Trendnet

Ég veit ekki með ykkur en kuldinn fer ótrúlega illa með hendurnar mínar. Sama þó ég reyni að vera með vettlinga þá þorna hendurnar mínar alveg svakalega. Ég nota mikið handáburði og mig langaði að segja ykkur frá þeim og afhverju þeir eru í uppáhaldi. Ég stalst til að nota krítartöfluna niðrá skrifstofu svo myndin yrði aðeins líflegri og öðruvísi!

1. Hand Lotion Morroccan Tea frá & Other Stories – þessi handáburður ilmar svo ótrúlega vel. Þennan er ég með heima og set á mig fyrir svefninn á meðan ég er með annan hinna á skrifstofunni og svo hinn í töskunni. Ég er vel dekkuð þegar kemur að handáburðum. Ég elska umbúðirnar utan um þennan handáburð sem er líka ótrúlega drjúgur, hálf pumpa er alveg nóg.
2. Græðir frá Sóley Organics – þennan handáburð dýrka ég, mér finnst hann raunverulega vinna í því að efla rakamyndun í húðinni minni. Hann hefur mjög róandi áhrif á húðina og er með léttum ilm sem ég efast um að muni erta neinn.
3. Fast Absorbing Hand Cream frá Neutragena – húðvörurnar með norska fánanum ættu margir að kannast við. Ég man eftir kremum frá merkinu síðan ég var pínulítil. Ég hef alltaf verið hrifin af þessum vörum og ég vildi að það væri meira úrval af þeim. Þennan handáburð nota ég ef ég er með mjög slæman þurrk sem veldur mér óþægindum – sem mig svíður í. Þessi hefur samstundis róandi áhrif á húðina því hann smýgur svo hratt inní húðina.

Þessir þrír eru æðislegir. Eina sem er leiðinlegt kannski við þessa færslu er að einn handáburðurinn er ekki fáanlegur hér á Íslandi. En ef þið komist í & Other Stories verslun þá mæli ég með að þið lítið við í snyrtivörudeildinni. Vörurnar þeirra hafa komið mér mikið á óvart.

Þetta eru þær vörur sem redda mínum handaþurrki – ég vona að þessi færsla geti kannski nýst þeim sem eru í sömu sporum og ég :)

EH

Afmælisdagurinn í gær var fullkominn í alla staði. Dagurinn byrjaði á góðu knúsi og kúri með strákunum mínum og á eftir fylgdi skál full af Coco Puffs ásamt pökkum frá þremenningunum – unnustanum, syninum og kisunni.

Eftir hádegi mættu svo nánasta fjölskylda og góðir vinir í afmælisbrunch sem heppnaðist líka bara svona vel. Restinni af deginum var svo eytt fyrir framan sjónvarpið með osta og rauðvínsglas – eftir að Tinni Snær var sofnaður að sjálfsögðu ;)

Mig langaði að deila með ykkur broti af því sem leyndist inní pökkunum fallegu…

Unnustinn les bloggið greinilega vel og gaf mér þessa dýrindis hálsfesti frá Second Female sem hann fékk í MAIA á Laugaveginum en ég skrifaði um hana ásamt fleiri vörum úr nýjustu línunni frá þeim núna í haust.

Einkasonurinn gaf mömmu sinni allan heiminn – mig hefur lengi langað í hnött og þennan fundu þeir feðgar í My Concept Store.

Hér sjáið þið svo veglega brunchinn – þetta tókst okkur parinu að gera alveg sjálf fyrir 25 manns! Tengdó kom þó færandi hendi með þessa dýrindis köku og tengdapabbi mætti svo með fleiri pönnukökur.

mmmm… hvað þetta var gott og þetta verður gert aftur sem fyrst!

Mágkona mín mætti með frumlegasta og flottasta innpökkunarpappírinn!

