Gjafaleikur: Bitz Living

HeilsaHeimilið

Það er komið að virkilega fallegum gjafaleik hjá mér sem ég er búin að vera mjög spennt fyrir að deila með ykkur!

Í haust opnaði BAST – ný lífsstílsverslun á 1. hæð í Kringlunni. BAST er með fjölbreytt úrval af fallegri heimilis- og gjafavöru þar sem skandinavísk hönnun er áberandi. Sjálf hef ég mikinn áhuga á fallegum hlutum fyrir heimilið og er dugleg að safna mér í búið. BAST er strax orðin ein af mínum uppáhaldslífsstílsverslunum og er það einna helst vegna þess að þar fást vörurnar frá Bitz Living. Í samstarfi við BAST langar okkur að gefa einum heppnum lesanda veglegan pakka frá Bitz xx

Ég fór í BAST í vikunni og valdi vörur í gjafaleikinn. Ég hugsaði pakkann þannig að hann henti þeim sem eru að byrja að búa eða safna í búið og því er tvennt af hverjum hlut í stell – þó svo að allir geti að sjálfsögðu tekið þátt sem hafa áhuga á að eignast þessa fallegu hluti! Bitz er hönnun danska næringafræðingsins Christian Bitz og það er skemmtileg hugsun á bakvið alla hlutina í línunni, t.a.m. stærð diska út frá ráðlögðum skammti o.þ.h.


Gjöfin samanstendur af:

  • 2x Bitz diskum
  • 2x Bitz skálum
  • 1x Bitz eldfast mót
  • 2x Bitz göfflum
  • 2x Bitz hnífum
  • 2x Bitz skeiðum
  • Servíettupakka
  • Súkkulaði

Til að taka þátt:

1. Fylgið @bast.kringlan á instagram

2. Deilið þessari færslu

3. Skiljið eftir komment hér að neðan með fullu nafni 

Svo einfalt er það! (Ath. að það þarf að uppfylla öll skilyrðin til að komast í pottinn)


Dregið verður miðvikudaginn 20. desember

xx

Birgitta Líf
instagram & snapchat: birgittalif

Brúlla?

ÆfingarHeilsaWorld Class

Þessi græja er ein mesta snilld sem ég hef eignast! Mér fannst þetta frekar skringilega útlítandi brúsi þegar ég sá hann fyrst en um leið og ég fattaði hvað þetta var…brúsi sem er líka rúlla!? Hversu sniðugt!

Mér finnst mjög gott að rúlla líkamann hvort sem það er fyrir eða eftir æfingar (en það er efni í aðra færslu) og er alltaf með tösku í bílnum með allskonar æfinga”aukahlutum” þar sem foamrúllan mín er meðal annars geymd. Þessi taska kemur þó alls ekki alltaf með inn í ræktina og verður rúllan því alltof oft eftir úti í bíl þegar ég þarf á henni að halda. Að sameina þetta í eitt, vatnsbrúsa og rúllu, er því alveg ótrúlega hentugt því ég er ALLTAF með vatnsbrúsa á æfingum.

Mér finnst þetta svo ótrúlega sniðugt að ég gat ekki annað en deilt þessu með ykkur. Það skemmir ekki fyrir að brúllan er úr 100% endurvinnanlegu ryðfríu stáli og er BPA free. Við í World Class erum að selja Brúlluna bæði í stöðvunum og á vefversluninni: https://www.worldclass.is/frettir/brusi-eda-rulla/ 

Virkilega sniðugt í jólapakkann fyrir æfingafélagana!

xx

Birgitta Líf
instagram & snapchat: birgittalif

Sprettæfing: Pýramídi

ÆfingarHeilsa

Ég er alltaf með eina “go-to” sprettæfingu sem ég tek þegar ég veit ekki hvað ég eigi að gera á æfingu eða er ekki í gírnum. Það þægilega við hana er að hún er stutt og því engin afsökun að nenna ekki að taka hana. Nánast undantekningarlaust kemst ég í meiri æfingagír við að gera hana og enda oftast á að æfa meira. Hún kemur manni þannig vel af stað sama hvort hún er tekin stök, fyrir æfingu eða eftir æfingu.

