Trendnet

Í síðustu viku ákvað ég að skella upp sérstaklega ljómandi förðun einn daginn. Ég elska allt sem ljómar og ég bara elska ljómandi snyrtivörur útaf lífinu! Ég nota hins vegar miklu meira ljómandi vörur í fljótandi formi en í þessari förðun eru það ljómandi púður sem eru í sviðsljósinu, annað frá The Balm og hitt er púðrið sem Jaclyn Hill hannaði fyrir BECCA sem ég keypti ekki fyrir svo löngu síðan inná nordstrom.com.

Ljómi er besti þreytubaninn að mínu mati og ég nota hann óspart þegar ég á þreyttan dag. Þreyta sést alltaf á húðinni minni en ég er þó ansi ágæt í að fela þreytuna með ljóma og léttum litum. Getið þið nokkuð séð á þessum myndum að ég fékk bara 5 tíma svefn nóttina áður… ;)

Ég ákvað að leggja áherslu á húðina en samt um leið að gefa augunum fallega umgjörð með eyeliner og maskara. Ég hafði eyeliner línuna sem þynnsta og ég gat og setti örmjóan spíss á endann. Þegar þið eruð að gera spíss á eyelinerinn ykkar munið að miða hann útfrá neðri augnhárunum ykkar – ég skal útskýra þetta betur við tækifæri inná snappinu mínu.

Hér sjáið þið vörurnar sem ég notaði til að ná fram þessari förðun – eða vörurnar sem eru í aðalhlutverki alla vega…

Betty Lou-Manizer frá The Balm – ég var að prófa þessa vinsælu vöru þarna í fyrsta skipti en vó hvað ég var bara in love við fyrstu sýn! Púðrið er með fallegri gylltri áferð. Það er ábyggilega sjúklega flott við sólkyssta húð og það kom sérstaklega vel út í fallegri sólarbirtu. Ég setti púðrið á með stóra púðurburstanum frá Real Techniques til að fá sérstaklega mjúka og þétta áferð. Fyrir áhugasamar þá fæst púðrið inná Lineup.is HÉR.

BECCA x Jaclyn Hill Shimmering Skin Perfector í litnum Champagne Pop – sjitt hvað þetta er eitthvað það fallegasta ljómapúður sem ég hef séð í langan tíma. Ég dýrka persónuleikann hennar Jaclyn Hill hún er svakalega stór og skemmtilegur karakter sem minnir óneitanlega á púðrið sem er svakalega skemmtilegt í notkun því áferðin á því er ofboðslega flott og það bráðnar saman við húðina. Ég setti það ofan á kinnbeinin, í einskonar c upp að augabrúninni og smá yfir augnlokið. Þetta púður er algjörlega tryllt og ég skil svo vel að það seldist upp á örskömmum tíma.

Master Precise Eyeliner frá Maybelline – uppáhalds eyelinertússinn minn, alveg sá allra besti að mínu mati. Ég elska að nota hann, ég elska oddinn, ég elska formúluna, ég elska endinguna. Ég nota hann nánast undantekningarlaust þegar ég er að gera eyeliner hvort sem það er á mig sjálfa eða aðra. Það hefur enginn eyeliner komist með tærnar þar sem þessi er með hælana í mínum huga og þennan þurfa allir að eiga – það er bara þannig…

Hypnose Volume-a-Porter frá Lancome – nýjasti maskarinn frá Lancome og minn uppáhalds frá merkinu þó svo Grandiose sé auðvitað svakalega flottur en hann er kominn í annað sætið. Greiðan á þessum er úr gúmmíi og hárin eru þunn en ágætlega stíf svo það er svakalega gott að vinna með maskarann. Formúlan er þykk og góð svo augnhárin verða mjög falleg. Hann gerir mér kleift að móta augnhárin eftir því hvernig ég vil nákvæmlega hafa þau og formúlan helst svaka vel og hvorki smitar frá sér né hrynur. Ég er bara með eina umferð af maskaranum við þessa förðun og þið sjáið að augnhárin mín eru alveg extra svört og flott. Svo er ekkert mál að gera meira úr honum með fleiri umferðum.

Dior Addict Fluid Stick í litnum Avant Garde nr. 499 – þessi fallegi litur er úr haustlínunni frá Dior og hann er svo fallegur og klassískur. Það sem ég kann svo vel að meta við Fluid Stick varalitina er áferðin, hún er glossuð og glansandi en formúlan er örþunn og mér líður meira eins og ég sé með varasalva. Mér finnst þessi hlýji nude litur svo æðislegur og hann gengur við allt. Ég set hann mikið upp og ég held meirað segja að ég muni ná að tæma þennan ansi hratt…

Camera Ready BB Water SPF30 frá Smashbox – farðinn sem ég gleymdi að týna til þegar ég tók vörumyndina, en hann fær stærri færslu síðar svo ekkert stress. En það er svakalega léttur og vatnskenndur nýr farði sem gefur mjög náttúrulega og fallega áferð. Ég bar hann á með Beautyblender svampi og mér finnst hann alveg koma svakalega vel út á húðinni. Húðin verður náttúruleg og ljómandi falleg í takt við allt annað sem er í gangi.

Ég var ofboðslega ánægð með þessa förðun og ég naut mín mjög vel með hana þetta kvöldið. Ég þarf dáldið að venjast því að vera stundum mikið máluð svona meðal annarra því ég er yfirleitt alltaf ómáluð og alltaf að nudda augun mín. Það hljómar því kannski ekki svo skrítið að stuttu eftir að þessar myndir voru teknar nuddaði ég augun…. – voða smart múv ;)

EH

Vörunar sem ég skrifa um hér hef ég bæði fengið sendar sem sýnishorn eða keypt sjálf. Það hefur þó engin áhrif á álit mitt á vörunum og eins og alltaf veiti ég hreinskilið álit.

