Um helgina birtist viðtal við mig í Sunnudagsblaði Morgunblaðsins. Þar svaraði ég nokkrum skemmtilegum spurningum um tísku og fatastíl minn. Hér fáið þið spurningar og svör –
Mynd: Styrmir Kári
OUTFIT:
Leðurskyrta: H&M
Skyrta: AllSaints
Rúllukragabolur: NIKE
Buxur: Topshop
Skór: Air Jordan 1
Derhúfa: The North Face
Hvað er það sem heillar þig við tísku?
Það sem heillar mig mest er að hver og einn hefur sinn stíl. Maður stjórnar því algjörlega hversu mikið eða lítið maður fylgir helstu tískustraumum. Mér finnst töff hvað tískan gengur í hringi og hlutir sem manni finnast fáránlegir þegar maður hugsar til baka eiga eflaust eftir að vera aðal málið á ný eftir nokkur ár.
Hvernig myndir þú lýsa þínum fatastíl?
Stíllinn minn er fjölbreytilegur og afslappaður, gæjalegur í bland við fínni flíkur. Mér finnst gaman að blanda saman ólíkum stílum, til dæmis með strigaskóm við fína efri parta. Ég klæðist mest svörtu og hvítu, en uppáhalds liturinn minn er blár og því er ég alltaf mjög hamingjusöm þegar ég finn falleg blá föt.
Hvað er þitt uppáhalds tískutrend þessa stundina?
Strigaskór hafa verið heitir síðustu misseri og verða það klárlega áfram. Það hefur verið uppáhalds trendið mitt frá fyrsta degi og ég sé ekki fram á að fá nokkurn tímann nóg af flottum strigaskóm. Ég er líka rosalega skotin í rúllukragabolum og sanka þeim að mér þessa dagana, bæði peysum og bolum. Að lokum er ég mikið með alls kyns derhúfur sem hafa komið sterkar inn síðasta árið.
Áttu þér eitthvert gott stef, ráð eða mottó, þegar kemur að fatakaupum?
Gæði fram yfir magn. Ég hef lært í gegnum árin að ég verð nánast aldrei þreytt á fötum sem eru úr góðum og vönduðum efnum. Þau kosta meira en að lokum borgar það sig alltaf að kaupa færri, dýrari flíkur. Að minnsta kosti í mínum tilfellum.
Er eitthvað ráð sem þú getur gefið varðandi fatakaup?
Ekki kaupa bara til þess að kaupa. Mér finnst lang best að vera handviss um að varan muni koma mér að góðum notum og að hún sé peninganna virði. Einnig finnst mér mikilvægt að gera sér grein fyrir að þó svo að einhver tískubylgja standi yfir þýðir það alls ekki að maður verði að fylgja henni. Aðalmálið er að klæðast því sem manni sjálfum finnst flott, burtséð frá því hvort það sé á öllum síðum tískublaðanna eða ekki.
Hvað kaupir þú þér alltaf þó þú eigir nóg af því?
Skó! Þeir eru alltaf það fyrsta sem ég skoða í búðum og ég vel yfirleitt dress dagsins út frá því skópari sem mig langar að klæðast þann daginn. Ég kaupi mér líka reglulega svartar gallabuxur, en það er aðallega vegna þess að með tímanum upplitast þær og mér finnst mikilvægt að eiga alltaf par af svörtum, nýlegum gallabuxum.
Hvaða þekkta andlit finnst þér með flottan stíl?
Anja Rubik, hún er algjör töffari og við eigum það sameiginlegt að elska svört föt. Ég hef fylgst með henni lengi og alltaf verið hrifin af stílnum hennar. Jourdan Dunn og Elsa Hosk eru líka ofarlega í huga mér.
Hverju myndir þú aldrei klæðast?
Aldrei að segja aldrei, en akkúrat núna finnst mér afar ólíklegt að ég muni ganga í þröngum „bandage” kjól í nánustu framtíð.
Áttu þér uppáhalds flík?
Já, ég á nokkrar uppáhalds flíkur. Ég fæ aldrei nóg af biker leðurjakkanum mínum en hann er úr endurunnu leðri, keyptur í New York fyrir tveimur árum. Þar á eftir koma glimmerbuxur sem ég klæddist í myndatöku fyrir sex árum og fór beinustu leið í Zöru eftir tökurnar til að finna þar síðasta parið af buxunum. Önnur ofnotuð flík í skápnum er svört silkiskyrta úr All Saints, en hún hentar við öll tilefni og var hverrar krónu virði. Að lokum fer ég varla úr Jökla Parka úlpunni minni frá 66°N þessa dagana.
Áttu þér uppáhalds hönnuð?
Alexander Wang, Donna Karan, Olivier Rousteing og Karl Oskar Olsen. Allt mjög ólíkir hönnuðir með mismunandi stíla.
Hope you like
xx
Andrea Röfn
Skrifa Innlegg