Það er ein snyrtivara eða förðunarvara sem ég fattaði um daginn að ég hef aldrei skrifað um – ég hreinlega veit ekki afhverju. Líklega vegna þess að þetta er sú snyrtivara (fyrir utan Great Lash maskarann frá Maybelline) sem er búin að eiga heima sem lengst í snyrtibuddunni minni eða síðan ég var 15 ára. Þetta er vara sem ég á alltaf, alla liti, gríp ótrúlega oft í og ég get alltaf treyst á.
Glossinn góði er frá Clarins. Ég kynntist honum fyrst þegar amma mín gaf okkur frænkunum einn á mann og ég veit ekki betur en við höfum allar fallið fyrir honum og notum hann allar enn – alla vega 2 af fjórum. Amma var nú svo voða sátt með að geta gefið okkur einhverja snyrtivöru sem við notum og viljum eiga svo hún gefur okkur reglulega nýja – svo ég á alla liti. En við amma vorum einmitt að ræða þessi gloss núna fyrir helgi og sammæltumst um að við þyrftum nú að fara að bæta á birgðirnar og ætlum að mæla okkur mót í snyrtivöruleiðangur í næstu viku.
Reyndar er ótrúlega lítill liturinn í þeim sem mér finnst þó passlegt því glossarnir minna mig meira á bara glansandi varasalva. Þeir eru nefninlega mjög léttir, næra varirnar vel og gefa þeim heilbrigðan glans. Svo kemur örlítill litur frá þeim – ég er með nude litinn á myndinni hér fyrir neðan. Glossin heita Instant Light – þau koma í svona túbu og eru með skásettum svampenda sem maður notar til að bera glossið á varirnar.
Ég þekki nú Clarins vörurnar ekki mikið en en þessum get ég ekki verið án og þetta eru uppáhalds glossin mín. Það er voða fínt að vera með eitt svona í töskunni þegar maður vill aðeins meiri glans en af varasalva – ég er einmitt oftast með eitt svona gloss og einn varasalva í töskunni og nota til skiptis eftir því sem mér finnst eiga við. Þau klístrast ekki en leka samt ekki til – þau ilma dásamlega og bragðast eins sem er fínt fyrir manneskjur eins og mig sem naga varirnar svo svakalega að ég ét allt af vörunum…. :/
EH
Varan sem ég skrifa hér um er bæði keypt af mér eða ömmu minni. Það hefur þó engin áhrif á álit mitt á vörunum og eins og alltaf veiti ég hreinskilið álit á vörunum.
Skrifa Innlegg