held að það hafi einfaldlega dregið fram í mér mínar bestu hliðar og ég geri mér betur grein fyrir því hvaða manneskju ég hef að geyma. Mér finnst ég hafa áttað mig betur á því hvað skiptir mig mestu máli í lífinu, og í hvað ég tími orku minni og athygli.“  Mér finnst þetta svar ná ágætlega yfir þessar helstu breytingar sem ég hef fundið fyrir á sjálfri mér, enda miklu minni tími til að velta sér upp úr óþarfa hlutum nú þegar orkan mann beinist að annarri manneskju meirihluta dagsins.

Í viðtalinu fer ég yfir það hvernig við komumst að óléttunni, hvað fótboltinn stjórnar miklu og hvernig okkur gekk að velja nafn, svo fáeitt sé nefnt. Þá nefndi ég einnig að „Mér finnst alltof mikið talað um meðgöngu og fæðingar, miðað við það sem koma skal að lokinni fæðingu. Brjóstagjöf er klárlega umræðuefni sem á skilið meira pláss. Mér finnst umræðan snúast rosalega mikið um það hvað brjóstagjöfin sé falleg og yndisleg, en það gleymist að nefna erfiðleikana, hvað hún tekur á í upphafi og mögulega fylgikvilla eins og sýkingar og stíflur. Þá finnst mér einnig gleymast að tala um að hún hentar ekki öllum og að það sé líka bara allt í lagi.“

Þið sem fylgið mér á samfélagsmiðlum hafið kannski tekið eftir því hvað fótboltinn spilar stóran sess í lífi okkar.  „Það gengur mjög vel en er krefjandi fyrir okkur bæði. Fótboltinn er mjög óhefðbundin vinna, honum fylgir mikil pressa um að vera í standi andlega sem líkamlega, standa sig vel í einum til tveimur leikjum í viku og vera á sífelldu ferðalagi. Honum fylgir ekkert fæðingarorlof og það er nánast aldrei frí um helgar. Helsti kosturinn er klárlega sá að hann klárar æfingar um eitt eða tvö og á þá restina af deginum til að eyða með okkur. Þann tíma nýtum við vel enda mjög dýrmætur. Þetta fótboltalíf er alls ekki sá glamúr sem margir halda að það sé, og það tekur á okkur bæði á mismunandi máta. Við mæðgurnar erum meira og minna límdar saman en fyrir Arnór fylgir þessu mikill söknuður á köflum. Sem betur fer er fótboltinn líka skemmtilegur og gefandi, sérstaklega þegar það gengur vel hjá liðinu eins og núna.“ 

Mín uppáhalds spurning var: Eru einhver skilaboð eða ráðleggingar sem þú vilt koma til verðandi mæðra? 
„Að fylgja eigin innsæi í einu og öllu og hugsa fyrst og fremst um þarfir sínar og barnsins. Mér finnst líka mikilvægt að vera aldrei í samanburði við aðrar mæður og börn, það tekur allt sinn aðlögunartíma og hann er ekki sá sami hjá öllum – börn eru öll sitthvor einstaklingurinn og þau passa ekki öll inn í einn kassa. Það þurfa allir að fá að finna sína rútínu í mismunandi aðstæðum og þó að barnið þitt sofi eða borði öðruvísi en það næsta, eða er lengur að fá tennur eða byrja að skríða, þá er það alveg eðlilegt. Ég fagna hverju stigi hjá Aþenu Röfn en hún fær að finna sinn takt upp á eigin spýtur og ég hef aldrei staðið sjálfa mig að því að bíða eftir næsta stigi í hennar þroska. Það er miklu skemmtilegra að njóta hvers tímabils fyrir sig því tíminn líður svo hratt.“ 

Mér finnst þetta það mikilvægasta sem ég hef lært síðustu 9 mánuðina. Það kom mér á óvart hversu miklar skoðanir fólk hefur á foreldrahlutverkinu og hvað mörgum finnst börn eiga að passa inn í sama box. Það tók mig þó nokkurn tíma að átta mig á því að það er allt í góðu þó að Aþena Röfn sofi ekki jafn langa lúra og önnur börn, sé með aðra rútínu og sofni út frá brjóstinu, sem dæmi. Þetta með rútínuna fannst mér erfiðast en eins og gefur að skilja er ekkert sjálfsagt að halda henni góðri þegar við erum á stöðugu flakki og ekki alltaf í sama umhverfinu. Um leið og ég áttaði mig á því að það eru ekki öll börn eins og hver og einn þarf að finna sinn takt, fann ég fyrir miklum létti og gat hætt að afsaka mig í tíma og ótíma fyrir að gera ekki allt nákvæmlega „eftir bókinni“.

