MJÚKUR & MINIMALÍSKUR STÍLL PELLU HEDEBY STJÖRNUSTÍLISTA

Heimili

Í nýjasta tölublaði Elle Decoration má sjá fallegt heimili Pellu Hedeby sem er einn fremsti innanhússstílisti Svía. Pella er mín uppáhalds en hún hefur meðal annars starfað sem stílisti fyrir Ikea ásamt því að stílisera fyrir hin ýmsu tímarit. Hún er með nokkuð einkennandi stíl og eltist ekki mikið við tískubylgjur, skandinavískt og létt yfirbragð er hennar einkenni og látlausir litir ásamt náttúrulegum efnum. Þetta tölublað (07) þarf ég að næla mér í til að lesa viðtalið við þessa kláru konu, skrifað af Anders Bergmark – sem ég fékk þann heiður einu sinni að sýna bestu staði Reykjavíkur á HönnunarMars.

Þess má geta að Lotta Agaton hin eina sanna var að ráða Pellu Hedeby til sín sem hönnuð og stílista Lotta Agaton Interiors – hversu spennandi fréttir! Ég mun fylgjast spennt með þeim verkefnum sem þær munu taka sér fyrir hendur.

Stílisering: Pella Hedeby,   Ljósmyndari: Kristofer Johnsson fyrir ELLE  Decoration

HELGARINNLIT : SKANDINAVÍSKUR DRAUMUR

Heimili

Ég er svo innilega glöð að það sé komin helgi enda mjög löng vika að baki sem einkenndist af mikilli vinnu. Mest hefði ég viljað fara upp í bústaðinn góða og ná að núllstillast en það þarf að bíða betri tíma, Bjartur minn fékk þó að fara þangað með ömmu sinni og afa. Talandi um Bjart Elías, þá á hann 3ja ára afmæli í næstu viku og í þessum skrifuðu orðum ligg ég yfir vefsíðum í leit að afmælisgjöf sem hittir í mark hjá einum sem elskar ofurhetjur en 4 daga fyrirvari er víst ekki mjög langur í heimi netverslana haha. Sjáum hverju mamman nær að redda!

Yfir í annað – fallegt innlit á þessari góðu helgi. Það er svo mikið haust í loftinu sem ég elska, kíkti einmitt í blómaverslun í dag og keypti mér fallegar Erikur til að hafa við útihurðina – alveg fullkomin haustblóm. Sýnist þau vera á tilboði í mörgum blómabúðum, mæli með:) En kíkjum þá á þetta fallega skandinavíska draumaheimili…

Via My Scandinavian Home

Virkilega fallegt heimili sem er smekklega innréttað, ég kann virkilega vel að meta grafísk smáatriðin og mynstrin sem eru góð andstæða við hvítan grunninn, þ.e. fyrir utan fallegu veggfóðruðu stofuna. Hér gæti ég aldeilis búið!

Eigið ljúfa helgi ♡

 

GULLFALLEGT & HEILLANDI HEIMILI

Heimili

Það er aldeilis kominn tími á eitt stykki gordjöss innlit! Þessi fallega íbúð er staðsett í Gautaborg og hér hefur verið nostrað við hvern krók og kima, fallegir loftlistar setja sinn svip á heimilið og smekkur eiganda (ásamt stílista) er upp á 10! Það er virkilega gaman að skoða hér hvernig hlutunum er stillt upp og hægt að fá hugmyndir en það má sjá vel uppraðaðar smáhlutahillur í nánast öllum herbergjum. Þetta er fullkomið heimili til að taka með okkur inn í helgina – heimilisinnblástur af bestu gerð.

Myndir via Entrance 

Ég er sérstaklega hrifin af gráa litnum á stofunni og gæti vel hugsað mér að mála mína stofu í þessum lit, þessi blanda af gömlu og nýju er það sem gerir þetta heimili svona fallegt að mínu mati. Það er ekkert eftirsóknarvert að eiga allt nýtt, eitthvað gamalt, stundum pínu sjúskað er það sem gefur heimilinu sál og hlýju.