Ég byrja oftast á að rölta eða skokka í ca 5 mín áður en ég tek sprettina en æfingin sjálf er ekki nema 15 mínútur og maður svitnar VEL! Ég kalla hana pýramídaæfinguna þar sem ég hækka hraðann eftir hvern sprett þangað til “toppi” pýramídans er náð og lækka svo aftur niður smám saman í byrjunarhraðann. Ég hækka/lækka alltaf um 0.7 km/klst á milli spretta. Ég hef prófað að hafa hraðabreytinguna bæði minni og meiri en mér finnst 0.7 best. Það er ekki of mikil hraðabreyting en samt sem áður mjög krefjandi – þetta á ekki að vera auðvelt! Við viljum alltaf ögra okkur aðeins en fyrir þá sem eru að byrja er bæði hægt að auðvelda æfinguna með því að taka færri spretti (og þá er “toppurinn” lægri hraði og þá lækkað aftur niður) eða gera hana erfiðari með því að fjölga sprettunum og þá verður “toppurinn” hærri/hraðari! Ég hvet ykkur til að lækka ekki hraðann heldur taka frekar færri spretti og vinna ykkur smám saman upp í “alla” æfinguna. Sprettina hef ég 30 sek langa og í hvíldinni hoppa ég með fæturna af brettinu í 30 sek. Það er sama með þetta – hægt er að hafa sprettina lengri og hvíldina styttri o.s.frv. en svona geri ég æfinguna oftast:

xx

 


Pýramídasprettir Birgittu Líf

 

#1: Hraði 13 km/klst í 30 sek
30 sek hvíld


#2: Hraði 13.7 km/klst í 30 sek
30 sek hvíld


#3: Hraði 14.4 km/klst í 30 sek
30 sek hvíld


#4: Hraði 15.1 km/klst í 30 sek
30 sek hvíld


#5: Hraði 15.8 km/klst í 30 sek
30 sek hvíld


#6: Hraði 16.5 km/klst í 30 sek
30 sek hvíld


#7: Hraði 17.2 km/klst í 30 sek
30 sek hvíld


#8: Hraði 17.9 km/klst í 30 sek (toppurinn)
30 sek hvíld


#9: Hraði 17.2 km/klst í 30 sek
30 sek hvíld


#10: Hraði 16.5 km/klst í 30 sek
30 sek hvíld


#11: Hraði 15.8 km/klst í 30 sek
30 sek hvíld


#12: Hraði 15.1 km/klst í 30 sek
30 sek hvíld


#13: Hraði 14.4 km/klst í 30 sek
30 sek hvíld


#14: Hraði 13.7 km/klst í 30 sek
30 sek hvíld


#15: Hraði 13 km/klst í 30 sek

 


Mér finnst alltaf gaman að fá hugmyndir af æfingum frá öðrum og sérstaklega svona þar sem maður getur síðan aðlagað að sínu stigi. Let’s run!

xx

Birgitta Líf
instagram & snapchat: birgittalif

Fusion Fitness Workshop

ÆfingarHeilsaWorld Class

Hóptímakennaranám World Class, Fusion Fitness Academy, er 10 ára og í tilefni af því eru tveir fremstu þjálfarar og hóptímakennarar Evrópu á leið til landsins. Um helgina er þessu fagnað með Fusion Fitness Workshop sem er hóptímaworkshop FYRIR ALLA, bæði áhugamenn jafn sem þá sem starfa í heilsu- og líkamsræktarheiminum!

Workshopið fer fram á laugardaginn 28. október í World Class Laugum en það samanstendur af fjórum tímum. Hægt er að taka þátt í workshopinu í heild eða koma í staka tíma en tímarnir eru:

Sweat HIIT Training (Anthony Forsyth)

Operation Tabata (Neil Bates & Anthony Forsyth)

Thriller – Dance Class (Neil Bates)

Fusion Pilates (Unnur Pálmarsdóttir)

 

“Viltu fá nýjar hugmyndir að hóptímum og þjálfun? Skemmta þér og svitna vel? Vertu velkomin á Fusion Fitness Workshop í World Class Laugum.”