Viðtalið í heild sinni má lesa hér

x

Andrea Röfn

instagram: @andrearofn

JÓLAGJAFAHANDBÓK 66°NORÐUR

SAMSTARF

Við fjölskyldan erum hluti af jólagjafahandbók 66°Norður þar sem við förum yfir okkar uppáhalds flíkur ásamt því að svara ýmsum spurningum um jólahátíðina. Við Arnór höfum bæði klæðst 66°Norður síðan við munum eftir okkur og verið í samstarfi við merkið síðustu ár. Svo er Aþena Röfn nú þegar orðin dyggur notandi ungbarnavaranna. Helgi Ómars tók myndirnar.

Hvað er það besta við jólin? „Númer eitt, tvö og þrjú er það samvera með fjölskyldunni. Við búum erlendis og fjarri okkar nánustu og því njótum við þess í botn þegar allir eru samankomnir yfir hátíðarnar. Golf og sól fylgir þar fast á eftir, en jólin eru okkar eina frí allt árið og því kærkomið að eyða því í rólegheitum og allt öðru umhverfi en heima hjá okkur.“

Er einhver jólahefð órjúfanlegur partur af jólunum ykkar? „Fyrir jól förum við á Hamborgarabúllu Tómasar sem er alltaf klædd í skemmtilegan jólabúning og fáum okkur tilboð aldarinnar. Við verðum erlendis um hátíðarnar og spilum því golf á aðfangadag, og reyndar flesta aðra daga um jólin.“

Hvaða flík frá 66°Norður notið þið mest?„Við notum úlpurnar mest og deilum nokkrum þeirra enda henta mörg snið bæði körlum og konum. Svanur kerrupoki er alltaf í notkun þar sem við förum mikið út að labba með Aþenu Röfn dóttur okkar, og hún er í langflestum tilvikum klædd í Spóa merinósamfestinginn og lambúshettuna. Nú er farið að kólna þannig að Bylur peysan hefur verið tekin fram hjá okkur báðum og Laki buxurnar fara að koma sterkar inn hjá Andreu. Arnór er kuldaskræfan á heimilinu og er stundum gert grín að því þegar hann mætir í úlpu í vinnuna í 10 stiga hita. Tindur er fullkomin úlpa í hans tilfelli þar sem hún er bæði mjög létt og hlý.“

Hafið þið eytt jólunum á einhverjum framandi stað?„Andrea er vön því að vera erlendis um jólin og hefur til dæmis eytt þeim í Cape Town, Suður Afríku og Orlando, Flórída. Arnór braut hefðina í fyrsta skiptið síðustu jól og prófaði jól í Flórída. Nú verður ekki aftur snúið hjá honum og jólin verða haldin á sama stað í ár.“

Viðtalið er að finna HÉR og ásamt fleiri vörum í uppáhaldi frá 66°Norður. Á listanum er fullt af sniðugum jólagjafahugmyndum  fyrir alla fjölskylduna <3

x

Andrea Röfn

instagram: @andrearofn

FRÍ ♡

AÞENA RÖFNPERSÓNULEGTTRAVEL

Ég er ennþá í algjörri paradísarvímu eftir að við Aþena Röfn, ásamt Hjördísi vinkonu og stráknum hennar, skelltum okkur í vikuheimsókn til Pöttru okkar. Þið kannist eflaust mörg við Pöttru héðan af Trendnet, en hún býr núna í Izmir, Tyrklandi, ásamt Elmari manninum sínum og Atlasi Aroni stráknum þeirra. Hluta vikunnar eyddum við svo á hóteli tveimur tímum frá Izmir, eins og hefur örugglega ekki farið framhjá neinum sem fylgir mér á instagram! Hótel„herbergið“ var stórkostlegt hús með sjávarútsýni og infinity sundlaug – en til að komast á veitingastaðinn eða ströndina voru golfbílar sem sóttu okkur og skutluðu milli staða. Umhverfið var hreinlega draumi líkast og þetta er staður sem mig langar svo sannarlega að heimsækja aftur.

