Ég hef smá auka orku eftir að hafa náð mér í hana með góðri slökun núna seinni partinn bæði í formi svefns og smá tíma fyrir sjálfa mig með kaffibolla á svölunum útfrá setustofunni á deild 22A. Ég ákvað því að skrifa smá til ykkar kæru lesendur bara til að láta ykkur nú vita að það væri í lagi með mig – svona miðað við allt saman.
Hér er ég í góðum höndum uppá Kvennadeild Landspítalans, haldin miklum verkjum í kvið og baki og bendir allt til þess að eitthvað sé í gangi í nýrunum á mér. Ég er búin að fara fjórum sinnum í ómskoðun, þónokkuð oft í blóðprufu og oftar hef ég verið látin skila þvagprufu. Ég er á sterkum verkjalyfum og nánast með áfastan kælipoka á mér hvert sem ég fer. Hér er svakalega vel hugsað um mig og ég veit ekki hvar ég væri ef ekki væri fyrir yndislega starfsfólkið sem er hér og heldur mér gangandi – svo ekki sé minnst á unnustann og soninn sem gera lífið svo yndislegt og gera allt fyrir óléttu konuna sína.
Það styttist í að krílið komi í heiminn og eins og staðan er núna tek ég bara einn dag í einu, ég held það sé langbest. Ég er ekki búin að eiga góða daga undanfarið og satt best að segja hef ég verið við það að gefast upp og ég hef mikið grátið. Það hlaut þó að koma að því að tárin færu að streyma undan álagi og kvíða en ég er á betri stað í dag. Í dag er andlega hliðin sterk en líkamlega hliðin er sárkvalin af verkjum sem vonandi fara að kalla þetta gott.
En í dag er boðið uppá brúna rúllutertu með kaffinu og það þurfti lítið annað til að gleðja mig í dag og ég valdi mér sneiðarnar sem voru með mestu kreminu á milli.
En ég vildi bara líta við og segja hæ, ég er á lífi – það er allt í góðu með barnið sem verða bestu verðlaunin fyrir erfiði síðustu vikna og ég hlakka meira og meira til með hverjum deginum að fá að kynnast því og fá að njóta þess að fylgjast með strákunum mínum kynnast því líka og við fáum að verða fjögra manna fjölskylda.
Takk fyrir allar fallegu kveðjurnar, hugsanirnar, straumana og orkuna sem þið hafið verið að senda okkur síðustu vikur – það er ómetanlegt og yndislegt að finna hvað maður á góða að***
EH
Skrifa Innlegg