Mikið gladdi það mig að rekast á innlit hjá sænska stílistanum Annaleena Karlsson frá bloggsíðunni frægu, Annaleenas Hem. Ég hef lengi fylgst með henni og tengi mikið við stílinn hennar, þá helst þennan hráleika og svo er stíllinn hennar líka frekar töffaralegur. Annaleena sem er menntuð sem hjúkrunarfræðingur stefndi alltaf á að verða ljósmóðir en skipti heldur betur um stefnu í lífinu og starfar í dag við “interior” eða innanhúss-stíliseringu og ljósmyndun. Hún segir áhugann á innanhúshönnun hafa kviknað af alvöru við byggingu á draumahúsinu sínu sem myndirnar hér að neðan eru frá. Fyrir áhugasama þá er hægt að lesa viðtalið við hana á vefsíðu tímaritsins Residence, en þar birtust myndirnar fyrst. Þetta heimili er algjörlega æðislegt!
Eldhúsið er skemmtilega hannað, göt á skápahurðum og skúffum í stað þess að nota höldur, -allt fyrir heildarlúkkið. Einnig segir hún stálplöturnar vera í iðnaðareldhúsa gæðum, s.s. þykktin er slík að leggja má heitt á plötuna og missa þunga hluti án þess að það sjáist á henni. Hreindýrahornin eru svo auðvitað punkturinn yfir i-ið.
Yfir borðstofuborðinu hangir þetta risavaxna ljós, en þetta er í raun karfa sem Annaleena spreyjaði svarta og hengdi upp sem ljós. -Góð hugmynd:)
Skrifa Innlegg