 

Meiri upplýsingar um viðburðinn og tímana er hægt að nálgast á heimasíðu World Class en kennararnir koma frá Bretlandi og Íslandi og fer skráning fram á unnur@fusion.is

Persónulega er ég mjög spennt fyrir þessu og ætla að vera á staðnum til þess að svitna vel, læra meira um kennslu og síðast en ekki síst skemmta mér vel!

xx

Birgitta Líf
snapchat & instagram: birgittalif

Uppáhalds hafragrauturinn: Uppskrift

HeilsaUppskriftirWorld Class

Mér finnst fátt betra en að byrja daginn á góðum hafragraut enda veitir hann mér góða fyllingu og orku inn í daginn.

Í uppáhaldi þessa dagana er súkkulaði-cookiedough-chia-hafragrautur – og já hann bragðast eins vel og hann hljómar, ég lofa!

Ég smellti nokkrum myndum í morgun þegar ég eldaði mér grautinn sem sýna allt sem þarf, step by step. Grauturinn er mjög einfaldur og fljótlegur í gerð en virkilega bragðgóður. Uppskriftin er fyrir eina skál og finnst mér best að blanda öllum þurrefnum saman í litlum potti, bæta svo vökvunum við og hræra í þar til grauturinn byrjar að bubbla. Ég læt hann ekki sjóða heldur helli strax í skál.

Ég er oft spurð um hvaða prótein ég nota en það er cookie dough whey prótein frá All Stars (fæst hér: https://www.worldclass.is/vefverslun/faedubotarefni/). Mér finnst það langbest á bragðið og blandast vel í grautinn!

Súkkulaði-cookiedough-chia-hafragrautur:

1 dl hafrar (ég nota grófa)
30 g whey prótein
1 msk chia fræ
1 dl Mylk súkkulaði (mjólkurlaus)
1 dl vatn

Njótið vel!

xx

Birgitta Líf
instagram & snapchat: birgittalif

Útiæfing: Myndband

ÆfingarHeilsaLífiðNike

Nú er ein stærsta ferðamannahelgi ársins framundan og margir sem leggja leið sína í sumarbústað, útilegu, á útihátíðir o.s.frv. Jafnvel þeir sem ætla að vera heima yfir helgina geta notið þess að vera úti þar sem það spáir mildu og góðu veðri um allt land um helgina! Notalegt x

Ferðalög og frí þýðir ekki endilega að ekki sé hægt að taka æfingu heldur er um að gera að nýta náttúruna og það umhverfi sem við erum í til að æfa úti. Það þarf ekki alltaf tæki og tól til að æfa og finnst mér mjög skemmtilegt að breyta til.

Ég er stödd í Colorado og var mætt upp í Red Rocks, sem er frægt náttúrulegt útitónleikasvæði hér í Denver, klukkan sex í morgun til þess að ná sólarupprásinni. Útsýnið uppi í Red Rocks er stórfenglegt og hef ég nokkrum sinnum farið þangað á æfingu. Á morgnana og yfir daginn er fullt af fólki mætt upp í Klettafjöllin og nýtir tröppurnar þar til þess að taka öðruvísi æfingu. Colorado er mjög hátt uppi og að æfa uppi í Red Rocks tekur mun meira á en að æfa annarsstaðar – enda um 20% minna súrefni í andrúmsloftinu heldur en annarsstaðar vegna hæðarinnar! Ef þið eigið leið til Denver mæli ég með að gera sér ferð upp í Red Rocks, hvort sem það er til þess að æfa eða bara njóta útsýnisins.

xx

Ég setti saman æfingu þar sem engin tæki, tól eða annað þarf til og tók hana upp. Æfinguna er hægt að gera hvar sem er og hvenær sem er, bara að nota hugmyndaflugið ef það er brekka, tröppur, bekkur, steinn eða hvað sem er sem hægt er að nota að auki.

