Trendnet

Það er við hæfi að birta í síðasta skiptið myndir frá þessu heimili okkar því það eru aðeins 2 dagar í nýja heimilið. Ég hef versnað í frestunaráráttunni minni og hef reynt nokkrum sinnum undanfarna daga að pakka niður, en alltaf enda ég á því að raða bara til hlutum eða flokka í skúffum og skápum. -Því er enn sem komið er ekkert komið ofan í kassa og einn gráhærður kærasti á kantinum því “það má ekki setja allt í kassa fyrr en að ég er búin að taka myndir”. Hér koma því myndirnar:)

Eins og ég hef komið inn á áður þá er íbúðin okkar mjög lítil, ekki nema 55 fermetrar, eitt svefnherbergi, baðherbergi og svo alrými þar sem eldhús, stofa og “forstofa” eru saman. Það eru þó margir kostir við það að búa smátt og það hefur farið alveg einstaklega vel um okkur hér. Helsti gallinn við þessa íbúð hefur mér þótt að hafa ekki forstofu og þurft að hafa fataskáp og oft nokkur skópör inní stofu. Ég bíð því spennt eftir að hafa forstofu á næsta stað!

Miðpunktur heimilisins er borðstofan/eldhúsið.

Horft fram úr svefnherberginu. Þessi tímaritabunki fær að fara upp í hillu á næsta stað, það er nánast ómögulegt að komast í gömul blöð! Fyrir framan svefnherbergið kom ég fyrir stórum spegli sem ég átti til, það er extra gaman að sjá sig alla morgna nýskriðna á lappir haha.

Uppáhalds svanaóróinn minn frá Flensted, þessi fær að fara í barnaherbergið.

Plakatið er frá Scintilla, og þessa tekkmubblu fengu amma og afi í brúðkaupsgjöf.

Horft úr eldhúsinu yfir í stofuna. Þarna sjáið þið best hversu þröngt er hér í raun og veru:) Þarna er nefnilega að sjá innganginn í íbúðina. Þetta er reyndar fjölbýli svo það er smá gangur fyrir framan, en það eru tvær íbúðir á hverri hæð og ég hef fengið að geyma nokkur skópör frammi á gangi svo allir skórnir okkar skreyti ekki stofuna:)

Þarna má einnig sjá ummerki um frestunaráráttuna mína, ég hef nefnilega ekki ennþá komið mér í það að negla neina nagla í veggina og því hanga þessar tvær myndir á tveimur nöglum sem voru hér fyrir skakkar og fínar (!) Finnst ykkur ég ekki vera smekkleg:)

Ég er smá skotin í þessari “bók” sem ég fann í Söstrene um daginn, fín til að geyma t.d. fjarstýringar og annað sem þykir ólekkert.

Hvað er ég að sýna ykkur þetta… þarna má nefnilega sjá stafla af myndum sem eru enn að bíða eftir því að vera hengdar upp á vegg:) Uten Silo hillan kemur sér vel við innganginn til að henda af sér þessu helsta og kemur í veg fyrir að ég týni lyklum t.d.

Litríkir geymslukassar frá HAY, og skenkurinn minn eini sanni sem Andrés smíðaði.

Uppáhaldsstóllinn minn eftir Kjarval, hann er reyndar orðinn húsbóndastóllinn hans Betúels núna. Þarna átti einnig alltaf að koma þessi fíni myndaveggur, en það er víst orðið of seint núna. -Sem betur fer reyndar því það þarf því lítið að sparsla og mála!

Horft inn í eldhúskrók frá sófanum, til hægri má sjá baðherbergishurðina.

Að pússa borðið og bera á það er á to do listanum. Eruð þið að tékka á þessum fínu ókeypis “blómum” úr garðinum!

Smáhlutirnir í eldhúsinu…(safnarinn ég).

Bestu servíettur sem ég hef átt “Eat more of what makes you happy”. Svo er bókin hennar Rósu alltaf jafn góð til að grípa í.

Krítarveggurinn góði sem kemur sér vel fyrir manneskju eins og mig sem sumir náskyldir mér telja að sé með “alzheimer light”.

Mikið sem ég elska að eiga svona djúpar gluggakistur til að raða fíneríi.

Verið velkomin inn á baðherbergi. P.s. það er ekkert grín hvað þessi kisi er athyglissjúkur, þarna kýs hann að fá að drekka vatnið sitt, ferskt beint úr krananum.

Ég býð ykkur nú ekki til að sjá allt heimilið okkar en sleppi svefnherberginu! Hvítar Malm kommóður frá Ikea eru bráðnauðsynlegar undir fötin, það er reyndar líka fataskápur í herberginu en við vildum aukafataslá og því var þessi hengd upp í loftið. Mjög fín lausn fyrir smáar íbúðir.

 Ein aukamynd sem mér þykir vera svo falleg. Ég átti nefnilega í mestu erfiðleikum með Betúel á meðan að myndatökunni stóð, hann gerði í því að fara akkúrat á þann stað sem ég var að mynda, þið eruð heppin að mér tókst að taka nokkrar án hans.

Næst fáið þið að sjá nýja heimilið sem er aðeins örfáum húsum í burtu, nokkrir auka fermetrar verða mjög vel þegnir sem og aukaherbergið líka og ég tala nú ekki um vinnustofuna. Við sem vorum reyndar svo sátt í þessari íbúð þrátt fyrir smá þrengsli, því á ég von á því að við verðum extra happy á næsta stað! Ég er allavega spennt að komast að því!

P.s. við vorum ekki að kaupa, erum ennþá sátt á leigumarkaðnum:)

Þangað til næst,

-Svana