Þegar ég hugsa til baka í dag orðin tveggja barna móðir þá átta ég mig á því að ég vissi bara ekki neitt þegar ég átti von á Tinna Snæ. Maður var búin að reyna að ímynda sér þetta nýja stóra hlutverk og þó ég hefði farið á þar til gert námskeið í brjóstagjöf og foreldrafræðslu fannst mér ég ekkert hafa lært – því það námskeið snerist aðallega um að fræða okkur um ágæti brjóstamjólkur og lítið komið inná annað. Ég var búin að sjá fyrir mér að þetta yrði bara ekkert vandamál, konurnar í bíómyndunum rúlla þessu öllu saman upp og ég yrði nú aldrei minni manneskja en þær.

En upp kom að ég vissi ekkert hvað ég var að fara út í þegar kom að tilfinningum – ég gef mér það að við vorum nú búin að kaupa allt og það var sko nóg til fyrir blessað barnið. Ég vissi samt ekkert hvernig mér leið ég gleymdi algjörlega að hugsa um sjálfa mig og upp kom að ég gjörsamlega bugaðist við allar þessar breytingar.

Ég hef stundum reynt að lýsa því fyrir barnlausum vinkonum hvað það er sem gerðist þegar ég átti Tinna og svo aftur þegar Tumi kom en þessum tilfinningum er á engan hátt hægt að lýsa. Ég fann fyrir svo mikilli ást og ég uppgötvaði svo margar nýjar tilfinningar sem ég vissi ekkert hvað ég átti að gera við og hvert ég gæti beint þessum nýju tilfinningum. En það eru ekki bara tilfinningarnar og ástin sem fór með mig heldur líka pressan sem ég setti á sjálfa mig til að allt væri fullkomið, ég var með svakalegan kvíða og mikið fæðingarþunglyndi sem ég ýtti alltaf frá mér því allt varð að vera fullkomið. En innst inni var ég að bugast. Ég man eftir fyrsta deginum sem við Tinni vorum ein heima saman – daginn sem Aðalsteinn fór í vinnuna eftir fæðingarorlof. Ég sat heima hjá mér og grét og grét og hugsaði bara að ég gæti þetta engan vegin. Mér leið svo illa að ég náði ekki nógu góðum tengslum við barnið mitt og ég hef þurft að vinna mikið úr þessum tilfinningum síðan þá með hjálp fagaðila því samviskubitið nagar mig daglega.

Það er nefninlega svo margt sem þarf að huga að þegar tekið er á móti nýjum fjölskyldumeðlim, það þarf ekki að eiga rimlarúm, skiptiborð eða föt fyrir tugi þúsunda – það þarf jafnvægi, það þarf góðan stuðning og það þarf mikla ást. Ég get sko sagt ykkur það að Tumi er orðinn 7 vikna og hér er sko ekkert rimlarúm til – bara vagga sem hann sefur í á nóttunni og finnski pappakassinn sem nýtist á daginn. Hann á foreldra sem eru nú reynsluboltar, mömmu sem er á kvíðastillandi til að halda sér í jafnvægi og fullt af ást frá foreldrum sínum og bróður og við myndum sterkari tengsl sem fjölskylda með hverjum deginum sem líður.

Ég er að deila öllu þessu með ykkur til að hvetja ykkur sem eruð verðandi foreldrar eða í barneignahugleiðingum að kynna ykkur ný námskeið á vegum EIK Ráðgjöf. Ég vildi óska þess að þessi námskeið hefðu verið í boði fyrir mig á sínum tíma. Ég sem móðir er heilluð af hugmyndafræðinni á baki fræslunnar en þetta er einmitt allt sem ég hefði svo mikið þurft leiðsögn með á sínum tíma.

Eins og ég var búin að segja áður þá ætla ég að skrifa meira um mömmu hlutverkið hér á síðunni og mig langar að hvetja ykkur sem hafið áhuga á að lesa yfir spurningar og svör sem ég fékk að senda á hana Möttu sem er ein þeirra sem stendur á bakvið EIK Ráðgjöf sem mun bjóða uppá fræðandi námskeið fyrir foreldra og hefur nú þegar sett saman fyrsta námskeiðið þar sem fræðslan snýr að undirbúningi fyrir komu barns…

Hvað geta foreldrar átt von á að fræðast um á námskeiðinu?

Námskeiðið “Barnið komið heim, hvað svo?” er glænýtt og fyrst og fremst ætlað verðandi foreldrum með fyrsta barn en auðvitað eru allir velkomnir. Markmiðið er að varpa skýru ljósi á þá stórkostlegu vegferð sem hefst við fæðingu barns. Námskeiðið er bæði hagnýtt og skemmtilegt og fá verðandi foreldrar að takast á við raunhæf verkefni í umönnun barnsins. Samband og samskipti verðandi foreldra eru einnig í brennidepli þar sem ný hlutverk og breytingar geta óneitanlega verið fylgifiskar barneigna. Við undirbúning fyrir fæðingu barns horfa verðandi foreldrar gjarnan til veraldlegra hluta, svo sem að kaupa vöggu og fatnað. Þeir geta, að því er virðist, gleymt því að undirbúa samskiptin, nýja hlutverkið og sambandið. Farið verður yfir mikilvæg lagaleg atriði og þátttakendur fá lista með sér heim yfir hagnýt atriði er varða barnið og umönnun þess.
Námskeiðið okkar er frábær undirbúningur fyrir þá stórkostlegu vegferð sem hefst við fæðingu barns. Við trúum því að foreldrar séu betur í stakk búnir til að takast á við nýtt hlutverk af festu og öryggi hafi þeir haldgóða þekkingu á því sem framundan er. Almennt vilja allir verðandi foreldrar standa sig vel og námskeiðið veitir fólki upplýsingar og fjallar um hagnýt atriði sem vert er að hafa í huga.

