Kertasníkir færir okkur þyrluflug með rómantísku ívafi

December 23, 2017

TRENDNET

Miðað við hvað ég sit mikið og lengi við tölvuna þessa dagana þá mætti ætla að ég yrði með nokkur blogg á dag en því miður er raunin ekki sú. Verkefnin þessa dagana snúa flest að Trendnet því þar hefur verið brjálað að gera á samfélagsmiðlum eins og þið hafið vonandi orðið vör við. Trendnet trúir á jólasveininn eins og síðustu ár og höfum við því verið með 13 veglegar gjafir til lesenda á samskiptamiðlum.

Eins og allir vita þá er Kertasníkir gjafmildastur þeirra bræðra. Ég elska að gefa upplifanir því þær geta lifað svo lengi og í þetta skiptið er Kertasníkir á sama máli…. þessi jólagjöf er mega spennandi!

Í samstarfi við Norðurflug ætlum við að gefa tveim heppnum þyrluflug sem ber nafnið Heli-Romance og er það pakki sem er tæplega 100.000 króna virði – ég vildi að ég gæti unnið.

—-

RÓMANTÍSKI ÞYRLUPAKKINN:
Þetta er eini pakkinn hjá þeim þar sem þau ábyrgjast einka VIP flug sem er sniðið að pörum með það að markmiði að gera þetta að rómantískri ferð. Flugtak er á Reykjarvíkurflugvelli og er flogið yfir fallegu höfuðborgina og nágrenni. Flugmaðurinn finnur topp af fjalli til að lenda á og skapar þar fallegar aðsæður fyrir parið með glasi af freyðivíni. Eftir þyrluflugið er boðið uppá að framlengja dekrið í Sóley Natura Spa sem staðsett er við flugvöllinn þar sem slaka má á eftir upplifunina.
Þyrluflugið tekur um 30-50 mínútur, 15-20 mínútna útsýnisflug með þyrluflugmanni og 20-30 mínútna lending á fjallstoppi þar sem flaska af freyðivíni er innifalin. Að auki fylgir með gjafakort í Sóley Natura Spa.

—-

Ég hef sjálf farið í flugferð með Norðurflugi og finnst þetta svo frábær hugmynd að gjöf fyrir þá sem vilja hugsa út fyrir boxið. Meira: HÉR