Aþena Röfn naut sín í sinni fyrstu strandarferð. Þessi fallegi sundbolur er frá Petit.is ♡

Þetta litla frí var yndislegt og félagsskapurinn upp á 10. Við mæðgurnar erum núna komnar heim til Malmö með þakklæti og dýrmætar minningar í farteskinu. Arnór er kominn heim úr síðasta landsliðsverkefni ársins og á bara tvo leiki eftir af þessu svakalega fótboltaári. Svo ætlum við öll saman í langþráð fjölskyldufrí – eftir smá aðventu og nóg af heitu súkkulaði á Íslandinu góða.

x

Andrea Röfn

Fylgið mér á instagram:@andrearofn

GJAFALEIKUR – HILDUR YEOMAN

INSTAGRAMMEÐGANGANOUTFIT

Undur og stórmerki eru að eiga sér stað hjá mér á instagram. Ég er í fyrsta skipti með gjafaleik! Viðeigandi að sá leikur sé með Hildi Yeoman enda höfum við unnið saman á margan hátt síðustu 10 árin, eins og mörg ykkar hafa eflaust tekið eftir. Vinningshafi leiksins fær að gjöf vinsælu ullarpeysuna frá Hildi Yeoman en hún var að koma í þessum fallega koníaksbrúna lit og er hluti af nýjustu línu Hildar, The Raven, sem innblásin er af Vestfjörðum og galdramenningu. Peysan er úr merino og mohair – sú sama og ég bloggaði um hér og var ómissandi á meðgöngunni minni. Með peysunni fylgir 10.000 kr.- gjafabréf fyrir Vanessu Mooney skarti sem fæst í Yeoman, Skólavörðustíg. Aldeilis veglegur gjafaleikur og ég mæli með því að taka þátt!

Meira á instagram: @andrearofn.

XO..

Andrea Röfn

Fylgið mér á instagram: @andrearofn

UPPÁHALDS HLUTIR OKKAR AÞENU RAFNAR

Ég setti inn spurningaglugga á Instagram um daginn þar sem fylgjendur mínir gátu spurt út í alls kyns tengt mömmuhlutverkinu og Aþenu Röfn. Þar fékk ég margar spurningar út í þá hluti sem við notum mest, vagninn, rúmið, aukahluti o.s.frv. Ég fæ síðan reglulega spurningar út í þessi atriði og skynja áhuga margra á að vita hvað við fílum og hvers vegna. Sjálf hefði ég gjarnan viljað sjá svona lista þegar ég var að pæla í þessum hlutum á meðgöngunni og vona því að þessi listi gagnist einhverjum ykkar. Á sama tíma vil ég taka það fram að það er alls ekki nauðsynlegt að eiga hvern einasta hlut sem ég tel hérna upp, það verður hver og einn að finna það hjá sér hvað hann telur mikilvægt og hvað ekki. Ég ákvað að skrifa bara um þetta helsta – þá hluti sem við notum mest og ég er mikið spurð út í. Ef þið hafið einhverjar spurningar um þá eða eitthvað annað, ekki hika við að senda mér línu á instagram.

VAGNINN – BUGABOO FOX: Af mörgum mikilvægum hlutum finnst mér vagninn allra mikilvægastur. Ég lofaði sjálfri mér á meðgöngunni að fara út úr húsi á hverjum degi sama hvernig viðraði og þá er vagninn í 99% tilvika með í för. Fyrir valinu varð Bugaboo Fox, í samstarfi við Petit. Vagninn er rosalega meðfærilegur og vegur einungis 9,9 kíló, sem kemur sér vel þar sem ég þarf að taka hann upp og niður eina hæð til að komast að lyftunni í húsinu okkar. Þá er ekkert mál að smella honum í sundur og taka hann í tveimur pörtum milli hæða. Vagninn leggst síðan auðveldlega saman þegar við setjum hann í skottið á bílnum.