Amma mín og afi misstu sig smá í gleðinni enda fengu þau þakkarsímtal um leið og pakkinn hafði verið opnaður. Þessi fjögur fallegu iitala glös komu uppúr pakkanum þeirra. En ég hafði nefnt við þau að mig langaði að safna minni týpunni af þessum glösum en fyrir eigum við sett af fjórum af stærri týpunni. Ég þurfti því ekki að safna lengi þó svo mig langi mikið í fleiri… – hint fyrir jólagjafir ;)

Dásamlegir kertastjakar frá Kahler komu uppúr pakkanum frá mömmu og pabba og góðum vinum – þessir fást í Hrím. Ég er nokkuð skotin í þeim.

Frændi minn mætti með Moomin jólabollann sem er nýkominn í verslanir – hann vissi sko ekki af því að ég er að safna bollunum og að þessi væri á næstur á innkaupalistanum. Gjöfin hitti beint í mark og nú á undirrituð að mig minnir 12 bolla eða 11 – skelli í færslu með safninu innan skamms.Önnur mágkona mín mætti með fyrsta iitala kertastjakann minn – ég er vel búin kertastjökum fyrir haustið og er nú þegar búin að koma fyrir kerti í þessum og tilla honum í eina af gluggakistunum mínum.

Loksins – Jón í lit! Æskuvinkonurnar glöddu mig mikið með þessum fallega grip sem ég hlakka til að finna stað á heimilinu.

Bambinn kom uppúr pakkanum frá mömmu og pabba og þessi dýrindis dúkur er frá tengdaforeldrunum. Fallega taskan er úr Aurum og er frá hinni smekklegu mágkonunni minni.

Þesso flotta Mía fylgdi töskunni hér fyrir ofan – mig hefur lengi langað í þessa en ég elska allt moomin sem kannski einhverjir hafa tekið eftir. Það hefði held ég komið fáum á óvart ef sonurinn hefði fengið nafnið Snabbi, Snúður eða jafnvel Múmínsnáðinn….

Svo var það þessi fallegi blómavasi frá Bloomingville sem fæst í Hrím – Basilíkuplanta heimilisins situr nú enn fallegri í þessum potti útí glugga. Ég komst að því að bróðir minn er bara virkilega smekklegur í gjafavali eftir allt saman – það eða hann valdi sér hárrétta kærustu!

Það að eiga þennan litla polla gerði daginn minn fullkominn í alla staði – yndislegi strákurinn minn <3

Takk allir fyrir að gera daginn minn fullkominn í alla staði – hlakka nú þegar til að halda uppá næsta afmæli sem verður afmæli sonarins. Rosalega er tíminn fljótur að líða – mér finnst eins og ég hafi eignast hann í gær.

EH

Ég er að missa mig úr spenningi – línan er væntanleg í MAC Kringlunni klukkan 19:00 annað kvöld. Línan er vægast sagt geðveik og ég mun mæta ótrúlega spennt inní Kringlu á morgun vopnuð myndavélinni. Ég hef fjallað um vörurnar úr línunni áður – HÉR endilega kíkið á þær og sjáið hvort það sé ekki einhver vara sem ykkur finnst spennandi. 

Ef þið girnist eitthvað úr línunni þá er ég nokkuð viss um að þið verðið að mæta annað kvöld til að tryggja ykkur vörurnar ;)

EH

Dagurinn í dag er búinn að vera fullkominn í alla staði – ég vaknaði einu ári eldri. Fyrsti afmælisdagurinn sem mamma var frábær. Að vera mamma gerir lífið eitthvað svo mikið yndislegra, ég veit ekki hvað það er. Við buðum nánustu í brunch eftir hádegi og áttum yndislega stund með þeim.

Hér erum við mæðginin í fullu fjöri – Tinni Snær var ótrúlega hress og teymdi alla um íbúðina með sér á meðan hann laumaði sér í bita af öllum diskum. Ég er viss um að barnið hafi borðað heila melónu í þokkabót!

Fjölskyldan mín þekkir mig ótrúlega vel og um 80% af pökkunum komu úr uppáhalds búðinni – Hrím. Ég fékk svo mikið fallegt og er svo þakklát fyrir þetta yndislega fólk mitt.