Föstudagsinnlit af betri gerðinni, hvernig finnst ykkur þetta?

HEIMA HJÁ EIGENDUM SÆNSKU ARTILLERIET

HeimiliVerslað

Ég á mér eina uppáhalds verslun sem ég hef þó aldrei heimsótt. Það er sænska Artilleriet sem ég er svo heilluð af og fylgist með þeim á flestum miðlum sem ég get. Einn daginn þá kem ég til með að heimsækja fallegu verslunina þeirra sem staðsett er í Gautaborg í Svíþjóð. Heimili eiganda verslunarinnar er hið glæsilegasta, nokkrar myndir hafið þið mögulega þegar séð á flakki um vefinn enda alveg einstakt heimili sem heillar flesta. Hér búa þeir Christopher og Björn, kíkjum í heimsókn…

Þvílíkur demantur sem þetta heimili og er miklir smekkmenn á ferð með gott auga fyrir smáatriðum. Þessar myndir voru teknar fyrir Residence tímaritið sem trónir núna á toppinum yfir sænsk tímarit en þar fer fremst í flokki hún elsku Lotta Agaton sem einmitt stíliseraði þessar myndir. Heimilið er hlýlegt og skandinavískur stíll ræður ríkjum, ljósir litir á móti grófum textíl og margar plöntur og persónuleg listaverk setja sinn svip á heimilið. Eigum við að flytja inn núna?

SKANDINAVÍSKUR SVEITADRAUMUR

Heimili

Þetta heimili er algjör draumur og ég veit að þið eigið eftir að vera jafn heilluð og ég. Gróft efnisvalið í textíl og viðarhúsgögnum á móti skjannahvítum máluðum veggjum og gólfi gerir þetta hið fullkomna sænska sveitasjarmaheimili og ég er nánast flutt inn í huganum. Myndaveggurinn er ótrúlega fallegur og mjög fjölbreytt verk sem prýða hann, einnig finnst mér fallegur fjölskyldumyndaveggurinn hjá stiganum – eitthvað sem vantar á mitt heimili, fleiri fjölskyldumyndir. Þetta er með fallegri heimilum sem ég hef skoðað en hér býr hin sænska Therese Johansen en hægt er að fylgjast með henni á instagram hér.

Via My Scandinavian home

Fallegt sænskt heimili – mig dreymir einmitt um að heimsækja Svíþjóð með fjölskylduna núna í sumar. Með hvaða borgum eða bæjum mælið þið að heimsækja með einn 3 ára í för?

ELEGANT HEIMILI & GRÁIR TÓNAR

Heimili

Ég rakst á þetta fallega og elegant heimili á netvafri mínu í gær eftir að Bjartur sofnaði og heillaðist alveg. Borðstofan er sérstaklega falleg með einstökum og sjaldséðum T-stólum Arne Jacobsen og grámálaðan glerskáp sem tónar vel við grængráa vegginn. Þetta haustveður okkur fær að hafa smá áhrif á heimilin sem ég skoða, er ég nokkuð ein um það að langa til þess að skríða undir teppi og kveikja á kerti á kvöldin?

Myndir via Hitta hem / Ljósmyndari: Sara Medina Lind / Hönnun og stílisering: Marie Ramse

Ég er dálítið skotin í þessum heimilum þar sem allir veggir eru málaðir, það verður eitthvað svo hlýlegt þó svo að þessi hugmynd henti okkur í leiguíbúðunum ansi illa haha.

Eigið annars alveg glimrandi sunnudag!