Hverjir koma að fræðslunni á námskeiðinu og hver er þeirra menntun/reynsla?

Starfsmenn EIK ráðgjöf eru:
-Ingunn Ásta Sigmundsdóttir er 36 ára uppeldis- og menntunafræðingur og kennari og starfar sem kennari við unglingadeild Háteigsskóla í Reykjavík. Hún stundar mastersnám í foreldrafræðslu og uppeldisráðgjöf M.ed við Háskóla Íslands. Ingunn Ásta á þrjú börn sem eru fædd á árunum 2008, 2009 og 2011.
-Matthildur Jóhannsdóttir er 34 ára félagsráðgjafi. Matthildur lauk BA prófi í félagsráðgjöf árið 2012 og Mastersnámi til starfsréttinda MA árið 2014. Matthildur á þrjú börn sem eru fædd á árunum 2009, 2011 og 2014.

Afhverju ákváðuð þið að fara af stað með námskeiðið?

Við fæðingu barns getur ýmislegt gerst sem foreldrar eiga ekki endilega von á. Umönnun ungabarns getur verið verulega krefjandi á svo margan hátt um leið og þetta er eitt skemmtilegasta hlutverk sem fólki er falið lífinu. Að ala upp barn er mikil ábyrgð og geta foreldrar upplifað sig vanmáttuga í ákveðnum aðstæðum en okkar markmið er að undirbúa foreldra bæði fyrir umönnun barnsins og samskipti sín á milli. Með því að hafa aðgang að fræðslu og ráðgjöf um umönnun og uppeldi barnsins geta foreldrar leitað upplýsinga eða fengið stuðning til að takast á ábyrgan máta við aðtsæður, áður en allt er komið í óefni. Við hjá EIK viljum vera sá aðili sem fólk leitar til fyrst til að greina vanda og þörf fyrir ráðgjöf eða stuðning.

Er námskeiðið hugsað fyrir verðandi foreldra eða fræðslan líka nýst fólki sem er nú þegar foreldrar?

Námskeiðið er fyrst og fremst ætlað fyrir verðandi foreldra með fyrsta barn en að sjálfsögðu eru allir velkonir og það nýtist öllum sem standa í barneignum.

Hvert geta foreldrar sótt frekari upplýsingar eða spurst fyrir um námskeiðið?

Heimasíðan okkar er í vinnslu en allar upplýsingar er að finna á facebooksíðunni EIK ráðgjöf. Hægt er að bóka tíma í ráðgjöf og skrá sig á námskeið eikradgjof@gmail.com Þjónusta EIK ráðgjöf er tvíþætt, annars vegar að halda námskeið og hins vegar að veita fjölskyldu- og uppeldisráðgjöf. Námskeiðið Barnið komið heim, hvað svo? er fyrsta námskeiðið sem EIK ráðgjöf býður upp á og eru fleiri námskeið fyrir foreldra í vinnslu.

——

Mér finnst þetta alveg frábært framtak hjá þessum flottu konum og reynsluboltum á sínu sviði og ég get ekki annað en ímyndað mér að þær og þeirra fræðsla muni nýtast verðandi foreldrum vel. Hér eru á ferðinni konur með mikla reynslu og menntun á þessu sviði og ég á ekki von á öðru en að þær muni geta hjálpað mörgum. Ég vildi að það hefði verið í boði fyrir mig að sækja námskeið af þessari gerð þegar ég átti von á Tinna þá hefði ég ef til vill getað gert hlutina aðeins öðruvísi.

Ég get alla vega lofað ykkur því að það skiptir engu máli að eiga fullbúið barnaherbergi með öllu fyrir fæðingu fyrsta barnsins – það þarf foreldra í góðu andlegu jafnvægi sem eiga nóg af ást fyrir afkvæmin sín og auðvitað hvort annað***

EH

Jæja ég veit ég hljóma stundum eins og biluð plata en svona er ég bara og ég mun líklegast ekki berytast mikið á næstunni. Ég búin að uppgötva nýjan uppáhalds lit frá essie! Þegar ég skrifa uppáhalds þá meina ég að hann er nýr inná topp 20 listanum mínum yfir flottustu essie litina þar sem allir 20 litirnir eru í 1. sæti því ég get ekki gert uppá milli þeirra.

Má ég kynna ykkur fyrir Ladylike…

Ladylike frá essie

Ég veit ekki afhverju en ég hef bara aldrei verið neitt að missa mig yfir þessum lit með því að horfa á hann í glasinu það voru svo margir aðrir sem öskruðu á mig. Ég er þó kolfallin fyrir þessum grátóna nude bleika lit með þessum fallega glans, klassísku áferð og frábæru endingu. Liturinn var svona á nöglunum – pörfekt í 7 daga þar til ég braut eina nögl og ákvað þá að klippa þær allar, taka litinn af og næra þær með Grow Strong næringu frá essie.

Ég ætla að taka mér það leyfi og segja að þessi verði einn af trendlitum haustsins frá merkinu – hvað segið þið?

Fullkominn litur til að bæta á haustnaglalakka innkaupalistann – maður á aldrei of mörg lökk frá essie!

EH

Vöruna sem ég skrifa um hér keypti ég sjálf. Það hefur þó engin áhrif á álit mitt á vörunum og eins og alltaf veiti ég hreinskilið álit.

