Ég tók nokkrar myndir hér heima í dag, ég fékk nefnilega svo fallegar rósir í vikunni frá mínu manni að ég varð hreinlega að nýta tækifærið og smella af mynd svona á meðan að rósirnar lifa. Draumurinn væri að sjálfsögðu að fá svona fín blóm reglulega en það kemur kannski með tímanum, við erum jú “bara” búin að vera saman í 12 ár;)
Blómavasinn, marmaraskálin og kertastjakarnir í glugganum fann ég allt í Góða Hirðinum, nokkuð góð kaup myndi ég segja!
Munið þið þegar ég nefndi fyrir nokkru að ég ætlaði að minnka bleika litinn hér heima? Sá bleiki var ekki lengi að koma sér aftur vel fyrir innan veggja heimilisins eins og sjá má, ég er hætt að streitast á móti! Meiraðsegja páfagaukapúðinn sem ég var búin að gleyma er búinn að planta sér í sófann.
Ég seldi Andy Warhol plakatið mitt um daginn og svona hefur stofan verið síðan, með tómann vegg. Óákveðna ég get nefnilega ekki ákveðið hvað eigi að koma í staðinn, valið stendur á milli þess að setja hvíta myndarammahillu frá Ikea og raða römmum á hana, eða útbúa myndavegg. Hvað finnst ykkur? Svo mun ég vonandi bráðlega eignast hillu undir bækurnar mínar sem sést glitta í svo þær hætti að þjóna þeim tilgangi að vera kaffiborð. Margar pælingar í gangi með stofuna mína get ég sagt ykkur:)
Takið þið svo eftir dældinni á sófaarminum? Jú þarna er ég búin að sitja límd síðustu mánuði, annaðhvort að gefa brjóst eða að vinna í tölvunni. Það kom þó að því að ég eignaðist almennilega vinnuaðstöðu en ég er búin að koma mér vel fyrir inni í herberginu hans Bjarts með þetta fína skrifborð.
Ég var búin að lofa að sýna ykkur í dag nýja skrifborðið, instagram-mynd fær að duga núna enda skrifborðið/hillan ennþá nánast tóm. Mig hefur lengi langað í String hillur og ég lét það loksins eftir mér, ég var nefnilega mjög dugleg að selja úr geymslunni minni um daginn og fékk upphæð sem dugaði fyrir kaupum á slíkum grip. Það besta við String hilluna er að sjálfsögðu það að hægt er að bæta endalaust við hana svo þetta er mögulega bara byrjunin af fallegri samstæðu sem ég mun eiga í framtíðinni:)
Þetta var þó ekki fyrsti draumurinn sem ég lét rætast á árinu… ég lét einn stærsta drauminn rætast fyrir nokkrum dögum síðan og ætla að segja ykkur frá því í næstu færslu!
xx
Skrifa Innlegg