Trendnet

Ég er svo heppin að fá að vinna fyrir eitt flottasta tískufyrirtæki landsins – að mínu mati alla vega. BESTSELLER  er fyrirtæki sem hugsar vel um sína og mér finnst ég svo heppin að vera í þeirra röðum enda frábært samstarfsfólk og glæsilegar flíkur sem umlykja mann alla daga í vinnunni. Núna í dag kom út BESTSELLER hátíðarblað og ég verð bara að fá að deila því með ykkur, ekki bara því mig er að finna á síðum þess, heldur líka bara því það er alveg sérstaklega flott og faglega unnið.

Í blaðinu finnið þið fullt af skemmtilegu mynd- og lesefni, flotta myndaþætti og hugmyndir að jóladressum á alla fjölskylduna að ógleymdum jólagjafahugmyndum…

Endilega smellið á linkinn hér fyrir neðan til að fletta í gegnum þetta flotta tímarit frá þessu dásamlega fyrirtæki sem ég vinn hjá. Það var rosalega mikil vinna og mikill tími sem fór í þetta flotta blað og það var gaman að fá að fylgjast svona með því þróast í áttina að því sem það er í dag.

BESTSELLER HÁTÍÐARBLAÐ

Ég tróð mér að sjálfsögðu inní blaðið – ég meina að sjálfsögðu vildi ég vera með og fá að þrasa um mikilvægi þess að kaupa jólaföt snemma á börn – ég bara verð að leiða alla sem ég get í sannleikann um þessi mál ;)

Hér sjáið þið pistilinn minn..

BESTSELLER  hátíðarblaðið ætti að detta innum lúgur ykkar mögulega bara á morgun ef það er ekki nú þegar komið og ég vona að þið munið taka vel á móti því og fletta í gegnum það – ég hlakka alla vega til að fá það. Þó ég sé búin að lesa það á netinu er fátt sem kemur í staðin fyrir það að halda á svona flottu tímariti og fletta í gegnum það með höndunum. Hafið þetta endilega í huga þegar blaðið mitt mætir líka innum lúgurnar ykkar ;)

Til hamingju BESTSELLER takk fyrir að leyfa mér að vera með***

Erna Hrund

Varan sem ég skrifa um hér fékk ég senda sem sýnishorn. Það hefur þó engin áhrif á álit mitt á vörunum og eins og alltaf veiti ég hreinskilið álit.

Mér finnst sjálfbrúnkuvörurnar frá St. Tropez einfaldlega þær allra bestu og ég nota fátt annað – svona þegar ég man eftir því að nota sjálfbrúnku. En þegar ég sá í sumar að það væri að koma vara frá merkinu sem gerir okkur kleift að fá lit í sturtu þá trylltist ég smá úr spenningi. Ég byrjaði að prófa kremið um leið og það kom til landsins og sýndi hana á snappinu hjá mér. Ég er búin að prófa hana vel og vandlega í nokkrar vikur og ég get með sanni sagt að þetta er mesta snill sem ég hef á ævinni prófað!

Nú getum við tanað í sturtu – hversu mikil snilld!

Gradual Tan In Shower frá St. Tropez

Kremið virkar þannig að þegar þið eruð búnar að hreinsa líkamann þá slökkvið þið á sturtunni, berið kremið yfir allan líkamann og bíðið í þrjár mínútur og skolið kremið svo vel af.

Þá eru eflaust einhverjar sem hugsa hvað í ósköpunum þær eigi að gera í þrjár mínútur, þær ery furðulega fljótar að líða og ég nýti tíman einna helst í að bera hárnæringu í hárið og greiða vel í gegnum það og oft til að djúpnæra hárið. Ég held líka að þetta sjálfbrúnkukrem hafi orðið til þess að ég hugsa miklu betur um hárið á mér og það lítur miklu betur út :)

Ég ætla ekki einu sinni að reyna að átta mig á því hvernig þetta virkar, þetta bara virkar og eftir nokkur skipti verður liturinn virkilega heilbrigður og fallegur. Kremið virkar líka vel til að dýpka lit á annarri sjálfbrúnku. Ég nota þetta ekki í andlitið heldur nota ég sjálfbrúnkuolíuna fyrir andlit frá St. Tropez – hún er dásemd BTW. Það kemur bara mjög fallegur litur eftir eina og eina umferð af þessu og ég er sko alveg búin að prófa allt, það munar engu að hafa það lengur en þrjár mínútur á og það munar smá að setja tvær umferðir af því á líkamann – ég er búin að stúdera þessa gersemi ;)

Nú er ég búin að prófa þetta stórkostlega undur í bak og fyrir ég elska það af öllum lífs og sálarkröftum og hlakka til að ná fallegum lit fyrir brúkaupið í janúar með þessari gersemi. Ef þið eruð svona eins og ég munið aldrei eftir sjálfbrúnkunni verðið þið að prófa þetta krem ég man alla vega loksins eftir að bera brúnku á mig þó ég sé með brjóstaþoku því það er bara inní sturtu.

