Það hefur kannski ekki farið framhjá ykkur að vorlínan frá Chanel hefur ratað í verslanir. Línan í ár nefnist Chanel Notes De Printemps.
Línan inniheldur, púður, kinnaliti, varaliti, staka augnskugga og augnskuggapallettur í einstaklega frísklegum litatónum eins og bleikum, fjólubláum og rauðum. Línunni er ætlað að leggja línurnar fyrir það sem koma skal á árinu 2014 – það fer svo sannarlega vel af stað hjá Chanel alla vega.
Ég fékk að prófa þrjár vörur úr línunni sem þið sjáið hér fyrir neðan…
Varaliturinn er af tegundinni Rouge Allure Velvet. Eins og nafnið segir til um þá gefur varaliturinn vörunum flauelsmjúkan lit – áferðin er í alvörunni eins og flauel. Varaliturinn fer mjög auðveldlega á varirnar og liturinn er þéttur. Bleiki liturinn er frekar kaldur og það glampar mjög fallega af litnum. Þetta er frísklegur litur fullkominn fyrir sumarið!
Auk þess þá doppaði ég litnum létt í kinnarnar svo húðliturinn tónaði við varirnar.
Augnskugginn sem ég ákvað að bleyta uppí og gera eyeliner með er af tegundinni Illusion D’ombre. Með augnskugganum fylgir bursti sem ég bleytti uppí og geri svo eyelinerlínuna með.
Liturinn á augnskugganum nefnist Diapason og er nr. 92. Hann er líka hægt að nota sem augnskugga en mér fannst kannski einum of augljóst að fara að gera með honum smoky augnförðun og langaði þess í stað að prófa eitthvað nýtt – ég er bara frekar lukkuleg með útkomuna.
Lok er það svo naglalakkið Charivari nr. 603. Liturinn er gráfjólublár en hann er frekar dökkur þegar hann er kominn á neglurnar. Hér fyrir neðan er ég búin að setja tvær umferðir af litnum og takið eftir því hvað glansinn er sérstaklega fallegur og mikill.
Það eru nokkur merki sem ég er alltaf spennt að fá að prófa nýjungarnar hjá og eitt af þeim merkjum er Chanel. Ég þarf endilega að gefa mér góðan tíma á næstunni til að fara að skoða almennilega restina ef nýjungunum þó ég vænti þess að það séu nokkrar vörur eflaust uppseldar nú þegar. Það eru fleiri en ég sem eru hrifnar af Chanel og nýjungunum þeirra.
Reyndar fór ég heim með eina nýjung í viðbót en það er nýtt krem sem nefnist Le Lift!
Segi ykkur frá því líka við tækifæri sem og niðurstöðunni frá tilraunadýrinu sem ég er búin að plata til að prófa það fyrir mig og bloggið :)
EH
Skrifa Innlegg