Trendnet

Loksins. Hér kemur það, langt brúðkaupsblogg !

Að skipuleggja og halda gott brúðkaup er ekki hrist fram úr annarri erminni bara sí svona. Það er að mörgu að huga og því ágætt að fá hugmyndir frá öðrum sem maður getur svo bara sniðið eftir sínu höfði.

Ég held að við höfum haldið ansi gott brúðkaup og því langaði mig að deila þessu með ykkur. Það má vel vera að þetta sé eitthvað sem hægt er að kalla “2007” en ég nenni ómögulega að fá svoleiðis komment hérna í kommentakerfinu. Við ákváðum að hafa brúðkaupið okkar svona og erum alsæl með það.

Ég vil byrja á að mæla með Reykjavík Letterpress sem sáu um að gera boðskortin okkar. Ótrúlega klárar stelpur sem þar vinna og geta gert mjög kúl boðskort. Það er líka skemmtilegt að persónugera frímerkin t.d með mynd af ykkur en það er mjög auðvelt að gera það á posturinn.is. Hér getið þið séð okkar boðskort.
Hverjum á svo að bjóða í veisluna er svo einn af hausverkjunum en okkar mottó var bara að bjóða þeim sem okkur langaði til að bjóða. Ég bauð t.d vinkonum systra minna, því mér þykir þær skemmtilegar.

Ég vil síðan mæla með góðum tímasetningum og staðsetningum. Það skiptir miklu máli að hugsa það aðeins ! Brúðkaupsdagurinn okkar er 16.júní en við ákváðum þann dag því þá er alltaf frídagur daginn eftir þegar við eigum brúðkaupsafmæli. Athöfnin í kirkjunni okkar byrjaði klukkan 16:30 en það er vinsælasta tímasetningin, held ég, því það passar vel uppá borðhaldið. Við giftum okkur í Dómkirkjunni, héldum veisluna í Norðurljósasal Hörpu og sváfum síðan á Hótel Borg á brúðkaupsnóttina ( og ég einnig daginn fyrir brúðkaupið ásamt mömmu minni og systrum). Allt er þetta á sama blettinum ! Gestirnir gengu því á milli staða í blíðskaparveðri, með stuttu stoppi á kaffihúsum borgarinnar áður en í veisluna var haldið. Ég frétti að það hafið verið frábær stemning í því. Við hlupum síðan uppá hótel með smá aðstoð frá leigubíl þegar veislan var búin og það var einstaklega skemmtilegt.

Þegar gestirnir okkur mættu í veisluna í Hörpu tóku á móti þeim ljúfir tónar í boði bræðranna Óskars og Ómars Guðjónssona. Þeir spiluðu á kontrabassa og gítar. Fólk gat gætt sér á frönskum makkarónum og skolað þeim niður með ýmsum drykkjum en ég frétti að mojito-inn hafi verið sérstaklega góður. Á meðan fórum við í myndatökuna og vonandi vorum við ekki of lengi í henni. Við reyndum að stilla tímanum í hóf og vorum ekki lengur en 50 mínútur. Ég held það megi ekki taka mikið lengri tíma en það.

Myndatakan okkar fór að mestu fram í Laugarnesfjöru. Ég hafði hringt í ljósmyndarann fyrir brúðkaupið og sagði henni mínar pælingar hvað myndatökuna varðar. Ég hugsaði til dæmis kjólinn minn mikið útfrá myndunum – ég vildi að hann fengið að fjúka um í íslenska rokinu. Hún útfærði hugmyndina síðan fullkomlega.

Skreytingarnar voru mjög stílhreinar en ég kaus að hafa orkideu á hverju borði, bóndarósir í vendinum mínum, helling af kertum og blöðrur með gasi í. Allt hvítt, að sjálfsögðu. Það er líka gaman að hafa minni útgáfu af vendi brúðarinnar sem hægt er síðan að kasta til kvennanna í veislunni.

Háborðið okkar var hringborð – en þá gátum við öll sem þar sátum spjallað vel saman. Og þar sem við kusum að hafa smáréttahlaðborð hófst borðhaldið stuttu eftir að við komum í veisluna. Hún elsku Tobba mín og veislustjóri sá um að setja veisluna ásamt elskulegum tengdaföður mínum sem bauð fólki að gjöra svo vel í stuttri og góðri ræðu.

Við ákváðum að hafa smáréttahlaðborð með fjölbreyttum réttum en þá getur fólk valið hvað það vill borða  og farið eins oft og það vill til að seðja hungrið. Það skapar einnig góða stemningu en fólk spjallar meira og hópurinn hristist betur saman en þegar þjónað er til borðs. Ég mæli sérstaklega með þessu !