Ég sýni ykkur innihald gjafanna seinna – núna ætla ég að njóta þess sem eftir er af deginum með strákunum mínum.

Takk allir þeir sem eru búnir að senda mér afmæliskveðjur – það er svo dýrmætt að eiga góða að sem kunna að gleðja mann með fallegum orðum***

EH – einu ári eldri og vitrari!

Ég var svo uppi með mér þegar ég fékk símtal á síðasta mánudag frá henni Marín Möndu sem sér um Lífið sem fylgir Fréttablaðinu á föstudögum. Hún bauð mér að koma í viðtal sem ég þáði með þökkum og svo skaut hún því inní lokin að hún væri að hugsa um að þetta yrði forsíðuviðtal. Ég fékk samstundis fiðring í magann, aldrei átti ég von á því að fá slíkan heiður.

Ég hef oft farið í svona styttri viðtöl og rætt um hvað mér finnst að konur ættu að eiga þegar kemur að snyrtivörum og gefið góð ráð en þetta viðtal er mun persónulegra en nokkuð sem ég hef farið í áður. Mér fannst það ótrúlega gaman og frábært tækifæri til að fá aðeins að koma sínum skoðunum á framfæri og gefa lesendum mínum (ykkur) tækifæri á að kynnast mér betur. Ég tala ekki bara um blaðið heldur líka aðeins hver hugsunin á baksvið slitopinberunina mína var – ef þið hafið ekki séð hana þá finnið þið færlsuna HÉR. Ég hvet ykkur til að lesa viðtalið en þið sjáið það hér – LÍFIÐ – ef þið eruð búnin að lesa viðtalið þá megið þið endilega segja mér hvað ykkur fannst.

Mig langar líka að þakka GK Reykjavík kærlega fyrir lánið á fötunum sem ég var í á forsíðunni!

HÉR getið þið séð viðtalið inná Lífinu á Vísir.is og HÉR getið þið séð baksviðs myndir úr forsíðumyndatökunni þar sem við Marín skreyttum meðal annars krítartöflu til að lífga uppá bakgrunninn:)Ég er þó ekki eini fjölskyldumeðlimurinn sem endaði í fjölmiðlum þessa vikuna en sonurinn er umfjöllunarefni í nýjasta tölublaði Vikunnar – ég hvet ykkur til að lesa um Sjarmörinn í Eymundsson öðru nafni Tinni Snær. En við rákumst á hana Guðríði, blaðamann Vikunnar, sem var í sólarhringsferð á Akureyri en þangað ferðaðist hún í strætó og umfjöllunin hennar um ferðina er mjög skemmtileg:)Takk kærlega fyrir mig Marín og Lífið***

EH

Ég er í svo langan tíma búin að horfa hugfangin á flíkurnar frá barnafatamerkinu As We Grow í Mýrinni og MAIA… Núna um daginn fékk Tinni sett frá þeim að gjöf svo ég fékk loksins að prófa þau og mamman varð ekki fyrir vonbrigðum. Ég er aðeins búin að vera að kynna mér vörurnar frá merkinu og söguna á bakvið það og ég er vægast sagt heilluð.

Hér er hann með húfu og trefil frá As We Grow og á myndinni fyrir neðan er hann í afasetti frá þeim – bol og buxum. Hrikalega kjút – mér finnst brúni liturinn og þessi lime græni fara svo vel saman.Tinni er búinn að nota fötin nánast uppá dag síðan hann fékk þau – ég læt hann alltaf sofa úti í vagni í þeim og í fyrsta sinn er hann ekki að koma inn kófsveittur úr lúrnum hann er bara voða passlegur.