Love it,
Erna Hrund

Mig langar að taka það fram í byrjun að færslan er ekki kostuð á neinn hátt, hún er hins vegar unnin í samstarfi við Name It sem lánaði mér föt á strákana til að prófa heima. Ég tók myndir af mínu eigin frumkvæði og við foreldrarnir völdum svo föt úr þessum dressum sem við keyptum á strákana :)

Mig langar að byrja á því að segja ykkur frá smá sem ég lærði í fyrra… Maður má aldrei fara í desember að kaupa jólaföt á börn því jólafötin eru þá bara alveg búin!! Ég lærði þessa lexíu í fyrra þegar ég fór í Name It um miðjan desember og kom að öllu tómu. Það voru reyndar eftir einar buxur í stærðinni hans Tinna svo ég var smá heppin ég held meirað segja að þeim hafi verið skilað bara daginn áður. En í alvörunni hver vissi þetta og sagði mér bara ekki frá þessu!! En ég lærði mína lexíu og í ár kom ég meirað segja degi of snemma :D En jólafötin eru komin í hús og mér datt í hug að gera smá skemmtilega færslu úr því á blogginu. Ég valdi tvö dress á drengina sem ég fékk svo að máta á strákana með Aðalsteini til að átta okkur á því hvað myndi passa þeim best því við sjáum það fyrir okkur þannig að þeir muni verða í sömu fötum í brúðkaupinu okkar svo við vorum mjög mikið að pæla í þessu. Við viljum einhvern vegin helst að þeim líði vel og þeir geti hreyft sig og gert það sem þeira vilja :)

En hér sjáið þið drengina tvo í dásamlegum jóladressum sem við enduðum síðan á að blanda aðeins saman og það eina sem bræðurnir munu eiga sameiginlegt verður blá hneppt peysa :)

Dress #1 Tinni Snær 3 ára

Mér finnst alltaf voðalega kjút að sjá svona sæta stráka með slaufu og þessi litur finnst mér æði en þessi slaufa varð fyrir valinu og þessi fallega skyrta. Mér finnst þetta mjög fínleg skyrta sem mun ganga vel líka í brúðkaupinu.

Vestið finnst mér æði og það hefði auðvitað verið mega kjút að hafa þá í vestum í stíl en þessi eru líka til í dökkbláu en okkur fannst hitt fara þessum sætu strákum okkar betur. Buxurnar eru svo svakalega klassískar og góðar, beinar, gott að hreyfa sig í og úr mjúku efni. En hinar buxurnar urðu fyrir valinu.

Dress #1 Tumi 3 mánaða

Mig langaði svo mikið að hafa hann í skyrtu og haldið þið að það hafi ekki komið alveg æðislegar skyrtusamfellur í Name It! Þær eru ábyggilega búnar eða alveg að verða búnar svo hafið hraðar hendur ef ykkur vantar svoleiðis. Ég vildi nefninlega skyrtusamfellu sem lítur út eins og skyrta og þessi er þannig hún er æði! Ég keypti tvær eina í 62 og aðra í 68 ég veit bara hvað er erfitt að fá svona svo ég ætlaði alls ekki að missa af þeim!

Vestið er svo sjúklega sætt en mér fannst bláa peysan sem þið sjáið næst svo ofboðslega falleg að ég gat ekki sleppt henni! Ég er enn óviss með buxurnar svo við erum ekki komin með buxur á Tuma ég þarf aðeins að melta þær en ekki of lengi því þá verður allt kannski búið…

Dress #2 Tinni Snær 3 ára

Þessar buxur!! Ég elska þennan lit þær eru svona gul brúnar og alveg sjúklega flottar! Svo þið sjáið nú að slaufan og buxurnar verða í stíl. Svo er það bláa peysan hér sem við völdum mér finnst hún svakalega falleg og það verður líka þá þægilegt fyrir hann að fara úr henni ef honum verður of heitt.

Þessi skyrta finnst mér líka æði. Eitt af því sem ég elska við Name It er hvað skyrtuúrvalið er alveg frábært. Tinni Snær á helling af skyrtum og þær eru allar jafn flottar. Hér er hann svo með bláa slaufu en það kom alveg hellingur af slaufum fyrir jólin mér finnst það æði því ég er slaufukjella ;)

Dress #2 Tumi 3 mánaða

Hér er það svo fallega peysan en sjón er sögu ríkari hún er alveg æðislega falleg og svo silkimjúk. Hún er líka til grá, hér er ég að pæla eins það er ekkert mál að taka hann úr peysunni ef honum verður of heitt.

Bolurinn finnst mér hrikalega kjút en þetta eru axlabönd og svo yfirskegg sem kemur eins og slaufa. Eini gallinn var að hann er svo lítill að ég hefði viljað að þetta væri samfella. En ég var svo sem búin að ákveða skyrtuna þarna en ofboðslega kjút bolur engu að síður og svo mjúkur og sætur.

Superman!

Svo eins og þið áttið ykkur á þegar þið hafið lesið ykkur í gegnum þetta þá blönduðum við þessum dressum saman á strákunum. Mér finnst þessi dress þau mjög flott en við svona gerðum þau aðeins meira þannig að þau myndu passa við bæði tilefni :)

Mæli með að þið mömmurnar farið og kíkið á jólafötin í Name It þau eru líka bara á mjög góðu verði. Bara alls ekki bíða jafn lengi og ég gerði í fyrra því þá verður úrvalið bara alls ekki jafn mikið og ef þið viljið eitthvað hafa eins og stráka eða stelpur í stíl þá er hætt við að stærðirnar séu mikið til búnar í því sem þið viljið.

