KEKB VOL5: NÚ ER ÞAÐ SVART

November 22, 2021

KEKB vinKONUR – Elísabet Gunnars, AndreA, Paldís & Nanna Kristín

Okkur fannst 2020 vera árið endalausa … en hér erum við, enn að bíða eftir bjartari tímum. Ekki endilega eitthvað sem við bjuggumst við, að lifa eftir takmörkunum vegna Covid faraldursins enn þann dag í dag. Þó að útlitið sé enn nokkuð svart þá er bjart yfir fallega góðgerða verkefni okkar sem loksins lítur dagsins ljós árið 2021, KEKB í fimmta sinn – ég fæ hlýju í hjartað við tilhugsunina.

Það er ótrúlegt að hugsa til þessa að litla verkefnið okkar sem byrjaði sem lítil hugmynd yfir kaffibolla hafi gefið af sér svona mikið til samfélagsins, síðast tæpar 7 milljónir til Bjarkarhlíðar og fyrri ár til annarra verðugra málefna. Í ár, 2021, höfum valið að styrkja Stígamót, ráðgjafar- og fræðslumiðstöð sem vinnur gegn kynferðisofbeldi. Málefni sem hefur verið mikið í umræðunni í ár og því vel við hæfi að styrkja samtökin svo að þau geti bætt sitt frábæra starf enn frekar.

Uppáhalds verkefni ársins, engin spurning!

2017 – 1 milljón í Kvennaathvarfið
2018 – 1,9 milljónir í Menntunarsjóð Mæðrastyrksnefndar
2019 – 3,7 milljónir til KRAFTS, stuðningsfélag fyrir ungt fólk með krabbamein og aðstandendur.
2020 – 6,8 milljónir til Bjarkahlíðar
2021 – ? til Stígamóta

Átakið Konur Eru Konur Bestar er bæði hvetjandi og góða áminning fyrir okkur, konur, að standa saman í stað þess að draga hvora aðra niður. Það litla sem breytist í þessari þekktu setningu skiptir sköpum – breytum neikvæðu hugarfari og umtali í jákvætt, verum fyrirmyndir fyrir komandi kynslóðir og gerum þannig samfélagið okkar að betri stað. Það er pláss fyrir okkur allar innanborðs, allir eiga að geta blómstrað á sinn hátt.

Í ár seljum við bolina í forsölu í mjög takmarkaðan tíma og aðeins á meðan birgðir endast. Ekki er hægt að skila eða skipta góðgerðabolum. Allar pantanir ættu að ná heim til ykkar fyrir jólin en gert er ráð fyrir því að bolirnir fari í póst í byrjun desember – bolirnir verða afhentir á tímabilinu 8.-20.desember.

Verum góðar fyrirmyndir fyrir komandi kynslóðir – áfram gakk og stót TAKK.
Öllum er velkomið að vera með í klappliðinu góða: HÉR