As We Grow er barnfatamerki sem er í eigu Grétu Hlöðversdóttur sem er lögfræðingur og svo hönnuðanna Guðrúnar Rögnu Sigurjónsdóttur og Maríu Th Ólafsdóttur. Hugmyndin á bakvið merkið er að skapa eigulegar og vandaðar flíkur sem lifa áfram og berast á milli kynslóða. Þannig skapar flíkin sér sína eigin sögu og tilfinningagildið eykst. Mér finnst þetta yndisleg hugsun. Sjálf er ég ótrúlega heppin að eiga ömmu sem átti 4 stráka og geymdi öll fallegu fötin þeirra. Bróðir minn, sem er eina barnabarnið hennar sem er strákur, fékk þau lánuð og nú 21 ári seinna fæddist næsti strákurinn í fjölskyldunni – hann Tinni Snær. Hann er næstur á listanum yfir að fá fötin lánuð. Mér finnst líka frábært að búa til flíkur sem er hægt að endurnýta. Stundum þarf maður ekki alltaf að kaupa eitthvað nýtt.

Fötin frá As We Grow eru úr Alpaca ull sem koma af lamadýrum sem búa hátt uppí fjöllum Perú. Ullin er ótrúlega mjúk og hlý og nær að halda jöfnu hitastigi á líkamanum. Lamadýrin búa við mjög ójafnt hitastig það er bæði mjög kalt hjá þeim og mjög heitt en ullin heldur jafnværi á þeirra hitastiga í gegnum allar þessar breytingar. Eins og ég segi hér fyrir ofan þá var Tinni alltaf að koma kófsveittur inn úr lúrnum sínum, ég var bara alltaf með hann í ullarnærfötum og svo var hann í svefnpoka – hann er enn í svefnpokanum en fötin hafa breyst og ég finn mikinn mun á honum. Ég trúi því bara líka að honum líði miklu betur þarna úti – nái að sofa vel.

Ef þið hafið ekki heyrt um þessi föt þá ættuð þið samt kannski að hafa rekið augun í þessa peysu sem er einmitt signature peysan frá As We Grow…Mér finnst þessi alveg einstök og það sem mér finnst gaman við flíkurnar frá merkinu er að þær eru engum öðrum líkar, þær eru alveg einstakar. As We Grow hefur verið að vekja mikla lukku í Noregi en Norðmenn eru nú mikil útivistarþjóð sem við ættum að taka okkur til fyrirmyndar þegar kemur að klæðnaði. Þeir eru mjög hrifnir af Alpaca ull og í gegnum þær hjá As We Grow hef ég uppgötvað nýtt blogg sem norsk mamma heldur úti – ég þarf að segja ykkur betur frá því síðar. En hún er mjög hrifin af þessu íslenska merki. Mér finnst alltaf svo ánægjulegt þegar íslendingum gengur vel erlendis.

Hér fyrir neðan sjáið þið myndir af línunni sem er í sölu núna en vörurnar fást í verslununum MAIA, Mýrin og Rammagerðinni í Reykjavík.
Efst á óskalistanum fyrir soninn er bláa kápan en hana var ég búin að sjá þegar línan kom fyrst í búðir og bölvaði því að geta ekki keypt hana á strákinn. Þangað til ég rak svo augun á myndina af þessum fallega dreng sem er í kápunni – nú er hún komin á innkaupalistann ásamt rauða afadressinu og einni signature peysu. Ég hvet ykkur til að fylgjast með þeim á Instagram undir @aswegrow en þar birtast fullt af skemmtilegum myndum af krökkum í flíkunum og hugmyndir af fallegum fatasamsetningum. Ég fékk að sjá brot af næstu línunni þeirra sem er virkilega skemmtileg og þar eru fullt af nýjum flíkum.

Þetta eru svo eigulegar flíkur og ég sé fyrir mér að fötin hans Tinna muni vonandi ganga á milli barna í fjölskyldunni og skapa sér sína sögu.

Húðumhirða er eitthvað sem ég hef reynt að fjalla reglulega um með því að segja ykkur frá mínum uppáhalds snyrtivörum. Ég hef áður farið létt yfir það bara í texta hvernig á að þrífa húðina – hver eru svona þessi helstu atriði sem þarf að hugsa um. Ég ákvað að gera smá videoumfjöllun um húðumhirðu sem ég vona svo sannarlega að hjálpi ykkur.

