Ég varð svo ánægð í gærkvöldi þegar ég var að horfa á jólaþáttinn á RÚV með Ragnhildi Steinunni og Benedikti Valssyni. Flestir munirnir á setti voru nefnilega íslenskir sem er alveg frábær breyting frá því sem oftast er, það er nefnilega svo mikilvægt að styðja við íslenska hönnun á þennan hátt líka og gera hana sýnilega í sjónvarpi okkar allra, RÚV. Þarna mátti sjá m.a. Sindrastólinn, Umemi púða, Markrún fjallapúða og falleg postulínsjólatré frá Postulínu.
Mér finnst Sindrastóllinn vera alveg gullfallegur en hann var hannaður fyrir 52 ári síðan og hefur því elst alveg einstaklega vel. Stóllinn var hannaður af Ásgeiri Einarssyni (1927-2001) árið 1962 og var settur aftur í framleiðslu árið 2012 eftir að hafa verið ófáanlegur í mörg ár. Stóllinn prýddi mörg íslensk heimili á sjötta og sjöunda áratugnum en það hefur farið minna fyrir honum núna. Sindrastóllinn er framleiddur á Íslandi af fjórum fyrirtækjum, Sólóhúsgögn smíða stálgrindina undir stólinn, Ikan ehf., bátasmiðja og frumkvöðlasetur, steypir skelina, Sjávarleður framleiðir gærurnar og GÁ húsgögn annast bólstrun og selja hann svo. Það var GÁ húsgögn sem ákváðu að endurgera stólinn með leyfi frá ættingjum hönnuðarins og framleiða þeir hann í 50 eintökum – einn fyrir hvert ár. Núna er ég ekki með á hreinu hversu mörg eintök eru eftir, en það væri gaman að vita:)
Flott hjá RÚV, meira svona:)
Skrifa Innlegg