HEIMA HJÁ RAKEL RÚNARS

HeimiliPersónulegt

Þetta er aldeilis ekki í fyrsta sinn sem ég fjalla um vinkonu mína hana Rakel Rúnarsdóttur hér á blogginu og fær hún eflaust að vera fastagestur hér inná þar til ég segi skilið við bloggbransann – sem verður vonandi aldrei. Rakel mín er ekki bara ein af mínum allra bestu vinkonum en eins og ég hef áður sagt ykkur þá stofnuðum við bloggið saman fyrir um 8 árum síðan. Við deilum flestum áhugamálum saman en þar að auki höfum við mjög líkan smekk og ég hrífst af öllu sem hún kaupir sér og svo er það eins á móti. Í dag sýndi ég smá frá heimilinu hennar á Svartahvitu snapchat og verður heimsóknin aðgengileg þar til hádegis þann 13. júlí. Það er orðið ansi huggulegt hjá þeim í firðinum fagra en líka margt eftir að gera sem verður spennandi að fylgjast með.     

Ég sendi á Rakel nokkrar spurningar svo þið kynnist þessari elsku aðeins betur,

Hér búa?  Andri, Rakel, Emil Patrik og Evelyn Alba 

Er þetta draumaeignin ykkar? Húsið kemst ansi nálægt því að vera okkar draumaeign já. Passlega stórt, vel skipulagt, bjart og fallegt og fullkomin staðsetning í grónu og barnvænu hverfi.

Þurfti að gera eitthvað áður en þið fluttuð inn? Þar sem við vorum að flytja til landsins að utan þá þurftum við að flytja strax inn í húsið áður en við gerðum nokkuð. Við máluðum svo mest allt og höfum verið að vinna mikið í lóðinni, bæði að framan og aftan. Einnig voru nokkur viðhaldsverkefni sem þurfti að sinna.

Á eftir að klára mikið? Já mjög mikið, en við erum ekkert að flýta okkur og ætlum að taka nokkur ár í þetta allt saman, eiga fyrir hverju verkefni. Í sumar ætlum við að halda áfram að vinna í lóðinni, byggja pall að aftan o.fl. í þeim dúr. Einnig ætlum við taka efri hæðina alveg í gegn, skipta um gólfefni og mögulega hurðar. Svo á eftir að taka bæði baðherbergin í gegn, opna frá borðstofu og inn í eldhús og taka eldhúsið þá í gegn í leiðinni. Þá munum við líka skipta um öll gólfefni á neðri hæðinni.

Þessi stofa er algjör draumur, ég elska smáhlutahilluna sem er fyrir ofan ofninn þar sem nokkrir af uppáhaldshlutum fá að standa. Gluggarnir eru æðislegir og hleypa rosalega mikilli birtu inn og það er gott að sitja hér og geta horft á krakkana úti að leika. Á efri hæðinni er sjónvarpshol og því fær betri stofan að njóta sín enn betur án þess að sjónvarp trufli.

Ég er bálskotin í þessum lit og gæti vel hugsað mér að mála einn vegg í stofunni minni með honum, svo mildur og bjartur grár litur. Fyrir áhugasama (ég veit þið eruð mörg) þá heitir liturinn Hop Greige og er frá Sérefni eins og öll málningin á heimilinu.

Ikea Eket skápur á veggnum og uppáhalds hluturinn á heimilinu, Panthella lampinn góði. Þarna vantar að vísu Scintilla myndina góðu sem var fjarri góðu gamni í innrömmun.

Borðstofuborðið sem tengdapabbinn smíðaði og Rand mottan kemur hrikalega vel út undir borðinu en ekki sem stofumotta. Glerskápurinn var keyptur notaður á Bland og ljósið er frá Northern Lighting (fæst hér í Módern).

Hér eiga eftir að verða ansi mörg matarboðin!

Hvað er það besta við heimilið? Skipulagið og allir gluggarnir sem hleypa svo mikilli birtu inn.

Uppáhaldshlutur? Verner Panton Panthella lampinn minn og svo verð ég líka að nefna borðstofuborðið okkar sem tengdapabbi smíðaði fyrir mig.

Krúttherbergið hans Emils sem er á efri hæðinni. Blái liturinn heitir Clear Paris frá Sérefni, ég fékk margar fyrirspurnir um hann í dag enda alveg fullkominn mildur blár litur sem myndi einnig njóta sín vel í svefnherbergi. Tunglmyndin “til tunglsins og tilbaka” er eftir Fóu Feykirófu – sjá hér.