Ég valdi það að nota Garnier vörurnar í myndbandið af því þær eru svo einfaldar í notkun. Þær eru líka á ótrúlega góðu verði sem allir ættu að ráða við.

Ég fer yfir þessi grunnatriði í myndbandinu en svo að sjálfsögðu geta ýmsir aðrir hluti bæst við í ferlið eins og serum, augnkrem og fleiri vörur en það fær að bíða betri tíma og það er von á fleiri myndböndum. Ég er líka búin að gera myndband þar sem ég fer yfir nokkrar góðar vörur fyrir þá sem eru með erfiða og olíumikla húð – en það er einmitt sú tegund húðar sem getur verið erfitt og tímafrekt að koma í jafnvægi.

Hér sjáið þið vörurnar sem ég sýndi í myndbandinu:

Frá vinstri eru þetta:

• Nordic Essentials Sensitive Eye Make-up Remover
• Nordic Essentials Refreshing Cleansing Milk
• Nordic Essentials 24h Moisturising Day Cream
• Nordic Essentials Refreshing Cleansing Gel
• Miracle Skin Perfector BB Cream
• Nordic Essentials Refreshing Vitaminized Toner
• Nordic Essentials 25 Ultra Cleansing Wipes

Ég vona að þið gefið ykkur sem flestar tíma í að horfa á myndbandið – því eins og ég segi í lok þess þá er undirstaða fallegrar förðunar heilbrigð og vel nærð húð.

EH

Þegar ég ákvað að gefa út Reykjavík Makeup Journal ákvað ég að reyna að breyta smá áherslunum sem eru á snyrtivörunýjungar í íslenskum fjölmiðlum – reyna að hafa allt jafnt í bland þar sem það nýjasta er ekkert endilega betra en það gamla góða. En ég ákvað þó að hafa fastan lið í blaðinu þar sem ég tæki fyrir eina nýjung sem mér litist vel á hjá sem flestum merkjum og fjallaði um hana. Ein af þeim er ilmur sem er í miklu uppáhaldi hjá mér núna og heitir Elixir og er frá Escada.

Ég er alveg húkkt á sumarilmunum frá Escada en þeir eru líka með línu af ilmvötnum sem heitir Especially Escada. Elixir bætist við þá línu en hann er mun dýpri en þeir sem hafa verið fáanlegir á undan en ilmurinn er Eau de Parfume – þeir ilmir endast lengur á húðinni. Especially Escada ilmirnir eru ilmir sem eru byggðir á ferskum blómum, Elixir ilmurinn sker sig þó frá hinum þar sem hann er sterkari.

Það eru austrænar rósir frá Tyrklandi sem einkenna Elixir. Ilmurinn samanstendur af öflugu rósaseyði sem blandast austrænum tónum og þannig öðlast ilmurinn meiri þéttleika. Ambretta seeds ýta undir rósatóninn og moskutónninn gerir ilminn að fullkomnum kvöldilm. Í grunninn er það svo vanilla frá Madagaskar, ávaktakeimur frá plómu og sveskju ásamt amburtónum og patchouli.

Bleiki liturinn á ilmvatninu sjálfu er það sem einkennir helst umbúðir ilmsins en einnig er tappinn svolítið skemmtilegur þar sem logo Escada nýtur sín. En stofnandi Escada, Margareth Ley, hannaði logoið sjálf.

„Innblásturinn fyrir ilminn er sóttur í fallegan garð í ljósaskiptum þar sem sjaldgæf og undurfögur dökkbleik rós springur út um leið og sólin sest og gefur frá sér djúpan og göfugan ilm.“

Garðurinn öðlast líf í auglýsingarherferðinni fyrir ilminn sem þið sjáið hér fyrir neðan. Ég rakst á útstillingarnar fyrir ilminn í Hagkaup Smáralind í gær og er dáldið svekkt útí sjálfa mig fyrir að hafa ekki tekið mynd. Fallegar bleikar rósir umluktu ilmvatnsflöskuna – virkilega flott og alveg í takt við innblásturinn á bakvið ilminn.