Nú vantar mig bara skó… Hvar fær maður góða spariskó á svona litla stubba??? Plís deilið ;)

Erna Hrund

Stuttu eftir að þessar myndir í færslunni voru teknar vorum við mæðginin á leiðinni uppá spítala og seinna kom í ljós að litli kútur var með þvagfærasýkingu. Við lágum inni á Barnaspítala Hringsins í fjóra daga á meðan bakterían var greind og litli kútur fékk sýklalyf í æð. Við komum heim á mánudaginn með sýklalyfja skammt sem við gefum honum og hann er að verða betri með hverjum deginum sem líður. En ég verð nú að viðurkenna að það lagðist ekkert sérstaklega vel á móðurina að fara enn einu sinni inn á spítala á þessu ári – en ég hugga mér við að ég veit hvar allir bestu sjálfsalarnir eru í byggingunni ;)

En rétt áður en við fórum áttum við smá kósý kúr stund uppí sófa.

Ég elska haustin, það er svona kuldi útí en snjórinn er ekki kominn, skammdegið er mætt og maður getur farið að ilja sér við kertaljós og heitan te bolla svona rétt fyrir svefn. Ég er svona aðeins að reyna að draga úr kaffidrykkju á kvöldin en það er að reynast mér erfitt, ég er algjör kaffifíkill og sést sjaldan án kaffibolla í hönd. En teið frá Tefélaginu er alveg dásamlegt, ég viðurkenni fúslega að ég tapaði smá tedrykkju áhuganum í sumar en nú finnst mér hann kominn aftur – hann fylgir greinilega haustinu.

Svo lifi ég í þessum yndislegu inniskóm heima hjá mér. Það er nefninlega smá gólfkuldi hjá okkur þar sem við erum á jarðhæð en það laast vonandi þegar við setjum hita í gólfin en þá er tilvalið að vera í fóðruðum inniskóm eins og þessum – æðisleg jólagjöf líka. Ég tók þá í númeri stærra en ég er vön svo þeir væru dáldið rúmir.

Eins og er erum við ekki með neitt stofuborð, við höfum ekki fundið það fullkomna sem við erum bæði sammála um og ég er reyndar bara farin að kunna ágætlega við að vera án þess. Það er allt í einu svo mikið pláss inní stofu, gólfpláss fyrir strákana að leika sér á. Svo ég brá á það ráð að kaupa einfalda og ódýra bakka inní Blómaval. Ég keypti tvo svona hvíta í mismunandi stærðum og legg þá svo bara í sófann hjá mér og þar hvílir kaffibollinn eða núna tebollinn. Sniðug lausn sem hentar þó kannski ekki alveg öllum :)

Inniskór: Bianco
Náttbuxur: F&F
Bolli: Design Letters ég fékk minn í Hrím
Bakki: Blómaval
Te & Tekanna: Tefélagið

Mæli eindregið með þessum fallegu inniskóm, þeir eru á svakalega góðu verði og svo er auk þess 25% afsláttur af skóm í Bianco í dag útaf Miðnætursprengjunni í Kringlunni!

Ég ætla svo sannarlega að njóta þess að eiga fleiri svona kósýstundir uppí sófa næstu vikurnar þar sem Reykjavík Makeup Journal fer í prent í dag og það er alltaf smá léttir.

Erna Hrund

Vörurnar sem ég skrifa um hér fékk ég sendar sem sýnishorn. Það hefur þó engin áhrif á álit mitt á vörunum og eins og alltaf veiti ég hreinskilið álit.

Á morgun er Miðnæturopunun í Kringlunni og það verður sko sannarlega fjör! Það verður nóg af afsláttum, jólagjafakassarnir verða mættir í flestar verslanir og þið getið fengið glæsilega sérmerkta varaliti frá Yves Saint Laurent. Ég fékk einn að gjöf núna í gær og hann er alveg ofboðslega fallegur – nafnið mitt gerir eitthvað svo mikið við hliðiná glæsilegu YSL logo-inu – klárlega það sem fullkomnar umbúðirnar ;)

En í Hagkaup Kringlunni verða dömurnar hjá YSL að bjóða uppá persónulega áletrun með nafni á fallegar umbúðir Rouge Pur Couture varalitina. Það verður 20% afsláttur af YSL í Hagkaup á morgun og þegar þið hafið keypt varalit að ykkar smekk getið þið fengið umbúðirnar áletraðar. Í nýja Rouge Pur Couture lúkkinu sem ég sýndi ykkur um daginn þar sem komu fjórir varalitir og fjögur mött naglalökk í stíl eru bleikur, orange, rauður og nude varalitir og ég hvet ykkur sérstaklega til að skoða þá vandlega.

Hér sjáið þið persónulega áletraða varalitinn minn….

Finnst ykkur hann ekki fallegur! Áletrunin verður í boði á milli klukkan 19 og 22 og þetta er líka glæsileg jólagjöf fyrir t.d. móður, dóttur eða systur.

Rouge Pur Couture event á Facebook

Rouge Pur Couture litirnir eru áferðafallegir og kremaðir litir með þéttri áferð og þeir renna mjúklega yfir varirnar og gefa jafnan lit. Það er alveg svakalega góð lykt af þeim – dáldið svona sæt lykt… Ég fæ smá svona nostalgíu þegar ég þefa af þeim því mamma átti einn alveg ofboðslega fallegan YSL varalit sem ég stalst stundum í þegar ég var yngri :)

HÉR getið þið skoðað færsluna mína frá því um daginn þar sem ég er með bleika Rouge Pur Couture litinn.

