HÉR ERU #BYKOTREND VINNINGSMYNDIRNAR

Þá er loksins komið að því að tilkynna sigurvegara í Instagram leiknum #BYKOTREND sem staðið hefur yfir síðustu vikur. Þátttakan var alveg ótrúlega góð og mjög margar góðar myndir og aðrar hrikalega fyndnar sem voru sendar inn í keppnina. Ég ásamt dómnefnd á vegum BYKO höfum legið yfir þessum myndum síðustu daga og vorum sammála um að metnaðurinn var mikill og fjölbreytnin rosa góð sem gerði þetta ennþá skemmtilegra. Þegar ég mætti í BYKO í dag átti ég von á því að við myndum velja 3 myndir, ein fyrir aðalvinninginn 100.000 kr. inneign og tvær sem fengu aukaverðlaunin 35.000 kr. hvor, en vegna góðrar þátttöku, og mögulega vegna þess að við gátum ómögulega valið bara þrjár myndir til að vinna þá verða fjórir aukavinningar veittir! Og VÁ hvað það gladdi mig mikið því það er fátt skemmtilegra en að fá að gefa.

Hér að neðan má því sjá myndirnar 5 sem við völdum sem vinningshafa og byrjum á vinningsmyndinni sem hlýtur í verðlaun 100.000 kr. inneign í Hólf og Gólf í BYKO.

“Málverk? Oh nei! Þetta er verðandi eldhús glugginn í pínku litla húsinu okkar pínku litla Guðna. Við verslum svolítið mikið í Byko allskonar krúttlegt fyrir kofann.” @melfa05

Þessi mynd heillaði okkur öll, dásamlegt útsýni og vel hægt að gleyma stað og stund en þarna virðast miklar framkvæmdir vera í gangi. Til hamingju með 100.000 kr. inneignina Margrét Elfa!

// Svo eru það myndirnar sem allar fá í aukaverðlaun 35.000 kr. inneign í Hólf og Gólf sem við gátum ómögulega gert upp á milli.

“Hér er ekki ró, hér er ekki friður, hér er ekki hægt að sturta niður.” @rosabjorns

“Það eina í húsinu sem ekki hefur verið snert er baðherbergið á efri hæðinni. Það kemur að því einn daginn að öllu verði mokað út. Það er því gaman að eiga minningar um hið gamla.” @aslaugthorgeirs

“Next level bugun. Sagan af Safamýri er sagan endalausa.” @thordisv

Og svo er það þessi hér sem er sérstaklega skemmtileg, það var þó enginn texti við hana en oft eru orð óþörf. Hér er falleg fjölskyldustund í miðjum framkvæmdum. @gudrunthoroddsen

Ég óska vinningshöfum öllum innilega til hamingju með vinninginn sinn og við þökkum öllum kærlega fyrir þátttökuna en haft verður samband við vinningshafa eftir helgi ♡

#BYKOTREND / VINNUR ÞÚ 100.000 KRÓNA INNEIGN Í HÓLF & GÓLF?

Fyrir heimilið

#BYKOTREND leikurinn er í fullum gangi og ég skemmti mér mjög vel að fara í gegnum myndirnar sem þegar hafa verið birtar á Instagram um helgina. Byko endurtekur Instagram leikinn sem við vorum einnig með í vor en hægt er að vinna sér inn 100.000 kr. inneign í Hólf & Gólf deildinni hjá þeim sem er líklega draumur allra þeirra sem eru í framkvæmdum eða eru að hugleiða að breyta til á heimilinu. Ég fæ að vera gestadómari ásamt aðilum frá Byko og kem til með að birta vinningsmyndina hér á blogginu þann 22. september! Vinningsmyndin síðan í vor var frá Sólveigu Bergsdóttur og ég veit að vinningurinn kom sér ótrúlega vel þar sem hún var að taka í gegn sína fyrstu íbúð.

Núna ættuð þið öll að vera búin að fá nýja Byko bæklinginn inn um lúguna – ef ekki þá er hægt að skoða hann rafrænt hér. Leikurinn er kynntur á baksíðunni en þar er einnig tilkynnt að tveir heppnir geta nælt sér í aukavinning sem er 35.000 kr. inneign í Hólf & Gólf. Það er einfalt að taka þátt, það eina sem þú þarft að gera er að taka mynd af rými sem þarfnast yfirhalningar og birta myndir á Instagram merkta #bykotrend. Hafið í huga að reikningurinn ykkar þarf að vera opinn á meðan leiknum stendur til þess að við getum séð myndina. 