Andlit ilmsins er fyrirsætan Bar Rafaeli en í auglýsingum fyrir ilminn birtist hún í þessum dásamlega rósagarði í gullfallegum djúpbleikum kjól en liturinn er án efa innblásinn frá litnum á ilminum. Bar er andlit Especially Escada ilmanna og hefur verið í auglýsingum fyrir hina ilmina – það er alltaf bleikt og fallegt þema í auglýsingunum en hver ilmur á sinn bleika tón sem er þess vegna ríkjandi í þeirra kynningarefni.Það er um að gera að nýta sér Fríhafnardaga í Hagkaup til að fá sér nýjan ilm fyrir haustið – tékkið endilega á þessum.

EH

Hádegismaturinn minn í dag er fljótlegur, einfaldur en ó svo góður! Ég ákvað að vera heima í dag til að reyna að koma heimilinu í stand en það hefur fengið að sitja á hakanum alltof lengi og vegna afmælishelgarinnar er núverandi ástand ekki í boði. Ég er nú ekki mikil elda manneskja eða dugleg að finna upp á einhverju en ég bý mér oft til einfaldar samlokur eða brauðsneiðar. Ég einfaldlega elska brauð og gæti ekki lifað án þess – ég vona allavega að ég þurfi þess ekki…

Brauðréttur dagsins hljómar svona:

• 2 sneiðar af brauði, ég er með súrdeigsbrauð
• Grænt pestó smurt yfir brauðsneiðarnar
• Mozzarella og tómatsneiðum raðað til skiptis yfir brauðsneiðina
• Sett inn í ofn þar til osturinn er orðinn gylltur
• Stráið síðan sjávarsalti og ferskri basiliku yfir

Ég mæli hiklaust með þessum:)

EH

Í fyrsta tölublaði Reykjavík Makeup Journal var mynd þar sem ég stillti upp uppáhalds förðunarburstunum mínum og sagði frá nokkrum þeirra. Vegna plássleysis þá komst ekki fyrir lýsing á öllum burstunum sem mér fannst frekar leiðinlegt en mig langar að bæta úr því með því að birta allar lýsingarnar hér…

