Eitt af því skemmtilegasta sem ég geri er að prófa nýja farða og sýna ykkur fyrir og eftir myndir. Góður farði getur gert svo mikið og ef það er einhver snyrtivara sem ég ætti erfitt með að vera án þá er það farði og þá helst ljómandi farði.
En það á einmitt við um nýja farðann frá Max Factor Skin Luminizer sem er nú kominn í verslanir ásamt hyljara í stíl. Serum farðinn frá merkinu er einn af mínum uppáhalds svo ég átti ekki von á því að þessi nýji myndi valda mér vonbrigðum – sem hann gerði líka ekki ;)
Til að sjá fyrir og eftir er auðvitað nauðsynlegt að vera með eina mynd þar sem ég er með alveg hreina húð. Eins og þið sjáið er ég með rauða díla hér og þar og sums staðar þarf að jafna lit húðarinnar – en þið sjáið vel að farðinn gerir einmitt það.
Hér sjáið þið farðann, Skin Luminizer – mér finnst umbúðirnar alveg æðislegar, gylltar og hátíðlegar og smellpassa fyrir afmæli merkisins. Eins og þið sjáið er hightlighterinn aðskildur frá farðanum í umbúðunum en þegar þið pumpið farðanum út þá blandast hann fallega saman við farðann. Ég nota Buffing burstann frá Real Techniques til að bera farðann á. Til að fá fallega áferð á litinn finnst mér nauðsynlegt að nota bursta í hann. Farðinn þornar líka fljótt, hann verður alveg mattur – alveg hreint ótrúlegt – og þá er gott að vera með burstann við hendina.
Hér sjáið þið svo húðina þegar farðinn er kominn á hana…
Mikill og fallegur ljómi – en húðin er alveg mött!
Á sama tíma og farðinn kom í sölu kom Eye Luminizer Brightener – ljómahyljarinn líka. Hann er léttari en farðinn en gefur þennan sama ljóma og þéttari þekju. Hann þornar ekki eins hratt og farðinn og því í góðu lagi að nota bara fingurna. En ég notaði þó í þetta sinn Deluxe Crease burstann frá Real Techniques.
Á húðina bætti ég svo smá sólarpúðri og örlitlum kinnalit – maskarinn sem ég prófaði þarna í fyrsta sinn er Masterpiece Transform frá Max Factor líka og kom mér sérstaklega á óvart.
Burstinn er einfaldur og kemur skemmtilega á óvart. Brustinn er úr gúmmíi og stilkarnir eru alls ekki langir og vegna þess þykkir maskarinn augnhárin vel alveg frá rótinni og upp. Ég lofa að sýna ykkur hann betur á næstunni en ég vildi bara svona aðeins kynna ykkur fyrir honum – ég held hann sé nefninlega ekki kominn í verslanir svo þið fáið betri færslu þegar hann er kominn.
Mér finnst áferðin í farðanum virkilega falleg og ég er alveg ástfangin af ljómanum. Liturinn og áferðin frá farðanum gefur húðinni virkilega heilbrigða áferð. Kosturinn við farðann er líka sá að það er óþarfi að nota púður með honum, hann verður alveg mattur svo þið sem eruð með olíumikla húð en viljið hafa heilbrigðan ljóma ættuð að skoða þennan.
Hyljarann nota ég svo til að fullkomna áferð farðans og set hann t.d. í kringum augun, varirnar og upp eftir nefinu.
Skemmtilegur farði frá Max Factor á góðu verði sem ætti að henta þeim sem vilja heilbrigða og ljómandi húð.
EH
Vörurnar sem ég skrifa um hér fékk ég sendar sem sýnishorn. Það hefur þó engin áhrif á álit mitt á vörunum og eins og alltaf veiti ég hreinskilið álit.
Skrifa Innlegg