 

Hér er bæklingurinn góði sem kom inn um lúguna hjá flestum landsmönnum – hér er að finna mjög mikið fínt og góðar hugmyndir fyrir heimilið, á baksíðunni er svo mynd af yours truly svo þessi bæklingur fær aldrei að lenda í pappírstunnunni haha. Eitt þykir mér sérstaklega skemmtilegt við þetta samstarf með Byko er að núna ásamt fyrr í vor eru nánast einu skiptin sem karlmennirnir í mínu lífi vita af blogginu mínu, – sem afi kýs að kalla svart með hvítu. 

Hér að ofan er vinningsmyndin frá því í vor. Myndirnar hér að neðan valdi ég síðan af handahófi til að sýna ykkur hvað það eru fjölbreyttar myndir að taka þátt núna, mjög skemmtilegt að skoða yfir #bykotrend flokkinn á Instagram og enn og aftur klæjar mig í fingurnar yfir því að vera ekki í mínu eigin húsnæði svo ég geti verið í svona framkvæmdum sem hlýtur að vera alveg ótrúlega gefandi og skemmtilegt.

Á næstu dögum kem ég einnig til með að kíkja við í Hólf & Gólf í Byko og skoða hvað hægt verður að fá fyrir inneignirnar góðu og sýna hugmyndir á Snapchat. Ég hvet ykkur til þess að láta þennan leik ekki framhjá ykkur fara og mæli með því að deila færslunni áfram til þeirra sem eru á kafi í framkvæmdum og gætu vel nýtt sér þennan veglega vinning.

#BYKOTREND / VINNUR ÞÚ 100.000 KR. INNEIGN?

Núna stendur yfir stórskemmtilegur leikur á Instagram hjá vinum mínum í Byko en ég kem til með að vera gestadómari og aðstoða við valið á vinningsmyndinni en verðlaunin eru ansi vegleg! 100.000 kr. inneign hjá Hólf & Gólf í Byko sem er ótrúlega flottur vinningur og kemur öllum gífurlega vel sem eru í framkvæmdarhugleiðingum. Það eina sem þú þarft að gera til að taka þátt er að taka mynd af því rými sem þarfnast yfirhalningar, má vera baðherbergi, stofa, eldhús eða annað. Settu svo myndina á Instagram og merktu #bykotrend (mundu að til að taka þátt í leikjum á instagram þarf að hafa opinn reikning þó það sé einungis tímabundið).

Föstudaginn 21. apríl verður heppinn vinningshafi tilkynntur! Ef ég væri í mínu eigin húsnæði þá væri ég 100% búin að taka þátt í þessum leik, en hér að neðan má sjá nokkrar myndir sem þegar eru komnar í pottinn. Myndirnar valdi ég af handahófi en það eru ótrúlega margar skemmtilegar myndir komnar í pottinn sem hægt er að skoða undir merkinu #bykotrend.

Ekki missa af þessu!

Mamma ásamt vinkonum mínum senda mér núna á hverjum degi ólíkar Byko auglýsingar þar sem myndin af mér er með – ég hefði aldrei gert ráð fyrir því að þessi bæklingur ásamt leik yrði svona rosalega stór en það er virkilega gaman að taka þátt í svona verkefni með stórfyrirtæki og mikill heiður.

Fyrir ykkur sem fenguð bæklinginn ekki inn um lúguna ykkar þá er hægt að skoða hann í vefútgáfu hér – mæli með! Þar má finna drauma vegglampann minn ásamt fallegu flísunum sem við erum að flísaleggja bústaðinn með ásamt svo mörgu öðru fínu.

Hér að neðan má síðan sjá nokkrar myndir úr leiknum góða !

Ég mæli annars með að fylgjast með á Svartahvitu snapchat – það er einmitt smá framkvæmdarþema búið að vera í gangi þar ♡

ARNA & SIGVALDI: BAÐHERBERGIÐ TILBÚIÐ!

