HELGARINNLITIÐ: DÖKKMÁLAÐ & TÖFF

Heimili

Þetta heimili er sérstaklega fallegt með dökkmáluðum veggjum og húsgögnum í stíl. Fagurmáluð bleik skrifstofan sem virðist einnig vera fataherbergi vakti athygli mína ásamt dásamlegu dökkmáluðu svefnherbergi. Enn eina ferðina er ég minnt á drauma sófaborðið mitt sem ég hef verið með á heilanum í nokkur ár. En það er Gae Aulenti hjólaborðið fræga, ég var komin með tilboð í hert gler sem ég ætlaði að láta bora í fyrir dekkjum í svipuðum stíl en stoppa alltaf þegar ég sé fyrir mér annaðhvort stórslys eða að ég þurfi alltaf að vera með tuskuna á lofti. En hinsvegar langar mig í svona ferhyrnt sófaborð til að stilla upp blómum og bókum…

Aldrei tekst mér að búa svona fallega um rúmið…

Myndir via

Svefnherbergið er algjört æði, eruð þið ekki sammála því eða reyndar allt heimilið í heild sinni. Ég persónulega hefði þurft meira af litum í alrýmið á meðan að það skiptir minna máli í svefnherberginu. En þrátt fyrir það er ég alveg bálskotin og finnst koma einstaklega vel út að halda veggjum hvítum en mála alla lista, hurðar, gluggakarma og ofna í svörtum lit – mjög töff!

Eigið góða helgi!

DRAUMUR Á ÁSVALLAGÖTU ♡

HeimiliÍslensk hönnun

Ég á varla til orð yfir þetta glæsilega heimili – en þau gerast varla fallegri en einmitt þetta og ég skoða þessar myndir með fiðring í maganum. Svo litríkt og bjart og uppfullt af fallegri hönnun í blandi við persónulega muni. Ég ræð varla við mig, mig langar til að banka upp á hjá þessu smekkfólki og fá að kíkja í kaffi!

Þetta fallega heimili er til sölu og má finna nánari upplýsingar um það hér hjá Vísi, þvílík gósentíð á íslenskum fasteignasölum. Það hefur aldrei áður gerst að ég birti tvo daga í röð myndir af íslenskum heimilum. Bravó fyrir því ♡

Hér búa alvöru hönnunarsafnarar, Hans J. Wegner, Arne Jacobsen og Eames hjónin eiga nokkra stóla hér inni. Og tala nú ekki um fallegu ljósin, Gubi ljós yfir borðstofuborðinu, Georg Nelson yfir stofuborðinu ásamt nokkrum öðrum glæsilegum lömpum.

Litadýrð ♡

Myndir via Vísir.is

Bleikt flamingó veggfóður, þvílík gleði að vakna alla morgna hér inni. Þetta veggfóður ratar beina leið á minn lífsins óskalista svo fallegt er það.

Verðið þið ekki glöð að skoða svona hressandi og fallegar myndir? Ég gæti hreinlega ekki beðið um betri innblástur fyrir heimilið og kem til með að fletta aftur og aftur í gegnum þessar myndir.

DRAUMUR Á MARARGÖTU

HeimiliÍslensk hönnun

Hér býr ein smekklegasta dama sem ég þekki – þó víða væri leitað. Því kemur lítið á óvart að heimilið sé eins og klippt úr tímariti svo einstaklega fallegt er það. Ég hef einmitt farið í innlit til hennar þá fyrir Glamour og ég man hvað þetta fallega bláa heimili vakti mikla athygli – þetta var með fyrstu myndunum sem birtust af íslensku heimili sem var heilmálað í svona dökkum lit en núna er það að verða æ algengari sjón. Enda ekki skrítið þegar þessar myndir eru skoðaðar, hver væri ekki til í að búa þarna?

Myndir via Smartland á Mbl 

Fyrir áhugasama þá er opið hús á morgun, mánudag og ég er alveg sannfærð um að þessi íbúð muni rjúka út. Draumastaðsetning í fallegu húsi og að mér skilst með drauma nágranna;)

INSTAGRAM VIKUNNAR: LITRÍKT HEIMILI @RIKKESROOM

Heimili

Ég hef alltaf mjög gaman af því að uppgötva falleg og áhugaverð heimili á Instagram og hér er á ferðinni eitt ótrúlega skemmtilegt og litríkt. Fyrir mitt leyti þá finnst mér alveg nauðsynlegt að hafa einhverja liti heima hjá mér, þeir veita mér gleði og heimilið lifnar við.

Það er mikið af vönduðum húsgögnum og hönnun á heimili Rikke, ef þið horfið vel þá sjáið þið glitta í nokkur PH 2/3 veggljós í eldhúsinu sem er frekar sjaldgæf sjón innandyra. Gubi ljósið yfir eldhúsborðinu smellpassar hingað inn og plönturnar sem finna má í hverju horni eru dásamlegar.

