fbpx

MINN HÖNNUNARMARS

Gleðilegan HönnunarMars sem hefst í dag, 19 maí! Ó hvað ég vildi að ég væri á Íslandi til að taka þátt í þessari hönnunargleði en að þessu sinni fylgist ég með úr fjarlægð og sendi kveðjur heim.

Miðstöð hönnunar og arkitektúrs bað mig að velja fimm uppáhalds viðburði til að mæla með, það var alls ekki auðvelt þar sem að dagskráin telur um 80 sýningar sem breiða úr sér um bæinn. Njótið!

,,Ég bíð spennt eftir hönnunarmars ár hvert og í vali á mínu uppáhaldi þetta árið ákvað ég að leggja áherslu á fatahönnun. Það er heldur betur frábær dagskrá í ár – áfram íslensk hönnun! Ég hlakka til að sjá þetta – og miklu miklu meira…”

Splash! – ný fatalína Hildar Yeoman

Ég dáist af dugnaðinum í Hildi, ár eftir ár, og varð mjög spennt að sjá að ný fatalína væri væntanleg frá henni á HönnunarMars í ár. Hildur hefur hingað til dregið okkur inn í sinn einstaka ævintýraheim þar sem hún segir sögur og fær innblásturinn frá töfrum Íslands. Það má því má alls ekki missa af hennar ferska efni og andanum sem fylgir nýjum línum hverju sinni. Í ár frumsýnir hún klæðin í verslun sinni á Laugavegi, ég er spennt fyrir Splash!

BAHNS

Föstudaginn 21. maí ætlar BAHNS að kynna þriðju sundfatalínu sína í Vesturbæjarlaug. Ég er vissulega spennt að sjá sundfatnaðinn en finnst líka alveg frábært að það verði frítt í sund á sama tíma – tíska og frábær fjölskyldustund í leiðinni? Count me in! Sund er best í heimi, og ekki verra að hoppa út í laugina í íslenskum sundfatnaði.

MAGNEA

Ég er aðdáandi Magneu og þeirra gæða sem hún dregur fram úr erminni hverju sinni.  Hlakka til að sjá þær nýjungar sem hún hefur unnið að úr prjóni að þesssu sinni. Ég kann alltaf vel að meta þegar hönnuðir tjá íslenska arfleið og færa hana yfir í nútímann. Magnea leggur einnig mikla áherslu á sjálfbærni og íslenska framleiðslu, sem heillar.

ANITA HIRLEKAR x CUTLER AND GROSS

Úllala, ég er mjög spennt fyrir gleraugnalínu. Það er eitthvað nýtt og ferskt við þessa stefnu hjá Anítu Hirlekar sem ætlar að frumsýna fyrir okkur gleraugnalínu í samstarfi við Cutler and Gross í London, framleidd á Ítalíu úr hágæða efnum.

Sif Benedicta X Brynja Skjaldar

Halldóra, hönnuðurinn á bakvið merkið Sif Benedicta hefur hannað handtöskur, hálsmen og slæður með góðum árangri hingað til. Nú ætlar hún að sameina krafta sína með fatahönnuðinum Brynju Skjaldar og sýna okkur fatalínu á Hönnunarmars. Ég er með væntingar og býst við fallegum flíkum.

Hundrað hlutir sem við heyrðum

Þessi skemmtilega hugmynd heillar kaffikonuna. Ég hef ekki tölu á því hversu oft maður hefur sest niður á kaffihús og byrjar (alveg óvart) að hlusta á samtal á næsta borði.

Þetta og svo miklu miklu meira á HönnunarMars í maí – góða skemmtun! Skoðið dagskráina í heild sinni: HÉR
xx,-EG-.

UPPÁHALDS ÁRSTÍÐ

Skrifa Innlegg