Fyrir mánuði síðan breyttist heimurinn minn – ég varð mamma. Ég eignaðist fallegasta barn sem ég hef nokkurn tíman séð og ég get bara ekki hætt að horfa á hann og dást að þessu litla kraftaverki. Síðan ég fékk hann í hendurnar hef ég varla hugsað um annað en hvað ég er heppin og hvað það er ótrúlegt að við höfum getað búið til barn, manneskju sem treystir á okkur og við fáum þann heiður að fá að ala hann upp, kenna honum hvað er rétt og rangt og fá að njóta dásamlegra stunda með honum. Nú á ég fjölskyldu<3
Tinninn minn er svo vær og góður, mömmunni finnst hann fullkomið barn eins og án efa öllum mæðrum finnst um sín börn. Hann sefur alla nóttina, drekkur vel, þyngist, pissar og kúkar og brosir svo blítt.
Ég heyrði sögu um daginn um litla stelpu sem var úti að labba með mömmu sinni. Sú litla tók upp eitthvað af götunni og setti uppí munninn, mamman sagði henni að taka það útúr sér því það væri skítugt og ábyggilega þakið í bakteríum. Stelpan spurði þá mömmuna hvernig hún vissi allt þetta og mamman sagði henni þá að það hafi verið á mömmuprófinu. Stelpan hugsaði sig vel og lengi um og sagði svo við mömmu sína “aaaa… og ef þú fellur á prófinu þá verðurðu pabbi”. :) – Ég vona að Tinni fái einhver tíman svona uppljómun að mamma hans sé klárust í heiminum – þó svo að pabbi hans yrði ábyggilega smá öfundsjúkur.
Nú finnst mér ég vera búin að taka nógu langa pásu frá blogginu því mig er farið að dauðlanga að skrifa fullt af færslum! Svo frá og með deginum í dag er ég mætt aftur og get ekki beðið eftir að fá að deila með ykkur fleiri sýnikennslum, snyrtivöruumfjöllunum, innblæstri og sögum úr lífi nýbökuðu móðurinnar sem er ástfangin af Tinna litla <3
Svo er ég að taka að mér fyrsta makeup verkefnið síðan í október núna um helgina. Það var svo góð tilfinning að taka fram förðunarpenslana í gær þegar ég fékk einn af keppendunum í Söngvakeppni Sónvarpsins í prufuförðun til mín. Það verður æðislegt að eyða helginni í Hörpunni umkringd hæfileikaríku fólki. En nánar um þetta á morgun!
EH
Skrifa Innlegg