Við skiptum úr vagnstykkinu yfir í kerrustykkið þegar Aþena Röfn var sirka 5 mánaða og hætt að nenna að liggja í vagninum. Mér fannst hún tilbúin til að sitja í kerrustykkinu þar sem hún var farin að halda vel höfði og var almennt frekar styrk í líkamanum. Eftir að við skiptum gat hún fylgst með umhverfinu sínu og er alsæl með það, en sefur líka eins og engill í liggjandi stöðunni. Hún tekur núna daglúrana sína í vagninum úti á svölum, en þegar hún var nýfædd lögðum við hana mikið í vagninn innandyra.

Þegar hitinn fór að aukast hérna úti skiptum við um skerm á vagninum yfir í sólarskerm með UV vörn sem andar vel. Í honum er  líka innbyggt flugnanet sem við notuðum óspart i sumar. Ég verð svo að nefna Bugaboo töskuna sem hengist á stýrið, mér finnst hún snilld þar sem ég geymi lykla, símann minn, veskið og fleiri litla hluti. Að lokum er Bugaboo ferðataskan algjör snilld fyrir fólk sem ferðast töluvert eins og við.

RÚMIÐ – SEBRA: Bæði fallegt og praktískt þar sem rúmið er stækkanlegt og vex með barninu. Hægt er að stilla hæðina á dýnunni og fjarlægja rimla, en við tókum einmitt aðra hliðina af rúminu og settum hana að minni hlið á hjónarúminu, sem kom sér mjög vel í brjóstagjöfinni fyrstu mánuðina. Núna höfum við svo lækkað botninn og sett hliðina aftur á rúmið. Við keyptum okkar rúm hérna í Svíþjóð en það er fáanlegt  í Petit á Íslandi.

BABYNEST – ORGINALET: Aþena Röfn svaf í babynestinu hverja nótt þangað til hún óx upp úr því ca. 5 mánaða. Þetta babynest frá Petit.is er öryggisprófað og Oeko-Tex vottað. Svo er það líka sænskt eins og svo margar aðrar barnavörur! Við vorum ekki með vöggu frammi í stofu og því svaf hún mikið í nestinu frammi í sófa hjá okkur á daginn og kvöldin fyrstu vikurnar. Þegar við fórum svo sjálf að sofa gátum við fært hana inn í rúm í nestinu án þess að hún fyndi fyrir því. Babynestið hefur svo fylgt okkur á ferðalögum.

NAJELL MAGAPOKINN OG SLEEP CARRIER: Najell er sænskt merki með höfuðstöðvar í Lundi, en fyrsta módelverkefni Aþenu Rafnar var einmitt fyrir þau :-) Magapokinn hefur algjörlega bjargað mér á ferðalögum og á tímabilinu þegar Aþena Röfn var orðin þreytt á að liggja í vagninum, en mér fannst hún ennþá aðeins of lítil til að skipta yfir í kerrustykkið á Bugaboo. Þá var ekkert mál að skella henni í pokann og leyfa henni að sjá heiminn. Þar að auki notaði ég pokann hérna heima fyrir, til dæmis meðan ég gekk frá eða eldaði, þegar hún var ýmist óvær eða þreytt. Mesta snilldin við Najell pokann eru festingarnar við axlirnar, en það er segull í þeim og þar af leiðandi mjög auðvelt að smella þeim af og á með annarri hendi. Að mínu mati skipta þægindi og einfaldleiki lang mestu máli með svona vöru sem þessi uppfyllir að öllu leiti. Svo skemmir það ekki fyrir hvað hann er fallegur.

SleepCarrier er brilliant lausn til að svæfa barnið og leggja frá sér án þess að það vakni. Við notuðum SleepCarrier í vagninn í fyrstu göngutúrana í feb/mars þegar það var ennþá frekar kalt úti. Það var dásamlegt að geta farið inn á kaffihús og tekið Aþenu með mér inn í honum þannig að hún svaf áfram ótrufluð. Núna tökum við SleepCarrier með okkur í matarboð og heimsóknir og þá getur hún lagt sig í honum hvar sem er. Svo er hægt að búa til leikteppi úr honum.