Svefnherbergið er fallegt og hugsað út í hvert smáatriði. Liturinn á veggjunum heitir Soft Stone og er frá Sérefni, en þessi litur kemur líka til með að prýða einn vegg í eldhúsinu við tækifæri.

Hvað kom til að þið fluttuð aftur til Íslands? Við erum búin að vera úti meira og minna síðan 2012 svo við vorum alveg tilbúin að koma heim og koma okkur fyrir hér. Svo var maðurinn minn að klára framhaldsnámið sitt og langaði til að koma heim og starfa við það svo við ákváðum bara að nú væri rétti tíminn.

Hvað er svo á döfinni? Ég verð í fæðingarorlofi út sumarið og stefni svo á að fara aftur út á vinnumarkaðinn.

Takk elsku Rakel fyrir að bjóða okkur í heimsókn ♡

Og ef það eru spurningar þá ekki hika við að skilja eftir skilaboð.

MÁNUDAGSHEIMSÓKN: NOKKRIR SKUGGAR AF GRÁU

Heimili

Hér má sjá huggulegt heimili sænska bloggarans Jasmina Bylund, stíllinn er afslappaður og látlaus og mjúkir litir í gráum tónum á veggjum. Fallegir bogadregnir gluggar setja sinn svip á heimilið ásamt grófum gardínum sem ná alla leið upp í loft, fjölbreyttur textíll í púðum, dúkum, mottum og ábreiðum gefur svo extra hlýlegt yfirbragð. Virkilega fallegt heimili, bjart og notalegt. 

Myndir via Jasmina Bylund

Hún Jasmina er einnig einstaklega smart á Instagram og ég mæli því með að kíkja við hjá henni þar sem hún deilir myndum bæði frá heimilinu en einnig fjölskyldulífinu. Þið finnið linkinn hér að ofan undir síðustu myndinni:)

SJARMERANDI HEIMILI MEÐ BLÁUM TÓNUM

Heimili

Þetta fallega heimili vakti athygli mína á netvafri kvöldsins. Litirnir eru sérstaklega fallegir, dökkmálað svefnherbergið og bláir tónar sem teygja anga sína um allt heimilið, bláar eldhúsinnréttingar, bláir púðar í stofunni og bláir skápar í forstofu. Heimilið er hlýlegt með úrvali af listaverkum og ljósmyndum á veggjum ásamt fallegum smáatriðum. Það er ekki erfitt að finna innblástur frá þessum myndum og ætla ég að vista nokkrar þeirra á Pinterest til að geta flett þeim upp síðar, svefnherberginu vil ég ekki gleyma enda algjör draumur. 

Myndir via Historiska Hem

BLÓM & HVÍTUR DRAUMUR

Heimili

Fullkomin helgi að baki og það er fátt sem toppar það að mínu mati en að enda góðan dag á fallegum heimilisinnblæstri. Þetta heimili er með þeim fallegri sem ég hef séð svo sumarlegt og bjart með blómum í hverju horni. Íbúðin er ekki nema 60 fm og staðsett á háalofti og skartar því ekki mörgum gluggum en til að vega upp á móti því eru allir veggir málaðir hvítir og glerveggir notaðir til að aðskilja rými. Takið eftir fallegu sumarblómunum í vösunum, núna er tíminn sem engar afsakanir gilda að hafa ekki falleg blóm í vasa sem gefa heimilinu svo mikið líf og lit – lúpínur vaxa jú á hverju horni.

Þetta svefnherbergi kallar á mig – þvílíkt fegurð.

Í svona litlum rýmum er sniðugt að nota margnota borð sem auðvelt er að færa á milli rýma og breyta til með.

Hér er einnig notað gler við handriðið allt til þess að opna rýmið sem mest.

Myndir via Entrance Makleri

Ekta skandinavískur heimilisinnblástur – eins og hann gerist bestur.

Vonandi var helgina ykkar æðisleg, ég get varla beðið eftir næstu dögum og komandi freknum. Sumarið lét loksins sjá sig ♡