Baðherbergi

Það er aldeilis baðherbergjaþema í gangi hér á blogginu mætti segja og er því alveg tilvalið að sýna ykkur núna lokaútkomuna hjá þeim Örnu og Sigvalda sem við höfum fylgst með taka í gegn þeirra fyrstu íbúð. Stóra baðherbergjafærslan sem ég birti í gær -sjá hér- er að slá öll met og lítur út fyrir að okkur vanti bara smá loka spark í rassinn til að hefjast handa. Þó leggja ekki allir í svona miklar framkvæmdir eins og þau Arna og Sigvaldi en það er alltaf gott að fá innblástur!

1-400x627

Segðu okkur Arna hvað er að frétta frá því síðast? Núna erum við Sigvaldi loksins búin að taka í gegn alla íbúðina, eða það sem við ætluðum okkur að gera frá því við fluttum inn. Fyrir um ári síðan gerðum við smá bráðabirgða breytingar á baðherberginu en planið var alltaf að fara svo seinna í stærri breytingar sem nú hafa loksins átt sér stað. // Sjá færsluna hér.

Hvað er það helsta sem þið breyttuð núna? Við tókum út baðkarið og settum sturtu og skiptum einnig um vask og blöndunartæki ásamt því að flísaleggja.

17409464_10154461371071238_785654280_n

Hvaðan fenguð þið hugmyndir um útlit á baðherberginu? Þegar við byrjuðum á að fara yfir hugmyndir og útfærslur um hvernig við vildum hafa baðherbergið kom Pinterest og Instagram að góðu gagni. Sem betur fer erum við Sigvaldi oftast á sama máli með stílinn á heimilinu og því ekki erfitt fyrir okkur að vera sammála um hvað við viljum og hvað ekki.

Hvaðan völduð þið innréttingar og gólfefni? Við enduðum á að kaupa allt í BYKO, við byrjuðum á að kíkja á tilboðsdaga sem þá voru í gangi og skoðuðum úrvalið. Áður en við vissum af vorum við búin að finna allt sem okkur langaði í á baðherbergið og þökk sé Ástu snillingi hjá þeim að þá var þetta fljótt að smella saman, okkar sýn var komin á pappír og allt í takt við fjármagnið sem við vorum tilbúin að eyða í baðherbergið.

Eftir að við vorum búin að taka allar ákvarðanir með útlitið á baðinu fórum við aftur í Byko og fengum lokatilboð í allan pakkann, frá leigu á búnaði sem við þurftum í framkvæmdirnar yfir í blöndunartækin og flísar … og vá þvílíkur lúxuuuus að fá þetta allt bara á sama staðnum!

Er einhver sérstök hugsun á bakvið litaval og annað? Baðherbergið hjá okkur er ekki stórt auk þess sem það er gluggalaust, svo dökkir litir voru strax teknir út af borðinu til að minnka ekki rýmið og til halda einhverri birtu þarna inni. Við vildum hafa kósý inná baði og hafa þetta stað sem væri hlýr og notalegur.

1

Liturinn sem þau völdu á flísarnar var grár sem passar einnig vel við litinn á parketinu í íbúðinni.

4

Hvernig gengu svo framkvæmdirnar fyrir sig? Sigvaldi byrjaði á að strípa niður allt baðherbergið og vá hvað það kemur mikið ryk! Við mælum með fyrir alla sem ætla að fara í svona framkvæmdir að hafa mjög góða iðnaðarryksugu og plasta allt vel því það kemur ryk á staði sem þú vissir að væru ekki til. Við byrjuðum fyrsta daginn á að nota heimilisryksuguna og komumst fljótt að því að það væri ekki málið útaf fína rykinu sem kom og fórum því og leigðum góða iðnaðarryksugu í Byko sem létti okkur lífið talsvert.

Allavega… eftir að búið var að taka dúkinn, pússa allt niður og taka eins mikið ryk í burtu og hægt var að þá var byrjað að grunna veggina og gólfið með rakavörn. Eftir það hófst múrvinnan og gerð á sturtubotninum. Við vorum svo heppin að fá Alla (Alexander Óðinsson) vin hans Sigvalda sem starfar sem múrari til að koma og sýna okkur réttu handtökin við múrverkið en það er mjög mikilvægt að fá leiðbeiningar frá einhverjum sem er með þekkingu í að múra til að aðstoða við múrverkið því það er grunnurinn að þessu öllu saman og skiptir gríðalega miklu máli að það sé vel gert. Eftir góða kennslustund og múrinn kominn á þá var næst sett vatnsþéttifilma í allar kverkar eftir að Sigvaldi var búinn að setja upp falskan vegg meðfram lögnunum. Þar á eftir setti hann tvær umferðir af vatnsþéttifilmu á veggina og það látið þorna. Undirbúningsvinnan var mun tímafrekari en við bjuggumst bæði við en hún er mjög mikilvæg uppá að það komi ekki lekaskemmdir/rakaskemmdir undir flísarnar svo þessi vinna var vonandi öll þess virði.