Æfingin byrjar á upphitun og svo gerði ég nokkrar fjölbreyttar æfingar fyrir allan líkamann. Ég mæli með að endurtaka hverja æfingu 10-20x, aðlaga æfingarnar að eigin getu og gera æfingahringinn 2-3x í gegn.

Upphitun:

3 km hlaup

Brekku/tröppusprettur

Æfing:

Framstig

Froskahopp

Dýfur

Armbeygjur; víðar og þröngar

Ganga niður í plankastöðu; miðja, hægri og vinstri hlið

Fótatillur

Kviðkreppur

Toe Touches

Creepdowns

Hnébeygjur

Pistols

Ég hljóp í Nike Zoom Vomero hlaupaskóm og skipti svo yfir í Nike Zoom Strong æfingaskó.

Ég hvet ykkur til að taka létta og skemmtilega æfingu um helgina, hvort sem er uppi í bústað, í ræktinni eða á Þjóðhátíð – manni líður alltaf svo vel af því að fá púlsinn upp og svitna smá.

Það er skemmtilegt verkefni framundan hjá mér í Eyjum um helgina sem ég hlakka til að sýna ykkur frá. Ég vona að þið eigið góða helgi og gangið hægt um gleðinnar dyr!

xx

Birgitta Líf

instagram & snapchat: birgittalif

Hotel Workout: Myndband

ÆfingarHeilsa

Ég var í stoppi í Minneapolis á mánudaginn og nýtti tímann í að slaka vel á, sofa út, æfa og að sjálfsögðu versla smá.

Ég reyni alltaf að hreyfa mig í stoppum þar sem mér líður svo vel eftir smá æfingu og finn að ég er hressari og betur stemmd fyrir flugið heim. Það þarf ekki mikið pláss eða tól til þess að taka góða æfingu en í þetta skiptið gerði ég 8 mismunandi æfingar á æfingabolta.

Ég póstaði æfingunum á instastory og fékk góð viðbrögð þannig að ég ákvað að vista æfinguna í heild og deila henni hér með ykkur. Æfingarnar er hægt að gera allar í “hring” eða bæta þeim stökum við ykkar eigið prógram. Ef þið takið þennan hring mæli ég með að gera hann þrisvar í gegn. Ég byrjaði á að hita upp með jöfnu hlaupi í 20 mín (hraði 10 – 12 km/klst) og endaði á góðum teygjum. Það eina sem þú þarft er æfingabolti og góða skapið!

xx

#1 – 10 pör
#2 – 10 pör
#3 – 10 endurtekningar (má sleppa ketilbjöllunum)
#4 – 10 endurtekningar á hvorn fót
#5 – 10 endurtekningar
#6 – 10 endurtekningar á hvorn fót
#7 – 20 endurtekningar
#8 – 30 endurtekningar

 

 

xx

Birgitta Líf
instagram/snapchat: birgittalif

Viðeigandi fyrirsögn?

ÆfingarHeilsaLífið

Á fimmtudaginn síðasta byrjaði ég daginn á góðri æfingu fyrir hádegi og hann endaði svo í ísbíltúr með vinkonum mínum – eins og svo oft áður. Þegar ég kom heim um kvöldið lá nýjasta tölublað MAN Magasín opið á eldhúsborðinu. Opnan innihélt viðtal sem bar fyrirsögnina:

Ísfíkill sem æfir allt að tvær klukkustundir á dag

Ég var búin að steingleyma að von væri á þessu viðtali við mig í júlítölublaðinu og fannst mjög fyndið að koma heim, eftir æfingu og ís, og sjá þetta. Fyrirsögnin á því mjög vel við! Ég æfi því mér finnst það bæði ótrúlega skemmtilegt og lætur mér líða vel en jafnvægi í bæði æfingum og mataræði er það sem heldur mér við efnið og er minn lykill að heilbrigðum lífsstíl.