Erna Hrund

Fyrr á þessu ári suðaði ég ásamt henni Evu Birnu verslunarstjóra Vero Moda í Smáralind um alveg svakalega glæsilegt vesti! Suðið borgaði sig og hún Aubí okkar keypti vestið inn í búðirnar. Ég gat bókstaflega ekki hætt að tala um blessaða vestið, það ásótti drauma mína og ég bara gat ekki beðið eftir að það yrði mitt. Svo þegar við vorum að undibúa Bleika Boðið fyrir Bleika Október þá kom sýnishornið af vestinu til landsins og ég stóð bara og starði á þessa gersemi sem varð svo mín og ég er svo yfir mig ástfangin af þessu fallega vesti, búin að nota það óspart síðan þá. Ég nota það yfir jakka og ég nota það líka bara yfir skyrtur og blússur það gerir heildarlúkkið svo flott.

Ég hef fengið mjög margar spurningar um vestið og get nú sagt að það er væntanlegt inní Vero Moda í dag og það komu ekki mörg! Svo ef ykkur líst vel á vesið mitt – grípið það áður en það verður of seint. Væri líka gaman að heyra hvað ykkur finnst um það svo ég geti nú kannski sýnt fram á það að ég hafi einstaklega góðan smekk – eða ég og Eva Birna ;)

Vestið er blanda af Fake Fur og Pleather og ég hef alla vega ekki séð neitt líkt því. Ég klæðist því bara dags daglega og svo fór ég í því yfir basic svartan samfesting á árshátíð Beseller um daginn og það gerði samfestinginn einhvern vegin svo fínan.

Eitt sem ég get ekki með svona vesti er þegar það eru ekki vasar – ég vil geta verið með síma, veski og bíllykla á mér og það eru vasar á þessu!!

Ég dýrka þetta vesti af öllum lífs og sálarkröftum! Þegar ég fór fyrst í það fékk ég svona ókei ég get alveg verið skvísa þó ég sé orðin tveggja barna móðir – og ég þurfti á því að halda á því augnabliki ;)

Erna Hrund

Vörurnar sem ég skrifa um hér fékk ég sendar sem sýnishorn. Það hefur þó engin áhrif á álit mitt á vörunum og eins og alltaf veiti ég hreinskilið álit.

Ég fékk fallegt tvíeyki að gjöf um daginn frá Yves Saint Laurent. Gjöfin innihéld glæsilegan varalit og naglalakk í stíl. Svo að sjálfsögðu skellti ég gripunum á mig, steig út á stétt, skellti höndunum uppí andlit og tók fallegar myndir af þessum glæsilega fallega lit. Ég held að vinnumönnunum sem eru að fegra húsið hinum megin við götuna sé hætt að lítast á blikuna með þessa sjálfsmyndaóðu konu… mig!

En það er bara gaman af því ;)

Varaliturinn er Rouge Pur Couture litur sem er glæsileg varalitalína sem hefur verið til síðan 1978 en þessi litur er partur af Kiss & Love lúkki frá merkinu sem samastendur m.a. af fjórum æðislega fallegum og áberandi varalitur. Varaliturinn bráðnar fallega saman við varirnar og gefur þeim þéttan og fallegan lit sem þekur varirnar alveg. Liturinn er áferðafallegur með léttum glansi og kremaðri áferð.

Rouge Pur Couture Kiss & Love Edition í litnum Fuchsia nr. 19 og La Laque Couture The Mats nr. 219 Le Fuchsia Mat.

Hér sjáið þið betur þessa glæsilegu liti sem smellpassa saman! Í þessu Kiss & Love lúkki koma fjórir fallegir varalitir, þessi bleiki, nude litaður, rauður og orange litaður og það koma fjögur naglalökk sem smellpassa við hvern lit og eru öll svona fallega mött.

Mér finnst þessir Kiss & Love varalitir alveg extra flottir því það er búið að skera út þessar flottu varir í formúluna. Liturinn er til „venjulegur“ ef svo má segja eða ekki með útskurðinum – en hann gerir þá bara extra fallega og veglega!

Naglalakkið er með fallegri ljómandi mattri áferð. Það er frekar þunnt svo það þarf alveg tvær umferðir af því en þá verða neglurnar mjög fallegar. Kosturinn við að vera með þunnt naglalakk er að þau þorna svo svakalega hratt svo maður er enga stund að lakka neglurnar. Ég hef alltaf kunnað vel við pensilinn í YSL lökkunum, það er mjög auðvelt að bera lakkið á neglurnar með einni stroku og svo bara annarri þegar fyrri umferðin er þornuð.

Þetta eru hábjartir og fallegir litir sem lýsa upp skammdegið án efa! Ég held að þetta tvíeyki væri algjörlega fullkomið við t.d. dökkrúnt smokey. Þó þið séuð með ljósa húð eins og ég er ekkert sem segir að þið þolið ekki svona bjarta og áberandi liti – mér sjálfri finnst t.d. yfirleitt fara mér betur að vera með bjarta liti en litlausa, það færir andlitinu mínu gleði og fallega áferð.