Þá er komið að eldri stráknum að debutera í sinni fyrstu sér dressfærslu en hann hefur áður fengið að deila sviðsljósinu með mömmu sinni. Með Tinnann minn þá hefur mér þótt alveg svakalega skemmtilegt að klæða hann í liti en mér finnst áberandi litir fara honum bara ofboðslega vel og strákamamman nýtur þess að kaupa föt í björtum litum eins og gulu og appelsínugulu. Við Tinni erum líka bara sammála um að þessir litir séu mjög fallegir og því hitti stjörnuflík þessarar færslu í mark þegar við fengum hana að gjöf – eða hann mér finnst peysan bara svo flott og ég vildi svo mikið ég gæti troðið mér í hana…

Peysa: Sailor Sweater frá As We Grow
Ein sú allra fallegasta flík sem ég hef séð. Gæðin frá þessu fallega íslenska merki eru auðvitað bara einstök og Tinni hefur átt þónokkrar flíkur frá merkinu. Ég tók strax ástfóstri við merkið og sem betur fer tók fólkið í kringum mig eftir því og Tinni hefur fengið flíkur að gjöf frá því en mamma og pabbi gáfu honum svakalega flotta peysu frá merkinu í jólagjöf fyrstu jólin hans Tinna. Þessi er alveg heil og með fallegum rúllukraga og í þessum æðislega appelsínugula lit. Gæðin eru til fyrirmyndar og Alpaca ullin heldur góðum hita á kroppnum hans án þess að honum verði of heitt.

Ljónaheilgalli: Pop Up Shop Petit.is
Það sést reyndar ekkert í hann en þetta er mest notaðasta flíkin í fataskápnum hans Tinna Snæs. Það er ekki bara litli strákurinn sem mamman vill helst að sé sem mest í heilgöllum en stóri elskar þennan. Það er alltaf fjör þegar hann fær að fara í ljónagallanum á leikskólann sem er sirka einu sinni í viku. Frábær flík því það þarf bara sokkabuxur og nærbol innanundir og svo skellum við bara svona fínni peysu yfir til að gefa honum meiri hlýju.

Superman derhúfa: H&M
Já maður getur ekki stjórnað öllu, þessi var keypt í Hollandi í sumar en valið stóð á milli Superman og Angry Birds – af tvennu illu finnst mér þessi þó skömminni skárri ;)

Þessi appelsínuguli litur var hluti af sumarlínu As We Grow en hún er nú komin í sjúkum haustlit – dökkbláum sem fæst m.a. inná Petit.is – HÉR.

Sem móðir mjög fjörugs drengs þá finnst mér mikilvægt að fötin hans þoli útileik og ég kaupi fáar flíkur sem ekki mega nota í leik og fjör úti. Þessi fína peysa þoli svo sannarlega ýmislegt en hún var mikið notuð í sumar og hefur alveg fengið að fara með í leikskólann. Mér finnst líka að börnum verði að líða vel í fötunum sem þau eru í og þegar Tinni biður um að fá að fara í þessa peysu þá segir það mér að hann sé mjög sáttur með hana.

Fyrsti í Tinnadressi – mér finnst þetta fagnaðarefni, hlakka til að sýna honum færsluna :)

EH

Þá er komið að annarri augnskuggapallettunni frá Yves Saint Laurent sem ég skrifa um og sýni ykkur hér á blogginu á stuttum tíma. Palletturnar eru báðar alveg óendanlega fallegar og litavalið er glæsilegt  – ég fæ bara smá gæsahúð af því að horfa á þær hlið við hlið. Ég bara dýrka þennan litasmekk sem Creative Directorinn hjá merkinu er allt í einu að sýna okkur því litirnir eru svo fallegir og svona við fyrstu sýn hugsa mögulega margir hvað er í gangi hér – en útkoman er alltaf skotheld eins og mig langar að sýna ykkur hér.

Ég sýndi ykkur s.s. haustpallettuna fyrir nokkrum dögum síðan þið finnið færsluna HÉR. Nú er komið að Black Opium pallettunni eða augnskuggapallettunni sem var sett saman í tilefni komu Black Opium eau de Toilette ilmsins en nú standa yfir YSL dagar í Hagkaup og komu ilmsins og Black Opium lúkksins er fagnað með 20% afslætti af öllum vörum frá YSL fram á miðvikudag.

Hér sjáið þið The Black Opium Look….!

Litirnir og áferðin á augnskuggunum er innblásin af ilminum sjálfum af flöskunni af tilfinningunum sem ilmurinn vekur. Mér fannst svakalega gaman að horfa á augnskuggana þegar ég opnaði pallettuna fyrst, virða þá fyrir mér og búa til förðunina í hausnum mínum. Hún kom jafnvel betur út en ég átti von á. Mér finnst alltaf gaman að vinna með þessa augnskugga því þá má nota bæði þurra eða blauta. Hér geri ég bæði en förðunina sýndi ég skref fyrir skref á Snapchatinu mínu – ernahrundrfj.

Umbúðirnar á ilminum eru auðvitað bara sjúkar og svipa til Parfum útgáfu ilmsins sem kom núna fyrir ári síðan á markað. Nema eau de Toilette ilmurinn er þakinn í bleiku glimmeri á meðan Parfum glasið er þakið í svörtu glimmeri. Svo er pallettan auðvitað í takt við þennan fallega ilm – þakin í æðislegu glimmeri!

Ég fékk lítið prufuglas af ilminum og hann er alveg æðislegur – algjört must test eintak. Ég var mjög hrifin af Parfum útgáfunni og hann er svona alveg svakalega flottur kvöld ilmur og það sem ég elska helst við hann er ilmurinn af bleika piparnum sem gefur svo sætan kryddangan. En ég sé klárlega fyrir mér að segja á mig eau de Toilette á morgnanna og krydda svo enn frekar ilminn með því að úða Parfum yfir hann fyrir kvöldið.

Ég vildi hafa áferð augnanna mjög dramatíska og seyðandi og þá gildir að blanda, blanda, blanda. Ég grunna fyrst augnlokið með uppáhalds augnskuggaprimernum sem er einmitt Couture Eye Primer í lit nr. 1 frá Yves Sain Laurent. Áður en hafist er handa á förðuninni þá þarf bara að leyfa honum að bíða í sirka 30 sek til að virkja hann almennilega. Mér finnst litirnir njóta sín betur með honum og það verður enn þægilegra að blanda augnskuggum á augnlokunum.