1. Sheido augnhárabrettari: Augnhárabrettara nota ég örsjaldan, bara þegar ég er að nota gerviaugnhár eða þegar mér finnst maskarinn sem ég er að nota ekki gefa augnhárunum nægilega lyftingu. Augnhárabrettarinn frá Shu Uemura er oft talinn vera sá besti en mér finnst Shiseido brettarinn ekkert gefa honum eftir. Hann er líka fáanlegur hér á Íslandi en ekki hinn.
2. MAC – 286 Duo Fibre Tapered Blending Brush: Þetta er án efa besti blöndunarbursti sem ég hef prófað. Hann nota ég bæði til að blanda saman augnskuggum og gera skyggingar á augnlokum. Það er mjög fljótlegt að gera skyggingar með þessum bursta því hann passar svo vel inn í globuslínuna.
3. MAC – 239 Eye Shader Brush: Að mínu mati er þetta besti burstinn til að bera augnskugga á augnlokið. Burstinn er flatur og með mörgum hárum sem liggja þétt saman sem skilar sér í þéttri áferð á augnskugganum. Þennan nota ég í hvaða tegundi augnskugga sem er og stundum jafnvel til að dreifa út eyeliner yfir augnlokið.
4. MAC – 208 Angled Brow Brush: Frábær bursti til að móta augabrúnir. Hann markar útlínur augabrúnanna með mikilli nákvæmni og með honum er auðvelt að móta hvaða augabrúnir sem er.
5. Revlon stök augnhár: Ég er alltaf með stök augnhár í burstatöskunni minni. Augnhárin nota ég alls ekki alltaf en það er gott að vera með þau ef ske kynni að ég þyrfti að ná að ýkja augnhár fyrirsætunnar sem ég er að farða. Stök augnhár eru alls ekki eins gervileg og þau sem eru heil.
6. Real Techniques svampur: Svampar eru ómissandi í förðunarburstasett að mínu mati. Þessi svampur er nýr í mínu setti og minnir mig á Beauty Blender svampinn sem er þekktur í förðunarheiminum. Þessi er bæði kúptur og sléttur svo það er hægt að gera margt með honum. Ég nota hann til að mýkja áferð húðarinnar og til að laga mistök sem ég hef gert. Svampar virka eins og strokleður í förðun.
7. MAC – 130 Duo Fibre Brush: Uppáhalds Duo Fibre burstinn minn. Hann nota ég til að jafna áferð húðarinnar og til að blanda förðunarvörum saman á húðinni svo það myndist engin áberandi litaskil.
8. Make Up Store – 107 Eyeshadow Brush: Þessi flati bursti er fyrir augnskugga en ég nota hann alltaf til að setja hyljara á húðina. Hann er svo mjór og langur að það er auðvelt að komast til allra svæða í húðinni.
9. Real Techniques – Detailer Brush: Þessi bursti er í Core Collection burstasettinu. Hann er til þess að nota hyljara en persónulega er þetta uppáhaldsburstinn minn til að setja varalit eða gloss á varirnar.
10. Maybelline – Gel Eyeliner Brush: Þessi bursti fylgir með gel eyelinernum frá Maybelline. Hann er lítill, nettur og flatur með frekar grófum, stuttum hárum sem gefa þétta áferð á eyelinerinn. Mér finnst þægilegt að geta bæði gert skarpan og mjúkan eyeliner með sama burstanum.
11. Real Techniques – Lash Brow Groomer: Þetta er tvöföld greiða sem er með nylon hárum öðrum megin. Greiðuna nota ég til að jafna lit og áferð augabrúnanna eftir að ég hef mótað þær. Stálgreiðuna nota ég til að greiða í gegnum augnhárin eftir að ég hef borið maskara á þau. Greiðan aðskilur hárin og fjarlægir klumpa ef þeir hafa myndast.
12. Real Techniques – Accent Brush: Pínulítill og flatur bursti sem er þægilegt að nota til að gera smáatriði í augnförðun eða til að „smudge-a“ eyeliner.
13. Real Techniques – Deluxe Crease Brush: Æðislegur bursti til að gera mjúkar skyggingar í globuslínunni. Hann dreifir jafnt úr litnum og smellpassar í globuslínuna. Þennan nota ég líka til að blanda augnskuggum saman og til að „smudge-a“ eyeliner.
14. Eyrnainnar: alltaf möst!
15. Real Techniques – Blush Brush: Þetta er oddmjór púðurbursti sem er gott að nota til að skyggja andlitið. Þennan bursta nota ég í púðurförðunarvörur eins og litlaust púður, púðurfarða, sólarpúður og kinnalit. Vegna þess að hann er oddmjór þá verður áferðin, sem hann gefur andlitinu, jöfn og það dreifist jafnt úr litnum.
16. Real Techniques – Setting Brush: Lítill og örmjór púðurbursti sem ég nota til að vinna nákvæmnisvinnu eins og að púðra ákveðin svæði húðarinnar eða jafnvel blanda augnskuggum saman.
17. Real Techniques – Expert Face Brush: Þessi bursti á að eiga heima í öllum snyrtibuddum. Með honum er hægt að gera nánast allt. Hann má nota í fljótandi, krem- og púðurförðunarvörur. Ég nota hann t.d. til að grunna húðina með farða en ég nota hann líka til að blanda hyljaranum saman við farðann svo það myndist engin skil.
18. Dior – flatur hringlóttur farðabursti: Frábær bursti til að bera fljótandi farða eða BB krem á húðina. Gefur jafna og þétta áferð. Ég strýk burstanum yfir andlitið til að dreifa úr farðanum og nota svo hringlaga hreyfingar til að jafna áferðina.

Svona eftir á þá skil ég vel að allur þessi texti komst ekki fyrir á einni blaðsíðu :D

Ég hef lengi verið beðin um góðar umfjallanir um förðunarbursta og ég ætla svo sannarlega að taka þeim núna á næstunni!

EH