Áfram höldum við með Estée Lauder gleðina! Nú langar mig að sýna ykkur enn betur farðanir sem ég gerði með pallettunni úr sumarlínu merkisins Bronze Goddess sem er nú fáanleg á sölustöðum merkisins hér á landi.
Pallettan er ofboðslega falleg og það er sumarlegur fílingur yfir henni allri, litunum, áferðinni og ekki síður pakkningunum…
Eins og þið sjáið hér fyrir neðan eru 8 mismunandi litir í pallettunni, það er smá ólík áferð á milli fyrstu fimm skugganna og seinni þriggja en þeir síðustu finnst mér með ennþá sterkari litapigmentum en þeir fyrri og þið sjáið það sérstaklega vel á milli farðananna sem ég gerði því ég gerði einmitt eina með brúntóna litunum og aðra með sterkari litunum.
Mér finnst þessi palletta alveg tryllingslega flott en ég eins og eflaust margar aðrar konur er alveg sjúk í pallettur í augnablikunu og hef alveg sérstaklega mikinn áhuga á að safna mér nokkrum góðum. Það er bara svo gott að vera nokkrar sterkar og flottar augnskuggapallettur í mínu starfi því það er svo þægilegt að ferðast með svona gripi – svo auðvelt að pakka þeim og stafla bara saman :)
Ég heillaðist fyrst og fremst af bleiktóna litnum í miðjunni, mér finnst hann ennþá alveg sá flottasti í pallettunni. Ég ákvað að gera bara svona ekta bananaskyggingu og nota þennan bleika dáldið svona sem aðalnúmerið.
Ég nota í raun alla skuggana og bara í röð – sá dekksti er innstur, svo kemur sá næsti, svo fer næst ljósasti yfir allt augnlokið, sá ljósasti er highlighter í innri augnkrók og fyrir neðan augabrúnina og loks fer sá bleiki á mitt augað og er notaður til að blanda öllum saman. Ég ákvað svo að nota þann allra dekksta í pallettunni þennan sem er alveg lengst til hægri til að ramma inn augun í staðin fyrir að nota eyeliner.
Mér finnst þetta persónulega mjög áferðafalleg og hlý förðun og hún fer mér svakalega vel – sry en ég er svo hrifin af því að vera með svona brúntóna smokey um augun!
Svo er núna komið að ýktari litunum og hér er kannski meiri kvöldförðun því förðunin hér að ofan myndi sannarlega virka líka bara dags daglega fyrir þær sem hafa gaman að setja upp flotta augnskugga á daginn.
Förðunin er mjög einföld og fljótleg í framkvæmd en ég byrja á því að taka dekksta litinn og ramma augnlokið sjálft inn, ég set hann sitthvorum megin við mitt augnlokið og dreifi svo vel úr litnum. Þegar blöndunin og áferðin er jöfn set ég græntónalitinn í miðjuna og blanda litunum saman. Svo tek ég aftur græna litinn og set hann meðfram neðri augnhárunum og blanda öllu vel og vandlega saman og mýki áferð litanna.
Loks tek ég svo gula augnskuggann sem kom mér alveg svakalega skemmtilega á óvart, þessi er alveg sjúklega flottur til að gefa augunum ljóma og ég notaði hann miklu meira en ég var eiginlega búin að plana. Ég setti hann í innri augnkrókinn og dreifði líka bara úr honum yfir mitt augnlokið.
Mér finnst þessir tónar alveg æðislegir og komu miklu betur út en ég átti von á. Litirnir blandast svo ótrúlega fallega saman og þetta var bara ekkert mál þó ég segi sjálf frá. Nú þarf ég bara að ná mér í aðeins meiri lit á húðina og þá verða þeir ennþá fallegri á sólkysstri húðinni minni. Reyndar er planið að bera á sig St. Tropez olíunni núna um helgina og ég held barasta að ég kýli á það – það er ótrúlegt hvað fallegur litur á húðinni getur gert mikið fyrir mann. Leyfi ykkur að sjálfsögðu að fylgjast með útkomunni ;)
Hér fyrir ofan eru svo aukavörurnar tvær sem fullkoma lúkkið en það er þykkingarmaskarinn Sumptuous Extreme Lash Multiplying Volume Mascara – bara algjörglega klassískur maskari sem er svartur og þekur vel – þið þekkið mig ég set bara eina umferð af maskara og breytti ekki til í þessum lúkkum. Svo gef ég húðinni undir augunum meiri ljóma með hjálp Brush on Glow BB ljómapennans og set líka svona aðeins undir augabrúnina bara til að mýkja áferð augnskugganna enn frekar.
Tvö mjög ólík lúkk sem þið getið gert með pallettunni – þetta eru svona kannski frekar augljós lúkk að gera en það er samt gaman að nota svo litina á ólíkan hátt og nota þá sterkari hægra megin staka og með þá ljósari litunum vinstra megin í alls kyns skemmtileg lúkk!
EH
Vörurna sem ég skrifa um hér hef ég annað hvort keypt eða fengið sendar sem sýnishorn. Það hefur þó engin áhrif á álit mitt á vörunum og eins og alltaf veiti ég hreinskilið álit. Engin greiðsla er þegin frá Estée Lauder fyrir þemavikuna – mín eigin hugmynd og framkvæmd :)
Skrifa Innlegg