Hér sjáið þið augnskuggana og fyrir neðan nærmynd af augnförðuninni, ég ætla svona að reyna eftir bestu getu að segja ykkur hvernig ég gerði förðunina.

1. Eftir að primerinn fær tíma til að virka set ég brúngráa skuggann sem er efstur hér á myndinni í globus línuna. Ég set hann í miðja línuna og blanda honum fram og til baka í línunni með stórum blöndunarbursta (Setting Brush frá RT).
2. Svo tek ég ryð rauða litinn sem er hér neðst á myndinni og geri það sama og í fyrsta skrefinu – set litinn í línuna og blanda með Setting Brush. Svo hefst fjörið, með litlum og þéttum augnskuggabursta með stuttum hárum set ég nóg af augnskugganum í og spreyja svo fix+ frá MAC yfir burstann. Set augnskuggann í miðja globuslínuna, ég doppa augnskugganum þar og tek Setting Brush og blanda blanda blanda, þetta skref endurtók ég til að fá meiri dýpt.
3. Næst tók ég ljósbleika skuggann og setti hann á mitt aunglokið og með litlum blöndunarbursta Base Shadow Brush frá RT blandaði ég öllu saman.
4. Svo gerði ég meðfram neðri augnhárunum. Ég byrjaði á grábrúna litnum – setti hann uppvið augnhárin og blandaði og mýkti litinn með stórum blöndunarbursta. Tók svo ryðrauða litinn, setti yfir þann brúna og blanda blanda blanda.
5. Næst er það svo þessi svarti. Ég tók örlítið af honum og setti alveg yst á augnlokið með förðunarbursta með stuttum hárum. Ég setti bara smá punkt af honum og blandaði honum eiginlega bara á þeim stað bara til að fá smá dýpt í augnlokin.
6. Að lokum er það svo gyllti augnskugginn sem ég bleytti uppí með fix+ en ég setti hann yfir mitt augnlokið og í innri augnkrókinn og dró hann aðeins niður – en það er það sem mér finnst gera lúkkið pörfekt!
7. Svo er það bara eyeliner og nóg af þykkingarmaskara!

Ég er sko alveg ástfangin af þessari förðun þó ég segi sjálf frá. Það er um að gera að vera alls ekki hrædd við að nota liti. Ég er nú þegar komin með hugmynd af annarri förðun sem ég get gert með þessum augnskuggum sem er sko allt öðruvísi og það væri gaman að heyra frá ykkur hvort þið mynduð vilja sjá meira af þessari pallettu sem er þó eingöngu til í takmörkuðu upplagi.

Til að fullkomna enn frekar förðunina þá gætuð þið skellt augnhárum á augun til að gera innrömmun augnanna enn veglegri.

En verðum við ekki aðeins að kynnast ilminum betur. Opium er svona þessi ilmur sem við imvatnsáhugafólkið þekkjum vel. Nafnið er gert til að ögra og það er svo sannarlega að sjá á auglýsingunum þar sem tilfinningarnar sem ilmurinn á að vekja eru sannarlega á þeirri bylgjulengd. Eins og þið kannski munið eftir var relaunch á ilmvatninu fyrir um ári síðan en þá fékk ilmurinn fleiri fleiri nýja aðdáendur og hann fékk svona smá yfirhalningu sem er alltaf gaman. En þrátt fyrir endurbætur er haldið í upprunalegu gildi ilmsins og innblásturinn sem ég kann að meta. Þá kom eau de Parfum nú kemur eau de Toilette. Ilmurinn er miklu léttari en sá fyrri hann er sætur en um leið kryddaður, hann er dömulegur en samt með svo fallegum djúpum grunni.

Toppur:
Black Currant – Sítrus ávextir – Pera – Græn Mandarína

Hjarta:
Kaffi – Appelsínublóm – Te – Jasmín

Grunnur: 
Hvítur viður – Hvítt musk

Sjáið varirnar – finnst ykkur þær ekki extra djúsí. Hér nýtti ég tips frá Karen Sarahi með því að setja smá hyljara í miðjar varirnar. Ég setti smá af Touche Éclat gullpennanum í lit nr. 1 í miðjuna á efri og neðri vörunni og þannig ljóma ég miðju varanna upp svo varirnar virðast þrýstnari, hér er ég með Rouge Volupté varalit í lit nr. 1 þetta er uppáhalds varaliturinn minn frá YSL. Ég gerði ekkert meira en það!

Þó lúkkið sé dáldið Black Opium lúkk þá er það líka mikið Touche Éclat lúkk þar sem ég grunna húðina með Blur primernum, farðanum og gullpennanum sjálfum en allt eru það Touche Éclat vörur.

Minni á afsláttinn sem gildir af vörum frá YSL núna fram á miðvikudaginn næsta í Hagkaup Kringlunni, Smáralind og Holtagörðum. 20% afsláttur af öllum vörunum og ef þið kaupið fleiri en eina vöru fáið þið glæsilegan kaupauka. En ásamt pallettunni kom líka varalitur í Opium lúkkinu sem ég held að sé sannarlega þess virði að skoða betur ;)

EH

Vörurnar sem ég skrifa um hér fékk ég sendar sem sýnishorn. Það hefur þó engin áhrif á álit mitt á vörunum og eins og alltaf veiti ég hreinskilið álit.