 

Þið getið fylgst betur með smekkdömunni Rikke hjá @rikkesroom á Instagram

Draumaheimili ekki satt? Ég er sérstaklega hrifin af litunum á heimilinu, það er látlaust í grunninn fyrir utan jú bleika hurð og æðislegt blómaveggfóður. En þar fyrir utan eru litirnir helst sóttir í húsgögn, blóm, gardínur og listaverk, ég er alveg sannfærð um að litir veiti okkur hamingju ♡

Góð helgi framundan í bongó blíðu – njótum!

MÁ BJÓÐA ÞÉR TIL PARÍSAR?

Heimili

París er ein mest sjarmerandi borg sem ég hef heimsótt og kemur ekki á óvart að þetta fallega heimili sem staðsett er einmitt í París sé með þeim fallegri sem ég hef séð. Listarnir og rósettur í loftum eru eins og glæsileg listaverk og gefa íbúðinni svo fágað yfirbragð, marmarinn ásamt stærðarinnar speglum og ljósum sem minna helst á skúlptúr gera íbúðina alveg einstaka. Það er svo margt hér að sjá sem er almennt ekki að finna á hinu venjulega heimili og ég skoða hverja mynd aftur og aftur í leit að nýjum atriðum…

Þvílík draumastofa, með fallegum velúr sófum við einstakann arinn – hversu ljúft væri að sitja hér á kvöldin og slappa af?

Takið eftir hvað eldhúsið er fallegt, með marmara ekki aðeins á veggnum heldur einnig í hillunni og á eyjunni.

Innbyggðar hillur við eldhúsbekkinn sem er klæddur með velúr efni – þvílíkur draumur.

Ég hefði gjarnan viljað sjá meira af baðherberginu, en frístandandi baðkar og stærðarinnar tvöfaldur vaskur prýðir að minnsta kosti baðherbergið.

Via My Scandinavian home / Ljósmyndir:Benoit Linero

Atollo borðlampinn er mjög viðeigandi á þessu glæsta heimili enda með fallegri lömpum sem hannaðir hafa verið. Klassísk hönnun frá 1977 eftir Vico Magistretti og ég hefði ekkert á móti því að eiga og þið varla heldur? En heimilið… eigum við að ræða þennan gullmola! Ég bilast – þetta er svo fallegt heimili.

DRAUMKENNT HEIMILI : ARTILLERIET

Heimili

Artilleriet er ein af fallegustu verslunum sem hægt er að finna en hún er staðsett í Gautaborg. Áður hefur verið fjallað um þessa glæsilegu verslun á Trendnet, Pattra hér, Ása Regins hér og nýlega kíkti Elísabet Gunnars í innlit til þeirra sem sjá mátti á Trendnet Instagram stories. Artilleriet stendur fyrir fjölbreyttu og fallegu úrvali af innanhússmunum, húsgögnum og smávörum. Þar má finna fullkomna blöndu af klassík, vintage og nútímalegri hönnun sumt frá vel þekktum merkjum sem standa fyrir mikil gæði en einnig frá óþekktari merkjum sem eru á uppleið.

Artilleriet birti hjá sér þessar myndir af heimili Lisu Robertz sem er ekki aðeins fyrrverandi starfsmaður verslunarinnar heldur mikill fagurkeri, það verður að segjast að það er ekki vitlaus hugmynd hjá verslun að auglýsa vörurnar sínar á þennan hátt, í innliti sem er ekki bara ótrúlega fallegt heldur gefur einnig góðar hugmyndir.

Ef þið smellið á innlitið hér, þá má sjá að verslunin hefur tekið saman nokkrar vörur svo auðveldlega er hægt að leika eftir þennan stíl! Virkilega fallegt og elegant heimili með persónulegum stíl ♡

BLEIK & FALLEG STOFA

Heimili

Hér er það stofan sem heillar mest en þó er heimilið allt afskaplega fallegt. Stofan er bara eitthvað svo skemmtilega látlaus ef svo má kalla, ófrágenginn sófi og húsgögn úr öllum áttum. Toppurinn er líklega fallegi grábleiki liturinn sem prýðir veggina og gerir stofuna alveg extra djúsí og sæta. Ég sjálf fékk nú bara “leyfi” til að mála bleikt í anddyrinu á okkar heimili með Svönubleikum lit úr Sérefni en hefði ég haft þessar myndir mér til stuðnings hefði ég kannski fengið að mála stofuna alla? Söderhamn sófinn sem hættir aldrei að ásækja mig, hann hreinlega er að grábiðja mig um að kaupa sig. – Jú ég er nefnilega ennþá í sófaleit og ætla aldeilis að leyfa ykkur að fylgjast með þeirri góðu leit.

En að máli málanna, kíkjum á þessa fegurð –

Mikið er þetta skemmtileg stofa, með þrjú ólík stofuborð, púða úr öllum áttum, ólíkar plöntur og flott listaverk á veggjum.