Flísavinnan kom síðan mun betur út en við þorðum að vona enda algjört tilraunaverkefni hjá okkur. Lykilatriðið er að vera rosalega þolinmóður því þetta var mikil vandvirknisvinna og ég get ekki verið stoltari af Sigvalda að hafa náð að gera þetta sjálfur!

2-copy

Flísarnar sem við völdum heita Sintesi Eliementi Grigo og eru með mjög litla vatnsdrægni. Fúgan sem okkur var ráðlagt að nota er svo með vörn gegn bakteríum, sveppum og myglu og hentar því vel á baðherbergi, hún fékkst einnig í Byko.

Hvers vegna sturtu í stað baðkars? Ég er mikill aðdáandi að stílhreinum og stórum opnum sturtum og hafði áður leigt hús sem var með tvöfaldri risastórri walk in sturtu sem mig langaði svo mikið í. En þar sem við vorum með ákveðið budget í þetta verkefni þá þarf maður að minnka kröfurnar á sumum stöðum. Þar sem við vorum að nýta lagnir sem voru fyrir og vildum sleppa við að færa þær þá komumst við að samkomulagi um að hafa opna einfalda sturtu með stórum sturtuhaus. Við vildum bæði hafa sturtuna opna og með gleri en ekki hengi til að rýmið væri nýtt sem best og væri sem stílhreinast.

3-copy

Blöndunartækin sem þau völdu eru öll frá merkinu Grohe.

Hvernig gekk að koma öllu vel fyrir á þessu litla baðherbergi? Vaskurinn og innréttingin var smá höfuðverkur fyrir okkur í byrjun þar sem við erum með lítið pláss til að leika með en það voru til svo margar fallegar og stærri innréttingar sem okkur langaði í sem einfaldlega pössuðu ekki inná baðherbergið. Við vildum þó halda rýminu stílhreinu og skoðuðum mikið af vöskum og litum á innréttingu en enduðum alltaf í hvítu. Við fundum í Byko ferðinni þegar við vorum að velja flísarnar þennan vask og innréttingu sem hentaði mjög vel í rýmið og var á fínu verði svo við vorum ekki að velta þessu mikið meira fyrir okkur og erum við bara mjög sátt með hvernig þetta kom út.

Hvernig er svo tilfinningin að vera loksins búin? Í heildina litið erum við hrikalega sátt með útkomuna, við náðum þeim markmiðum sem við lögðum upp með, þ.e. að stækka rýmið, gera baðherbergið notarlegt og halda okkur innan budgets. Þeir þættir sem hjálpuðu okkur mest eru líklegast aðstoð Alla múrara við grunninn á baðherberginu, Youtube myndbönd og öll þessi ráðgjöf sem við fengum frá snilldar starfsfólki í Byko. Við Sigvaldi erum nefnilega ekki iðnmenntuð en erum að reyna að krafsa okkur í gegnum það að gera upp íbúð sjálf og það að geta gengið inn í verslun og fengið svör við því sem þér vantar er ómetanlegt og því vert að taka fram, því það eru svo sannarlega ekki allar verslanir sem eru með þá þjónustu eins og við vitum líklegast flest.

// Ég samgleðst þeim alveg innilega að vera loksins búin í framkvæmdunum og íbúðin orðin svona glæsileg, en eins og áður hefur komið fram þá voru allar breytingarnar gerðar í skrefum en ekki allt í einu svo verkin og kostnaðurinn voru yfirstíganlegri. Þeim tókst líka að klára allt í tæka tíð en það eru ekki nema örfáar vikur í að þau eignist sitt fyrsta barn og geta því verið róleg í hreiðurgerð. Takk elsku Arna og Sigvaldi fyrir að leyfa okkur að fylgjast með ♡

Næstu framkvæmdarfærslur verða svo af fjölskyldubústaðnum sem við erum á fullu að taka í gegn og einhver ykkar hafa þegar fengið að sjá smá af á Svartahvitu snappinu.

svartahvitu-snapp2-1