Núna á þriðjudaginn tók ég skyndiákvörðun um að skella mér á Masterclass námskeið sem vinkonur mínar Sara og Silla í Reykjavík Makeup School stóðu á bavið. Það var hin glæsilega Karen Sarahi sem er betur þekkt undir nafninu @iluvsarahii á Instagram og er svakalega hæfileikaríkur makeup artisti frá LA. Ég lærði heilan helling og hef nú þegar prófað margt af því sem hún kenndi á námskeiðinu og mér líkar mjög vel við hennar aðferðir.

T.d. þá byrjar hún alltaf á því að móta augabrúnir – hún gerir ekkert áður hún setur ekki einu sinni rakakrem á húðina! Hún byrjar að móta þær í miðjunni, færir sig út að enda og færir sig svo smám saman innar. Eitthvað sem ég lærði svo allt öðruvísi en ég hef alltaf endað líka á augabrúnunum og byrja að móta þær frá fremsta hluta þeirra. Ég var satt að segja spenntust fyrir að prófa mig áfram með aðferðir hennar við mótun augabrúna og vara og ég er dolfallin og búin að breyta mínum venjum strax á þessum örfáu dögum!

En þið finnið augabrúna sýnikennslu a la Karen Sarahi inná snappinu mínu @ernahrundrfj og eftir helgi ætla ég að taka fyrir varirnar.

En ég var með myndavélina á lofti allt námskeiðið og reyndi að fanga skemmtileg augnablik sem mig langar að deila með ykkur. Maður getur sko alltaf lært eitthvað nýtt og það er sannarlega nauðsynlegt fyrir förðunarfræðinga að uppfæra tæknina sína og vera opnar fyrir nýjum aðferðum því tískan breytist sífellt og það er um að gera að kunna sem mest.

Njótið myndanna!

Hér sjáið þið svo þessar stórglæsilegu dömur sem stóðu fyrir námskeiðinu – Karen Sarahi, Silla og Sara ásamt fyrirsætunum Kristínu Evu og Tönju Ýr!

Stjarna kvöldsins ásamt henni Karen var svo sannarlega Fix+ spreyið frá MAC. Mikið fannst mér gaman að sjá þarna að hún elskar þessa æðislegu vöru jafn mikið og ég. Enda er þetta vara sem er uppáhalds uppáhalds uppáhalds frá MAC hjá mér og ofnotuð sem þið sem fylgist með mér á snappinu vitið ;)

Takk kærlega fyrir mig elsku Sara og Silla – þetta var svo flott hjá ykkur og þið megið svo sannarlega vera motnar af þessu frábæra námskeiði. Ég get ekki beðið eftir því næsta, þið látið mig bara vita hvar ég á að skrá mig ;)

EH

Titill færslunnar lesist eins og hillbilly ameríkani… – bara svona uppa fjörið og til að fá smá bros yfir andlitið. Svona bros eins og ég var með á andlitinu í allan dag því þessir skór slá bara næstum öll met þegar kemur að fegurð og þægindum – að sjálfsögðu hönnun Camillu Pihl fyrir Bianco…!

Ég hef nú aldrei falið aðdáun mína á norska bloggaranum Camillu Pihl en ég uppgötvaði bloggið hennar þegar fyrsta skólínan sem hún gerði með Bianco kom í sölu hér á Íslandi fyrir ári síðan. Það var svona ást við fyrstu sýn, stíllinn hennar Camillu er sá sem heillar og sjálfsagt vegna þess að hann er svipaður mínum eigin og því ekki skrítið að ég heillist svona af henni. Eins og þið sáuð hjá mér í síðustu viku var nýja skólínan hennar að koma út og er nú komin í sölu í Bianco á Íslandi. Það komu samtals fjórar týpur af skóm frá henni. Hér sjáið þið eitt þeirra up close…. Já myndirnar eru uppstilltar – einu sinni geymdi ég reyndar skó inní eldhússkápunum mínum því það var ekki pláss neins staðar annars staðar en ég geymi þá bara núna inní fataskáp en ekki uppí bókahillu ;)

Leðrið í skónnum er alveg sjúkt! Svo áferðafallegt og mjúkt ég bara bilast þegar ég strýk yfir þá. Ég sýndi einmitt dress dagsins á snappinu mínu í dag þar sem ég paraði þessi fallegu ökklastígvél við PU buxur sem ég á úr Vero Moda, áferðin er svona svipuð útlits á buxunum og skónnum svo heildarlúkkið kom alveg svakalega vel út.

Ég er búin að læra það af henni Elísabetu minni sem á Bianco að hugsa alveg sérstaklega vel um skónna mína og pússa leðrið reglulega og verja skónna vel. Áður en ég fór í þeim út voru þessir pússaðir og spreyjaðir bara svona til að þeir væru alveg pörfekt. Þetta eru held ég fallegustu svörtu ökklastígvél sem ég hef séð og maður þarf klárlega að eiga ein svona í skóskápnum. Svo á ég þau með crock áferðinni í svörtu – þau sem komu í línunni í fyrra. Svo nú á ég ein slétt og ein með áferð – held ég sé ansi vel sett fyrir veturinn.

Hællinn er í fullkominni hæð – bara svona smá upphækkun sem lengir löppina og setur fallega svip á þá og heildarlúkk skónna. Annað smáatriði sem ég elska er V lögunin á teygjunni á skónnum – ég man ekki eftir að hafa séð svona en þetta gerir líka mikið fyrir skónna.

En svo ég haldi nú áfram að lofsyngja skónna þá verð ég að bæta við að þeir eru sjúklega þægilegir! Þeir verða mikið notaðir á næstunni.

Takk fyrir mig Camilla Pihl – þú og þín hönnun hefur sannarlega fegrað skóskápinn minn***

EH

Eins og ég hef áður skrifað um þá er það fastur punktur á árinu hjá mér þegar sumarilmurinn frá Escada mætir á markaðinn. Sumarilmirnir njóta gríðarlegra vinsælda hér á landi og ég þekki margar dömur sem missa aldrei af honum – þar á meðal er ég sjálf.