Erna Hrund

Jæja mín kæru og yndislegu! Fyrst og fremst takk kærlega fyrir ótrúlega falleg skilaboð, snöpp, koment og kveðjur við síðasta pistlinum mínum. Ofboðslega þykir mér vænt um þessi dásamlega fallegu viðbrögð en það gerir það þeim mun auðveldara að deila svona erfiðum hlutum í lífinu með öðrum. Þið eruð einstök – takk fyrir mig***

En að öðru, mig langaði svona að kasta einni snöggri færslu hér inná síðuna og fara yfir nokkur gömul en góð förðunartips. Þessi ráð sem gleymast svona stundum með öllum nýju og sniðugu ráðunum – en þau standa alltaf fyrir sínu.

Munið að hreinsa alltaf burstana ykkar
Eitt besta ráðið sem ég get gefið ykkur er að hugsa vel um förðunarburstana ykkar. Til að tryggja það að þið fáið fullkomnu áferðina sem þeir lofa ykkur þá verða þeir að vera hreinir. Óhreinindi geta skemmt fyrir og ekki leyft þeim að njóta sín, áferðin verður ekki fullkomin, blöndunin fer í rugl og já satt að segja það gengur ekkert sérstaklega vel að mála sig. Mín ráðlegging – hreinsið burstana einu sinni í viku með góðum djúphreinsi!

Viljið þið að farðinn ykkar endist lengur – notið primer!
Primer er eitt af þessum leyndarmálum sem voru okkar förðunarfræðinganna í mörg ár þar til bara frekar nýlega. Í dag er þetta ein af þessum ómissandi snyrtivörum sem mér finnst þó ekki endilega allar konur vita hvað á að gera. Primer gerir eins konar ósýnilega filmu á milli húðar og förðunarvara. Primer undirbýr yfirborð húðarinnar fyrir förðunina með því að jafna það og fylla uppí ójöfnur eins og hrukkur og ör t.d. Primerinn viðheldur líka raka í húðinni. Þið berið alltaf á ykkur gott krem fyrst, leyfið því að vera í sirka 10 mínútur setjið svo primerinn og hann mun passa að rakinn endist vel í húðinni. Svo leyfið þið primernum að virka það tekur sirka 30-60 sekúndur og svo berið þið farðann á. Primerinn mun líka koma í veg fyrir að húðin dragi í sig farðann sjálfan svo förðunin ykkar endist miklu betur og miklu lengur. Það eru til alls konar primerar sem gefa ólíkar áferðir og henta því ólíkum húðgerðum. Ég er persónulega hrifnust af svona gelkenndum primerum en mér finnst þeir henta flestum. Þá eru á topplistanum mínum Dream Smooth Primer frá Maybelline, Photo Finish Primer frá Smashbox, Touche Éclat Blur Primer frá YSL og Visionnaire frá Lancome.

Hittið á rétta staði
Svona þegar það er ekkert vinsælla en að móta andlitið fullkomlega er gott að minna á hvar allt á að fara. Við setjum lit til að móta andlitið og skyggja það beint undir kinnbeinin. Með þessum dökka lit verður til skuggi og við verðum að passa uppá að skugginn hitti á réttan stað. Til að finna hann sjúgið þá inn kinnarnar – þá standa kinnbeinin ykkar út og þið setjið litinn undir þau. Til að setja í kinnarnar þá er gott að hugsa um að setja hann á staðina þar sem við roðnum náttúrulegar. Kinnaliturinn fer í eplin og eplin standa vel út þegar þið skellið einu risastóru brosi á andlitið. Berið litinn bein í epli kinnanna og blandið honum saman við grunninn með léttum strokum.

Það er lítið mál að laga mistökin!
Ef eitthvað fer úrskeiðis þá er yfirleitt svakalega einfalt að laga það. Þrennt sem nýtist mér alltaf vel til að laga það sem fer á mis – hyljari, eyrnapinni og svampur! Með hyljara er hægt að laga til eyeliner mistök og snyrta í kringum varirnar ef maður fer smá útfyrir með áberandi varalit. Eyrnapinni er snilld til að ná maskara er hann fer útfyrir. Hver þekkir það ekki þegar maður er búin að eyða hellings tíma í að gera fallega augnförðun og svo klessist maskarinn á mitt augnlokið. Bíðið þar til maskarinn þornar alveg og snúið svo eyrnapinnanum létt yfir svæðið og hann hverfur! Svampur dregur svo í sig það sem við gerum of mikið af. Ef þið setjið of mikið sólarpúður, of mikill kinnalit, of mikinn augnskugga já eða highlighter þá er svampur eins og strokleður – ég gæti alla vega ekki verið án hans!

Húðhreinsun skiptir höfuðmáli
Ég er sífellt að fá spurningar um húðhreinsun, þetta er ekki svo flókið mínar kæru þið verðið bara að þrífa húðina kvölds og morgna til að halda henni í jafnvægi. Þið gætuð notað bestu krem í heimi sem eru töfralausnir við hvaða vandamáli sem er en þið fáið aldrei fulla virkni frá kremunum og þau fá aldrei að gera sitt nema þið hreinsið húðina. Ef þið hreinsið hana ekki þá hindra óhreinindi för næringarríkra og virkra efna um húðina. Mér finnst persónulega best að hreinsa húðina tvisvar á kvöldin með þá olíuhreinsi og svo kremhreinsi og nota þá helst Clarisonic burstann í seinni hreinsunina. Svo veit ég fátt betra en að nota hreinsivatn eins og Micellaire hreinsivatn á morgnanna til að hreinsa húðina þá – það frískar uppá hana um leið!