BLEYJURNAR: Ég hef fengið spurningar um hvaða bleyjur við fílum best. Við höfum alltaf notað Libero bleyjur og verið mjög ánægð með þær. Bleyjurnar eru svansvottaðar og fá meðmæli norrænu astma og ofnæmissamtakanna. Ég kaupi alltaf touch bleyjurnar en þær koma einnig sem buxnableyjur sem er einmitt næst á dagskrá hjá okkur enda 7 mánaða orkuboltinn sjaldan kyrr á skiptiborðinu.

ÖMMUSTÓLLINN – BABYBJÖRN: Þessi stóll var endalaust notaður á okkar heimili og fylgdi okkur hvert sem er, bæði innan heimilisins og einnig þegar við fórum í heimsóknir. Hann er núna í smá pásu þar sem Aþena Röfn er orðin aðeins of stór til að vera bundin í honum – en verður tekinn aftur í notkun þegar hún getur labbað og fengið sér sjálf sæti í honum. Fyrir mitt leyti var ömmustóll must have fyrstu mánuðina.

MATARSTÓLLINN – STOKKE TRIPP TRAPP: Við Arnór sátum bæði í Tripp Trapp langt fram eftir aldri og vorum því alltaf ákveðin í að Aþena Röfn fengi svona stól. Við vorum síðan svo heppin að fá hann í babyshower gjöf. Snilldin við stólinn er fyrst og fremst að hann vex með barninu. Í byrjun vorum við með ungbarnasæti sem við elskuðum og Aþenu leið svo vel í, það var svo notalegt að hafa hana með okkur við matarborðið . Núna höfum við skipt því sæti út fyrir það næsta þannig að hún situr upprétt við borðið. 

BÍLSTÓLLINN – MAXI COSI PEBBLE PLUS: Þeir eiginleikar sem við vildum í bílstól voru að hann væri léttur og öruggur. Tvær vinkonur mínar voru með Pebble Plus og töluðu vel um hann og í staðinn fyrir að flækja hlutina keyptum við bara eins. Við keyptum svo millistykki til að geta smellt honum á Bugaboo grindina, sem var mjög sniðugt þegar hún var minni og maður þurfti að skreppa aðeins en nennti ekki að taka allan vagninn með. 

VAGNPOKINN – 66°NORÐUR SVANUR: Dúnpoki sem passar í vagninn, kerruna og bílstólinn. Samkvæmt mömmuhópunum sem ég er meðlimur í er þessi poki númer eitt hjá flestum íslenskum mæðrum. Ég sé það bara á Aþenu hvað henni líður vel í pokanum, hann er svo mjúkur og hlýr. Pokann fengum við í samstarfi við 66°Norður en ég hef unnið með þeim í mörg ár.

BABYZEN YOYO+: Við ferðumst mikið til Íslands og í nóvember ætlum við mæðgurnar í smá frí. Við keyptum því Yoyo+ kerruna frá Babyzen í Petit í síðustu Íslandsheimsókn og erum ótrúlega ánægð með kaupin. Þessi kerra leggst saman með einu handtaki og kemst upp í hólf í flugvélum. Þegar við erum hérna heima í Malmö er kerran svo í skottinu og er fullkomin í smá-stúss. Ég mæli heilshugar með þessari kerru, sérstaklega við þá sem eru á töluvert á ferðalagi eins og við.

Svo langar mig að nefna það að til að byrja með þarf maður svo ótrúlega lítið og svo er auðveldlega hægt að nálgast aðra hluti þegar líður á og maður finnur þörfina fyrir þá. Til dæmis föt í stærri stærðum, allt tengt mat (nema kannski pela til öryggis), alls kyns dót o.s.frv. Svo eru ekki allir sem finna þörf fyrir ömmustól, ferðakerru eða burðarpoka á meðan aðrir nota það mikið. Að lokum er margt sem maður notar í svo stuttan tíma og ég mæli hiklaust með því að fá dót að láni frá fólkinu í kringum ykkur ef það stendur ykkur til boða.

Andrea Röfn

Instagram @andrearofn