En merkið býður líka uppá fleiri ilmvötn en þetta sem kemur einu sinni á ári í takmörkuðu upplagi eins og ilmurinn Joyful. En nú er nýlega kominn nýr ilmur sem heitir Joyful Moments og er líka framleiddur í takmörkuðu uoolagi. Þessi ilmur er sá sem hentar mér best af Joyful ilmunum – hann er svona mátulega sætur, sannarlega frískandi og silkimjúkur áferðar.

Glasið sjálft einkennist af fallegum fjólubláum lit sem er ofboðslega mjúkur og endurspeglar ilminn. Allt passar þetta svakalega vel saman. Joyful glasið er mjög kvenlegt og á því sjáið þið tvöfalda E logoið sem var hannað af stofnanda Escada, Margaretha Ley sem situr á tappa ilmvatnsflöskunnar.

Eins og fyrir aðra Joyful ilmi er það fyrirsætan Miranda Kerr sem er andlit hans. Hún er valin andlit ilmanna því eins og þeir þá nálgast hún lífið af jákvæðni, hún hefur mikið frumkvæði og sjálfstraust og er því sannarlega flottur fulltrúi fyrir þennan jákvæða ilm.

Ilmurinn sjálfur er byggður upp á þessum þremur stigum sem þið ættuð að fara að kannast við frá skrifum mínum um ilmvötn.

Topp nótur:
Blackcurant Sorbet – Lychee – mandarína

Hjarta nótur:
Lauf Fjólunnar – Damascus Rós – bleik Bóndarós

Grunn nótur:
Honeycomb – vanilla

Mér finnst mjög skemmtilegt að Joyful ilmirnir eru byggðir í kringum hjarta ilmsins þennan dásamlega blómvönd sem situr þar. Topp nóturnar opna ilminn, vekja forvitni færir okkur inní þetta mjúka og fallega hjarta og svo taka grunn nóturnar við sem mýkja ilminn og gefa honum smá dýpt. Grunn nóturnar eru þó þannig að þær gera ilminn alls ekki mjúkan þær halda honum léttum en gefa honum samt fallegan grunn og enda.

Joyful Moments lifir sannarlega upp til nafns síns því sælu tilfinningarnar sem fara um mann þegar maður finnur ilminn fær mann svo sannarlega til að hugsa um gleðirík augnablik lífsins.

Frábær ilmur fyrir þær sem elska ilmina frá Escada og vilja fá ljúfan og fallegan ilm fyrir haustið.

EH

Vörurna sem ég skrifa um hér fékk ég senda sem sýnishorn. Það hefur þó engin áhrif á álit mitt á vörunum og eins og alltaf veiti ég hreinskilið álit.

Mér fannst yndislegt að heyra hvað margar voru ánægðar með þá ákvörðun mína að deila aðeins meira mömmutengdu efni inná bloggið mitt. Fyrsta dressið hans Tuma vakti mikla lukku meðal annarra mæðra drengja og greinilegt að margir eru í sömu pælingum og ég með það hvað það sé lítið úrval af fötum á drengi.

Svo við Tumi ákváðum að skella strax í annarri dressmyndatöku – eða mamman ákvað það, litli herramaðurinn var ekkert alveg til í að pósa neitt of mikið.

Heilgalli: Mini Rodini frá Petit.is
Teppi: Huxbaby frá Petit.is
Babynest: Babynest Originalet frá Petit.is

Á þessu heimili er Babynestið ómissandi, það er ekkert notað jafn mikið og ég skil ekki hvernig ég komst af án þess að eiga það með Tinna Snæ. Það er svo kósý og dásamlegt og svo þess virði. Mér finnst persónulega þessi heimagerðu hreiður ekki falleg fyrir utan það að gæðin eru ekki jafn mikil og í þessum upprunalegu sem er gert úr svaka flottum efnum og það er endurvinnanlegt.

Plústeppið fangaði athygli mína frá því ég sá það fyrst og ég var alveg búin að ákveða að kaupa það fyrir Tuma en það er líka í stíl við rúmteppið okkar Aðalsteins. Það er svo fallegt og mjúkt og svo kósý að vefja litla stubb inní það.

Þennan dásamlega heilgalla fékk Tumi svo í sængurgjöf frá Linneu minni og við erum svoleiðis í skýjunum með hann. Tumi fékk líka köngla heilgalla í sængurjgöf frá Tinycottons sem ég sýndi einmitt á Instagram um daginn en það yndislega fatamerki fáið þið líka í Petit.is sem er klárlega uppáhalds barnavöruverslun okkar fjölskyldunnar og ég meina það heilshugar!

Nú er maður orðinn sex vikna gamall og mér finnst alveg dásamlegt að fá að eyða meiri og meiri tíma með honum á hverjum einasta degi. Eins og þið sjáið þá er snúllinn að jafna sig á hormónabólunum en mér finnst það svo sætt hann var eins og unglingur hér í nokkra daga en þetta er allt að koma. Það sem mömmunni finnst þó erfiðast við þær er þurrkurinn sem fylgir en þá er mikilvægt að bera gott rakakrem á húðina og ég valdi alltaf vörurnar frá Eucerin fyrir Tinna Snæ svo ég held því áfram. Svo er það líka alltaf kókosolían í baðið hjá honum þá verður húðin svo mjúk og vel nærð!

Að eiga mömmu sem er endalaust að taka myndir af sér getur stundum verið alveg mjög erfitt!

Ég mæli heilshugar með heilgöllum fyrir svona litla strumpa og mér finnst alveg fínt úrval af þeim núna – miklu meira en ég sá þegar Tinni Snær var svona lítill. Mér finnst bara svo þægilegt að klæða hann bara í eina flík, ekkert mál þegar þarf að skipta á bleyju og þetta eru svona kósý heimagallar. Ég á tvo úr Petit og svo tvo úr Lindex og þessir heilgallar eru í langmestri notkun af flíkum hér á heimilinu fyrir Tuma.