Nokkur basic ráð frá mér til ykkar sem munu nýtast ykkur öllum óháð aldri og húðgerð! Njótið vikunnar sem er að hefjast það er alltaf gott að byrja nýja vinnuviku með jákvæðni og góðum markmiðum. Í þessari viku ætla ég t.d. að skila af mér stærsta Reykjavík Makeup Journal til þessa og það verður líka það flottasta – get ekki beðið!!!

Erna Hrund

Myndirnar í færslunni eru frá Pinterest.com og Instagramsíðu @realtechniques

Á þessum fallega degi, þessum síðasta degi mínum sem 25 ára, er svo sannarlega gaman að hugsa til baka yfir síðasta árið. Síðasta ár er svo sannarlega búið að vera viðburðarríkt í mínu lífi og ég er ótrúlega þakklát fyrir allt það sem það hefur fært mér.

Ég varð tveggja barna móðir, það var sannarlega hápunktur ársins að eignast einn heilbrigðan dreng í viðbót sem færir mér svo óendanlega mikla hamingju. Hann Tumi er dásamleg viðbót við okkur fjölskylduna og ég komst að því að það er mín lukka í lífinu að vera umkringd fallegum herramönnum.

Ég hóf 25 ára með ferð til yndislegu London þar sem ég hitti m.a. tvær af mínum fyrirmyndum. Þær Samantha og Nic Chapman betur þekktar sem skaparar Real Techniques burstanna eru konur sem ég lít svo mikið upp til! Þær eru glæsilegar konur sem virðast hafa það allt, feril, fjölskyldu og svo eru þær bara yndislegar í alla staði. Mikið veittu þær mér mikinn innblástur á þessum stutta tíma sem ég talaði við þær. Stundum þarf maður að fá svona power boost – þegar maður hefur kannski aðeins staðnað í starfi og lífi, ég fékk power boost frá þessum konum þegar ég hitti þær. Í kjölfarið ákvað ég að setja mér háleit markmið sem voru eitt sinn draumar og hafa í kjölfarið ræst, markmið sem tengjast starfi og þessari síðu og ég get mjög stolt sagt að mér hefur tekist að ná mörgum þeirra þó einhver séu eftir. Þær Chapman systur hafa alla vega kennt mér það að draumar eru gerðir til þess að rætast en það er ekki málið að sitja bara á rassinum og bíða eftir að einhver komi og færi manni tækifæri á silfurbakka maður verður að fara út og grípa þau!

Á lífsleiðinni er maður svo heppinn að fá að hitta fólk sem maður lítur á sem fyrirmyndir sínar í lífi eða starfi. Stundum verður maður svo heppinn að kynnast þessu fólki persónulega og fær að kalla þá vini sína. Ég lagði mikla áherslu á að rækta vinskap við fólkið mitt og passa uppá að samböndin okkar myndu dafna og þroskast. Þetta var partur af mikilli sjálfskoðun sem ég tók sjálfa mig í. Ég hef það fyrir reglu að koma vel fram við alla, ég er kurteis og ég tala ekki illa um neinn sama þó mögulega ég hafi heyrt það að einhverjir aðilar tali ekki vel um mig. Ég tel það eitt af mínum stærstu afrekum á síðasta ári að bregðast ekki hart gagnvart neikvæðni í minn garð og reyna að taka öllu með ró og yfirvegun.

Ég hef tekið sjálfa mig í mikla skoðun á síðastliðnu ári. Ég fór svona að pæla í því hvort ég væri ánægð með það hver ég væri sem manneskja og sem fyrirmynd drengjanna minna. Ég ákvað að til að vera góð fyrirmynd yrði ég að taka mig sjálfa á og rækta mig og andlegu hlið mína, ég held að þetta hafi verið einhver sú allra besta ákvörðun sem ég hef nokkru sinni tekið.

Ég tók það stóra skref að labba inn á stofu hjá geðlækni með von um að uppræta fæðingarþunglyndið sem hrjáði mig eftir að ég átti Tinna Snæ. Það var ákvörðun sem ég tók með börnin mín og mann í huga að mamma þeirra myndi ekki verða eins og síðast – þetta var það versta sem ég hef upplifað með sjálfa mig og ég ætla aldrei á þennan stað aftur. Með hjálp Fyrstu Tengsla get ég nú sagt að mér líður svo miklu betur. Ég var greind með mikinn kvíða og þarf nú að taka kvíðastillandi lyf á hverjum degi til að hjálpa mér að halda góðu andlegu jafnvægi. Ég hvet alla foreldra sem eiga mögulega við smá erfiðleika að stríða, bæði mömmur og pabba, að leita sér upplýsinga um þessa einstöku starfsemi. Það er svo mikilvægt að mömmu og pabba líði vel svo börnunum líði vel.

