fbpx

DÁSAMLEGT RISOTTO MEÐ SVEPPUM OG SPÍNATI

AÐALRÉTTIRGRÆNMETIS- & VEGANRÉTTIRUPPSKRIFTIR

Risotto er einn af mínum uppáhaldsréttum og ég geri það oft á mínu heimili. Það tekur eilítinn tíma að útbúa risotto, þarf að standa yfir pottunum og hræra í svona 30-40 mínútur. Það er samt tvímælalaust þess virði og útkoman er dásamlega ljúffeng! Mér finnst mjög notalegt að gera risotto en ég mæli með að hafa góðan félagsskap og jafnvel eitt hvítvínsglas við hönd.

 
Fyrir 3-4
3 dl arborio hrísgrjón
9-10 dl grænmetissoð (vatn og grænmetisteningur)
Smjör
1 dl hvítvín
3-4 skarlottulaukar
1-2 hvítlauksrif
Salt og pipar
100 g spínat (1/2 poki)
250 g sveppir
2 dl parmesan ostur
Steinselja
Aðferð
  1. Skerið sveppi í þunnar og smáar sneiðar.
  2. Steikið sveppina upp úr smjöri og bætið svo spínatinu við. Saltið og piprið og takið til hliðar.
  3. Hellið vatni í pott og hitið. Bætið grænmetisteningi út í og hrærið saman við. Haldið grænmetissoðinu heitu á vægum hita.
  4. Skerið skarlottulaukinn smátt og steikið á pönnu upp úr ca. 2 msk af smjöri.
  5. Pressið hvítlaukinn út í og hellið arborio grjónunum saman við og hrærið.
  6. Þegar grjónin eru orðin smá glær á endunum hellið þá hvítvíninu út í og hrærið saman við. Þau eru fljót að drekka í sig hvítvínið.
  7. Hellið því næst 1-2 dl af grænmetissoði út í og hrærið. Þegar grjónin eru búin að drekka í sig soðið þá hellið þið aftur 1-2 dl af soði út í og hrærið. Gerið þetta koll af kolli þangað til að soðið er búið og grjónin tilbúin. Þau eiga að vera mjúk og rjómakennd. Ég mæli með því að smakka og ef þau eru ennþá seig bætið þá meira vatni við. Saltið og piprið eftir smekk.
  8. Dreifið svo rifnum parmesan ostinum, steinseljunni, sveppunum og spínatinu saman út í og hrærið. Gott að bera fram með volgu hvítlauksbrauði.
     

Mér finnst alltaf gaman að heyra frá ykkur ef að þið prófið! ;)

VERÐI YKKUR AÐ GÓÐU!

// HILDUR RUT

INSTAGRAM: @hildurrutingimars

TACO MEÐ BUFFALO KJÚKLINGI

Skrifa Innlegg