Viðtalið er fastur liður í MAN Magasín þar sem spurt er út í heilsuvenjur ýmissa einstaklinga – hér eru mínar! (Smellið á myndirnar)

xx

Birgitta Líf
instagram/snapchat: birgittalif

RVKfit

ÆfingarHeilsaLífiðRVKfit

Mig langaði aðeins að segja ykkur frá RVKfit enda er það líklega ein helsta ástæða þess að ég er komin hingað á Trendnet að blogga. RVKfit er hópur sem samanstendur af sjö stelpum sem hafa mikinn áhuga á heilbrigðum lífsstíl og deila því á Snapchat undir nafninu RVKfit.

Þessar sjö stelpur eru ég og vinkonur mínar en í grunninn erum við bara vinkonuhópur sem elskum að hreyfa okkur, borða góðan mat og hafa gaman. Við höfum flestar þekkst í nokkur ár og tengjumst á mismunandi hátt innbyrðis en í rauninni kynntumst við sem hópur í World Class þar sem við vorum allar að vinna og æfa. Þetta þróaðist út í það að við vorum allar í þjálfun saman og vorum að spamma okkar eigin snöpp með æfingamyndböndum og út frá því kviknaði sú hugmynd að prófa að opna snapchat-aðgang þar sem við myndum skipta dögunum á milli okkar og sýna frá æfingum, mataræði, daglegu lífi og öðru skemmtilegu. RVKfit snappið var lítil hugmynd sem vatt uppá sig og í dag er þetta stór partur af lífi okkar allra og höfum við fengið fullt af skemmtilegum tækifærum út frá þessu – bæði sem hópur og einstaklingar.

Fylgjendahópurinn okkar stækkar með hverjum deginum og það er ekkert smá skemmtilegt að fá hrós og skilaboð sem hvetur okkur áfram að halda áfram með snappið og gera fleiri hluti út frá því. Það að heyra að við höfum hvetjandi áhrif á aðra er enn meiri hvatning fyrir okkur sjálfar á æfingum! Þrátt fyrir að hafa allar verið vanar að æfa flesta daga og huga að heilsunni held ég að ég tali fyrir hönd hópsins að áhuginn hefur bara aukist eftir að við byrjuðum með snappið og erum við duglegar að prófa okkur áfram og læra nýja hluti í ræktinni. Þrátt fyrir að rauði þráðurinn á snappinu sé heilbrigður lífstíll þá eru dagarnir okkar ólíkir enda erum við fjölbreyttur hópur af sjö stelpum með mismunandi líf og áhugamál. Ég held að fólk tengi við okkur allar á mismunandi hátt og það er akkúrat það sem gerir þetta fjölbreytt og skemmtilegt.

,,Heilbrigður lífsstíll er í okkar huga góð blanda af hollu matarræði ásamt reglulegum æfingum en við í RVKfit einblínum á jafnvægi bæði hvað varðar mat og æfingar. Það sem einkennir RVKfit er að hópurinn er fjölbreytt blanda af ósköp venjulegum stelpum sem lifa hvorki við öfgar í æfingum né mataræði. Hjá okkur skiptir jafnvægið höfuðmáli en heilbrigður lífsstíll er eitthvað sem þarf að geta viðhaldist ævilangt.”

Auk snappsins erum við með Facebooksíðu þar sem við reynum að vera duglegar að setja inn uppskriftir, æfingar og annað af snappinu þar sem það er aðgengilegt lengur en í 24 tíma.

Mig langar að kynna ykkur betur fyrir stelpunum og gera það að vikulegum lið í sumar hér á blogginu – en þangað til getið þið “kynnst” þeim og fylgst betur með okkur á snappinu. Það að eiga vinkonur sem hafa sama áhugamál er virkilega dýrmætt og einn skemmtilegasti tími dagsins er að mæta á æfingu þar sem félagsskapurinn eru bestu vinkonurnar!

xx

Birgitta Líf
instagram: @birgittalif
snapchat: birgittalif