Það hefur oft litað mitt líf að vera dóttir alkóhólista, mamma mín hefur verið óvirk í fjöldann allan af árum og er sérstaklega dugleg að vinna í sjálfri sér. Okkar samband hefur ekki alltaf verið gott og á köflum hefur það bara verið svakalega slæmt og ég held við báðar værum fyrstar til að viðurkenna það. Það tók mig langan tíma að ákveða að það væri kominn tími til að gera upp erfiðleika og tilfinningar sem sátu í mér í kjölfar þess að hún fór í meðferð. Ég get ekki lýst því hve reið ég varð þegar ég heyrði af því að hún hefði farið í meðferð en mér þótti það léleg afsökun fyrir öllu því sem hafði á undan gengið. Það tók mig ofboðslega langan tíma að skilja þennan sjúkdóm, að skilja mömmu mína og þetta tók mikið á. Ég tók þessu af mikilli reiði og ég ákvað að þessar tilfinningar mínar væru best geymdar einhvers staðar langt undir yfirborðinu því ég var ekki tilbúin til að takast á við þær. Það var ofboðslega vond ákvörðun, en ég þurfti að komast að því sjálf. Ég þurfti sjálf að finna það að það væri kominn tími til að gera upp þessi ár. Með góðri aðstoð bestu vinkonu minnar og yndislegs þerapista hef ég komið þessum tilfinningum öllum uppá yfirborðið. Ég hef náð að skilja betur tilfinningarnar mínar og tilfinningar mömmu minnar. Áður en ég fór í talmeðferð hjá þerapistanum mínum þá stóð í þeim sporum að annað hvort gæti ég bara ekki átt samband við mömmu mína eða ég yrði bara að fara að gera eitthvað í þessu. Sem betur fer ákvað ég að vinna í mínum málum og ég held að þessi ákvörðun hafi gert það að verkum að ég gat tekið sjálfa mig í þessa miklu sjálfsskoðun. Í dag eigum við miklu betra samband en mig hefði nokkru sinni órað fyrir, ég hef lært betur á það hvernig samskipti ég vil hafa og við höfum báðar sett hvor annarri mörk. Eitt það mikilvægast sem ég hef lært á þessu ferli er að setja mig í spor hennar svona af og til. Það var ekki auðvelt en það var nauðsynlegt svo ég áttaði mig á öllum hliðum á þessu sambandi okkar. Ég sá loksins að mamma mín var að reyna sitt allra besta og ég varð að gefa henni svigrúm til að átta sig á því hvernig samband hún vildi eiga við mig og ég varð líka að átta mig á því hvernig samband ég vildi eiga við hana. Mamma mín er eins og ég bara mannleg en ég get svo sannarlega séð það í dag að hún er öll af vilja gerð til að gera sitt besta, ég er líka að gera mitt allra besta. Hún er alveg frábær amma og ein sú allra mikilvægast ákvörðun sem ég hef tekið er að láta okkar samband aldrei hafa áhrif á samböndin sem hún myndar við syni mína. Hún er mikilvægur partur af þeirra lífi og Tinni Snær gjörsamlega dýrkar hana og mér þykir mjög vænt um það. En eins og ég segi þá hefði ég aldrei náð að komast á þann stað sem ég er í dag andlega nema ég hefði byrjað að vinna í þessum málum. Því þó ég hefði ekki viljað tala um þau og ýtt þeim frá mér og hafði ákveðið að þau myndu ekki fá neitt á mig þá voru þessi sár ofboðslega stór og það er vont að lifa með svona mikla reiði útaf óuppgerðum hlutum inní sér. Ég er ekki búin í þessari vinnu og ég ætla að halda henni áfram.

Ég ákvað að losa mig við neikvæðni, ég reyna að sjá jákvæðar hliðar á öllu og hef vanið mér þann sið að brosa bara framan í erfiðleika, drama og vesen og hugsa í lausnum en ekki vandamálum. Dramatík og neiðkvæðni fleytir manni ekkert en jákvæðni það er sko allt annað mál. Svo eru það hrósin ég ákvað að hrósa miklu miklu meira og vitið þið hvað það skiptir ofboðslega miklu máli að hrósa. Hrós færa fólki svo mikla gleði og mér finnst dásamlegt að fá að taka þátt í því að gleðja fólkið í kringum mig. Ef maður brosir framan í heiminn þá brosir heimurinn framan í mann tilbaka – það er mikill sannleikur í þessu ég hvet ykkur til að prófa.

Þó það líti útfyrir kannski fyrir marga að ég sé voða örugg með sjálfa mig og eigi mjög auðvelt með að opna mig þá tók ég tvö ofboðslega stór skref útfyrir þægindarammann á síðastliðnu ári. Ég fór í forsíðuviðtal við Vikuna núna í vor þar sem ég opnaði mig um fæðingarþunglyndi, fósturmissi og kvíða. Ég þurfti svona smá að mana mig upp í það en það sem gaf mér kjarkinn var að mögulega gæti mín reynsla hjálpað öðrum í sömu sporum. Þegar ég fór í gegnum mína erfiðleika upplifði ég mig svo eina það var ekki fyr en ég fór að tala um erfiðleikana sem ég fann fleiri í sömu sporum og ég var. Hitt skrefið var snapcat rásin mín, það eru kannski ekki allir sem sjá það sem eitthvað voðalega stórt skref en það er það. Þar inni gef ég fylgjendum mínum stóran part af mér og gef mikið færi á mér, ég geri mér vel grein fyrir því að ég er auðvelt skotmark þegar kemur að gagnrýni og ég veit það vel að það er fullt af fólki sem hefur ekkert gaman af mér og þykir ég voða yfirborðskennd og skrítin. En inná snappinu fæ ég tækifæri til að sýna hvernig ég er í raun og veru og það er kannski smá erfitt að geta ekki skýlt sér á bakvið orð á tölvuskjá. Ég þurfti alveg að venjast þessu en mér finnst þetta í dag mjög gaman og ómissandi tenging við marga af mínum lesendum.

