Er ekki tilvalið að birta eitt ofurfallegt sænskt heimili eftir nokkra daga sumarleyfi, ég verð nú líka að segja að það hefur verið minna um djúsí innlit að finna í netheimum en venjulega svona yfir hásumarið, en þetta er allt að koma til núna:) Ég er þó orðin gífurlega spennt fyrir haustinu, það er algjörlega minn tími (ásamt vetrinum), búðirnar fyllast af fallegum nýjum vörum og jafnvel tímarit og bloggsíður verða öflugri. Það leggst nefnilega svo margt í dvala í sólinni, það er bara þannig!
Ég hef verið með augun opin fyrir nýju stofuborði í ágætistíma en án árangurs. Þessi hugmynd kemur þó mjög vel út, að blanda saman þremur minni sófaborðum/hliðarborðum. Þá myndi líklega DLM borðið frá Hay + Tray table verða fyrir valinu ásamt mögulega Around table frá Muuto? 
Ég er 100% sjúk í þessa íbúð sem er til sölu á sænsku fasteignasölunni Stadshem, rósetturnar í loftinu eru dásamlega fallegar sem og vegglistarnir, hvítu húsgögnin og viðargólfið ahhh þvílík fegurð.
Jæja núna skal ég koma mér aftur í gang eftir sumarlægðina mína, ég kem nefnilega ENGU í verk í sól & hita. Ég hef jafnvel verið að fá spurningar hvort ég sé búin að eiga eftir að ekkert birtist hér inni í nokkra daga haha, það er þó ekki svo gott:) Tvær vikur eftir og eftir að innrétta heilt barnaherbergi. Jú ætli ég óski þessi ekki bara að rigningin mæti aftur á svæðið!
Eigið gott kvöld kæru lesendur.
-Svana
Skrifa Innlegg