Næst fær svo stóri strákurinn dressfærslu en ég þarf endilega að sýna ykkur æðislega pollagallann sem ég var að kaupa fyrir hann!

EH

Síðustu ár hefur það verið fastur liður hjá mér að styðja við átakið Á Allra Vörum, mér finnst alltaf nauðsynlegt að styðja við mikilvæg málefni þegar ég hef tök á og mér finnst ekki síðra að styrkja svona frábært framtak hjá duglegum og kraftmiklum konum sem dömurnar á bakvið Á Allra Vörum hafa svo sannarlega sýnt okkur að þær séu.

Í ár er að sjálfsögðu hægt að styðja við málefnið með kaup á fallegum snyrtivörum fyrir varirnar og í ár eru það varalitur og varagloss frá merkinu Benecos. Ég og synirnir skelltum okkur í innkaupaleiðangur um daginn og Tinni valdi með mér þessa fallegu liti.

 Árið 2015 – Barist fyrir bættum samskiptum meðal barna og unglinga. Erindi og Á allra vörum taka höndum saman og ætla að koma á laggirnar samskiptasetri fyrir þá sem glíma við einelti, foreldra og fjölskyldur þeirra. 

Ég valdi varaparið í fallegum rósalit, varaliturinn heitir Pink Rose og glossinn heitir Rose. Á myndunum hef ég sett báðar vörurnar saman. Ég byrja á því að móta varirnar með varalitnum og varapensli, þek svo varirnar vel með litnum og set glossinn á miðja efri vör og miðja neðri vör. Þannig fær miðja varanna fallegan ljóma, þær draga að sér meiri athygli og þær verða þrýstnari. Svona skemmtileg leið til að nota báðar vörurnar saman. En svo njóta þær sín að sjálfsögðu líka mjög vel einar og sér.

Ég verð að segja að ég er sérstaklega hrifin af litnum á glossinum. Sanseringin er mjög falleg og mjúk og varirnar fá virkilega fallegan ljóma.

Sem móðir tengi ég mjög sterkt við átakið í ár, mér finnst ég reyndar alltaf ná að tengja við málefnin sem þessar flottu konur, þær Gróa, Elísabet og Guðný, beina spjótum sínum að. Þær velja málefnin af svo mikilli vandvirkni og leggja mikla vinnu í að rannsaka þau og finna sem bestu leiðirnar til að láta til sín taka og til að breyta þeim á betri veg og þær einhvern vegin hjálpa okkur að hjálpa þeim sem þurfa á hjálp að halda.

Sem foreldri get ég hvorki ímyndað mér það að barnið mitt gæti orðið fórnarlamb eineltis eða gerandi. Ég hef það að leiðarljósi í uppeldi strákanna minna að kenna þeim muninn á réttu og röngu, að kenna þeim það að það séu ekki allir eins, að kenna þeim það að vera góðir við alla í kringum sig og að bera virðingu fyrir öllum. Ég finn það nú strax þó Tinni sé bara rétt að skríða í 3 ára aldur hvað það er mikilvægt að eiga góð samskipti við hann og við fólkið í kringum hann, við fjölskyldur okkar Aðalsteins, við yndislega starfsfólkið á leiksskólanum hans Tinna – það skiptir máli að skilaboðin sem fara til hans varðandi samskipti hans við aðra séu rétt og að þau séu þau sömu frá okkur öllum.

Ég grét þegar ég sá auglýsingu Á Allra Vörum í fyrsta skipti, ég grét jafn sárt þegar ég sá hana í annað sinn, það þriðja, það fjórða, það fimmta og öll önnur skipti. Ég get ekki með neinu móti sett mig í spor móður afmælisdrengsins sem þarf að útskýra fyrir barninu sínu, manneskjnunni sem við mæðurnar elskum meira en allt annað í heiminum afhverju enginn kom í afmælið hans. Að hugsa sér að þetta sé aðeins ein af alltof mörgum birtingarmyndum eineltis finnst mér hryllingur, að hugsa sér að einelti geti banað saklausum einstaklingi er hryllingur en að taka ekki af skarið og standa upp á móti því, að taka ekki þátt í að fræða að betrumbæta og kenna betri siði og hegðun finnst mér jafnvel verra. Einelti er ógeð, í hvaða formi sem það er, gangvart hverjum sem það er það á ekki að líðast og ég skora á alla þá sem geta lagt sitt af mörkum að gera það.

Getum við tekið höndum saman öll sem eitt og sett það sem markmið að útrýma einelti. Ég hef trú á því að það sé hægt ef viljinn er fyrir hendi þá er allt hægt.

Á Allra Vörum er að vinna söfnunina með Erindi….

„Erindi eru samtök fagfólks á sviði uppeldis-, lýðheilsu- og menntunarfræða og hafa það hlutverk að miðla fræðslu og skapa almenna umræðu um málefni sem varða hag barna og ungmenna á öllum skólastigum. Markmið Erindis er að opna samskiptasetur þar sem aðstandendur í eineltismálum geta fengið ráðgjöf og þjónustu frá fagaðilum.“

Inná heimasíðunni erindi.is verður svo að finna fræðsluefni fyrir foreldra, börn og skóla og ég mun fylgjast spennt með framgangi mála og lesa mér til um hvernig ég get frætt barnið mitt betur.

Frábært framtak – áfram Á Allra Vörum og Erindi – niður með Einelti!

Inná heimasíðu Á Allra Vörum getið þið svo séð hvernig þið getið styrkt þetta flotta málefni, ein leið er að kaupa fallegan varalit og gloss eins og ég.

EH