25 ára var ár sjálfskoðunar, ég kem sterkari frá því en ég var og ég hlakka til að vakna á morgun 26 ára og takast á við ný verkefni sem árið mun færa mér. Ég hef mikla trú á því að 26 ára verði svakalega skemmtilegur aldur og það eru mörg spennandi verkefni framundan!

Takk fyrir mig 25 ára – þetta var snilld***

Ykkar einlæga ávalt,
Erna Hrund

Ég hef tekið ástfóstri við camel brúna liti og brúngula tóna, mér finnst eitthvað svo dásamlega fallegt við þessa liti og svo svakalega haustlegt því þeir minna dáldið á litina á laufblöðunum sem eru að falla af trjánum núna. Ég kolféll fyrir glæsilegri peysu inní VILA fyrir helgi og dró Aðalstein þangað með mér í dag til að kaupa hana – já hún er það falleg að ég gat bara alls ekki hætt að hugsa um hana og ég held margar hverjar muni skilja mig vel þegar þið sjáið hana…

Þessi litur er bara gordjöss og ég vil meina það að hann fari mér, augunum og hárlitnum alveg sérstaklega vel. Hún er alveg svakalega hlý en ég hafði smá áhyggjur að mig myndi klæja undan henni og ég finn svona smá fiðring í hálsinum en það er samt ekki kláði en ég held það muni bara venjast. Ég skila nefninlega hiklaust flíkum sem mig klæjar undan ég get ekki svoleiðis og þær flíkur safna bara ryki inní mínum fataskáp – en þessi mun ekki gera það.

Peysa: Object fæst í VILA, ég elska Object vörurnar inní VILA og undanfarið hef ég nánast bara keypt frá því merki inní búð en síðustu línur frá þessu fallega merki hafa bara verið svo glæsilegar. Peysan er aðeins síðari að aftan en framan sem mér finnst dáldið skemmtilegt því þá getur maður sett fleiri lög af klæðum inn fyrir peysuna og þá kemur skemmtileg áferð í heildardressið. Ég sé fyrir mér að það verði gaman að klæðast t.d. skyrtum inn undir þessa. Rúllukragar eru svo kósý í svona köldu haustveðri, þá langar manni bara að pakka sér inn í eitthvar þægilegt og þá skemmir ekki fyrir þegar flíkurnar eru fallegar eins og þessi.

Buxur: Pieces fást í VILA, ég er búin að vera með augastað á þessum buxum lengi. Ég passa ennþá ekki í neinar buxur í fataskápnum og ég er svona smám saman að verða meira og meira miður mín yfir því þar sem mér finnst að auka kílóin eigi að vera farin en þá þarf ég að minna mig á það að ég er nýbúin að eiga barn og líkaminn er í hönki og ég á mjög erfitt með að hreyfa mig svo ég verð bara að taka þessu með smá ró og aðeins meiri ró. En buxurnar eru eins og einhvers konar reiðbuxur, það er svona falleg glans áferð á þeim og þær eru svaka þægilegar. Gott að eiga einar svona superslim svartar í fataskápnum. Þessum er bara rennt upp á hliðinni og þær eru með góðri teygju í sér en þó ekki í mittinu sem er gott því þær sitja fastar á mjöðmunum og eru ekkert að renna niður.

Skór: Camilla Pihl fyrir Bianco. Einhverjir allra bestu skór sem ég hef komist í á ævinni. Ég á þessa líka í svörtu og ég stóðst ekki mátið og fékk líka þessa brúnu þegar þeir komu núna fyrr í haust. Ég sá svo að hún Elísabet mín náði líka að panta inn dökkbrúnu rússkinsútgáfuna af þessum – sjitt hvað þeir eru gordjöss en þeir eru alveg svona súkkulaðibrúnir. Ég er ekkert að ýkja þegar ég segi að þessir skór séu einhverjir þeir þægilegustu í skóskápnum mínum og ég elska líka að eiga svona fancy ökklastígvél sem ganga vel við fínni dress.

Ég er in love af þessum lit! Aldrei þessu vant tóks mér að bæta við peysu í fataskápinn minn sem er ekkert lík neinni annarri sem fyrirfinnst þar. Ég sé svo fyrir mér að það verði fullkomið að bæta við ljósblárri skyrtu undir peysuna en það var einmitt ein ofboðslega falleg til inní VILA frá Object sem ég var næstum því búin að kaupa líka en nei… ég á víst nokkrar svoleiðis, fleiri en þrjár meirað segja :) Svo held ég það verði líka gaman að bæta við rúllukraga bol undir peysuna til að gera hann enn meira kósý.

Ég er alveg að fara að taka þetta haust og kuldann sem því fylgir í sátt en helst eiginlega bara útaf þessum kósý haustklæðnaði sem fyllir verslanir. Svo hlakka ég líka til að fara gera kósý stemmingu heima á kvöldin með kertaljósi og kúra undir teppi. Sá tími mun þó ekki koma fyr en ég er búin að skila af mér í prent! Ég ætla reyndar að taka smá frí á morgun bara af því ég á afmæli – 20 & sexý!

Erna Hrund