Listaverkin á veggjunum á þessu heimili heilla mig mikið ásamt þessari góðu blöndu af antík við klassíska hönnun. Þungt viðarborðið kemur vel út með Ton armstólnum, HAY pinnastólum og Y stólnum. Allt gjörólíkir stólar en passa vel saman þar sem allir eru þeir viðarlitaðir.

Myndir via Bjurfors 

Skemmtilegt heimili hér á ferð, takið eftir að það eru um 14 pottaplöntur ásamt afskornum blómum á víð og dreif sem skapar svona fallegt yfirbragð. Litavalið er einnig sérstaklega fallegt og afslappað, ég gæti að minnsta kosti vel hugsað mér að búa hér.

KATE MOSS & BLEIKUR SÓFI

Heimili

Það er alltaf dálítið erfitt að birta nýtt innlit á eftir því sem slær svona ótrúlega í gegn eins og það íslenska sem ég birti síðast, sjá hér. En því ákvað ég að sýna ykkur innlit í eina típíska sænska krúttlega stúdíó íbúð. Hér hefur allt verið opnað upp á gátt með glugga úr eldhúsi inn í svefnherbergi svo birtan flæðir inn ásamt því að stærðarinnar glerveggur aðskilur svefnherbergi og stofu sem gefur heimilinu mikinn karakter og birtu. Veggirnir eru málaðir í hlýjum ljósgráum lit sem fer vel með bleikum sófanum og gylltum smáatriðum. Gylltur eldhúsvaskur flokkast þó aldeilis ekki sem smáatriði heldur meira eins og drottningin á svæðinu. Ég meina hver væri ekki til í gylltan trylltan vask?

Í litlum íbúðum þarf að nýta allt geymslupláss vel og hér þarf að hafa skápana í stofunni.

Eldhúsið er ótrúlega fallegt, með marmaraplötu og gyllti vaskurinn er æði!

 

Sniðug lausn að opna svona rýmið með glervegg til að ná birtunni inn.

Hér hefðu þau vel getað haft fataskápinn en á sama tíma hefði eldhúsið verið töluvert lokaðra, þessi útkoma er töluvert skemmtilegri.

Myndir via Residence 

Núna ætla ég að stíga frá tölvunni og fara út í þetta dásamlega veður sem við erum svo heppin með! Krossum fingur og tær að það haldist svona fram á haust:)

ÍSLENSKT HEIMILI : STÚTFULLT AF LIST & SJARMA

Heimili

Þetta íslenska heimili sem nú má finna myndir af á fasteignasölu er engu líkt. Það var mín kæra Karen Lind sem sendi mér þessar myndir í morgun og ég missti nánast andann í nokkrar sekúndur. Það er nefnilega sjaldan sem svona heimili birtast okkur og við verðum samstundis forvitin að fá að heyra hverjir búa svona skemmtilega. Ég ætla að leggja allt undir að þarna búi hönnuður eða listamaður, það hreinlega hlýtur að vera. Öll þessi listaverk og sérkennilegi stíll einkennir heimilið sem er í grunninn mjög hrátt, með hátt til lofts og vítt til veggja. En þó svo skemmtileg og kósý með öllum þessum ólíku gólfmottum á víð og dreif. Og ræðum svo aðeins dúkku listaverkið á eldhúsveggnum – það er nánast enginn sem kemst upp með svona veggpunt en hér kemur það manni ekki einu sinni á óvart. Alveg hrikalega skemmtilegt heimili og kemur sem ferskur andblær í flóru íslenskra heimila. Ég er alveg heilluð.

Og svo ég haldi áfram að giska hver búi hér, þá vil ég trúa því að þessi fjölskylda sé undir hollenskum áhrifum og hafa líklega búið þar um tíma. Þessi iðnaðarstíll og frábæra samansafn af hönnun er eitthvað sem ég sé nánast aðeins í Hollandi og eldhúsborðið/borðstofuborðið eftir hinn hollenska Piet Hein Eek er mín draumaeign.

Myndirnar eru fengnar af fasteignasöluvef Vísis – sjá nánar hér. 

HEIMILI SEM KEMUR MANNI Í SUMARGÍRINN

Heimili

Alltaf verður maður svo bjartsýnn þegar sú gula lætur sjá sig! En þetta heimili er einmitt það sem ég þurfti að skoða í dag, svo sumarlegt og fallegt. Stofan er sérstaklega falleg með grágrænum veggjum og Koushi ljósi sem eru sjaldséð hér á landi. Hér er búið að gera mikið úr litlu og ódýrar lausnir eins og viðarhillurnar og fatasláin í svefnherberginu. Þessi íbúð er lítil en þó algjört sjarmatröll!



Myndir via Entrance

Ég get ekki beðið eftir að græja litlu “svalirnar” hjá okkur til að hafa það huggulegt í sumar, en svíarnir mega eiga það að þau kunna virkilega að meta þessi litlu útisvæði sín í þéttbyggðum borgum og oft á tíðum eru svalirnar nánast eins og önnur stofa. Þarna væri gott að sitja með hvítvínsglas:)