Matseðillinn okkar var svohljóðandi:

Sushi, hellingur af sushi!
Crispy Duck með hoisin sósu
Nautaspjót með tilheyrandi sósu
Grænmetisspjót
Kjúklingaspjót með tilheyrandi sósu
Litlir hamborgarar
Klassískt sesar salat

og síðast en ekki síst var kokkurinn að skera nauta rib-eye ofan í gestina og með því var boðið upp á bernaise og franskar. Það sló alveg í gegn !

Í eftirrétt voru sígildar pönnukökur með sykri, cake pops og brúðartertur sem Dagbjört systir gerði að mestu leyti. Áfengi var í boði til klukkan 23 en eftir það var opinn bar.

Í borðhaldinu spilaði Kristján Sturla, snillingurinn sem hann er, klassísk og góð lög á píanó en það gaf einstaklega góða og ljúfa stemningu. Ég mæli mjög mikið með því !

Það var síðan heill hellingur af æðislegum ræðum og frábærlega skemmtilegum skemmtiatriðum sem fengu mig ýmist til að gráta úr hamingju og/eða gleði og færri komust að en vildu. En hún Tobba mín sá um að halda vel utan um það allt. Hún áminnti þá sem vildu tala mjög lengi með gulu spjaldi en sem betur fer fékk enginn rautt ! Ég verð henni ævinlega þakklát fyrir að taka þetta að sér fyrir okkur en hún stjórnaði veislunni algjörlega hnökralaust ! Takk enn og aftur elsku Tobba mín.

Ingó Veðurguð hélt síðan uppi fjörinu í partýinu með dyggri aðstoð Jóns Ragnars og Biddu. Jesús minn, þvílíkt stuð, haha ! Emil söng reyndar líka og ég meira að segja líka. Guð, ég syng sko hræðilega eins og allir veislugestir fengu að sjá í gæsunarmyndbandinum mínu. En það er gott að fólk viti bara gallana manns – nú get ég t.d sungið fyrir framan alla án þess að fólk detti niður dautt. Fólk getur þá a.m.k forðað sér áður.

Til að fá gestina út á gólf til að dansa er góð hugmynd að fá þann sem sér um dansiballið að spila lagið sem þið ætlið að dansa brúðarvalsinn við og svo um leið og brúðarvalsinn er búinn að setja eitthvað hresst og skemmtilegt lag á en þá koma allir út á gólf. Ég var búin að biðja mína nánustu að þegar líða tæki á dansinn okkar að koma út á gólfið til okkar og dansa með okkur smá rómó vals. Mamma dró afa út á gólf og tengdamamma dansaði við bróður sinn sem síðar tryllti dansgólfið, haha. Að lokum voru allir komnir út á gólf. Einhverjir töluðu um að hafa aldrei séð sal tæmast jafn hratt út á dansgólfið en það er víst það sem maður vill ! Og þá hófst partýið ! Og það var dansað fram á rauða nótt ..

——-

Eins og ég nefndi áðan að þá sváfum við mæðgin, við mæðgur og allar systur mínar saman á Hótel Borg daginn fyrir brúðkaupið. Það var æðislegt og setti algjörlega stemninguna fyrir daginn. Við spjölluðum langt fram á nótt, opnuðum freyðivín og skáluðum ( bindindismanneskjurnar sem við erum drukkum það þó ekki ) bárum á okkur brúnkukrem og áttum dásamlegt kvöld saman. Þegar ég vak

naði voru þær búnar að fara út í bakarí og leggja á borð. Oh, hvað mér fannst þetta geggjað ! Þarna gerði ég mér svo innilega grein fyrir hvað ég á bestu og frábærustu mömmu og systur í heimi. Ég hef alltaf vitað það en þarna var þetta eitthvað svo sérstakt. Ég get ekki þakkað foreldrum mínum nógu mikið fyrir að hafa búið til þessa frábæru og vel heppnuðu fjölskyldu ! Ég elska ykkur. Og allar gestina okkar líka. Ég vissi að við Emil ættum gott fólk að en við fengum það algjörlega staðfest að við eigum skemmtilegustu fjölskyldu og vini heims !!! =)

… Á meðan ég var á hótelinu hélt Emil hamborgarpartý heima fyrir fjölskylduna sína og vini – það er brilliant stemmari líka og ég mæli svo sannarlega með því !

Uppúr hádegi skiptum við um herbergi og fórum á svítuna en þangað mættu sminkurnar og hágreiðsludömurnar sem gerðu okkur stelpurnar fínar fyrir daginn. Guðbjörg Hulddís, Theodóra Mjöll og Sigríður Dúna sáu um að fegra mannskapinn og gerðu það svona líka ljómandi vel. Ég mæli svo sannarlega með þeim. Það varð reyndar smá misskilningur hjá mér, allt endaði á síðasta snúningi og því stóð ég nakin uppi á hóteli þegar ég átti að vera að ganga inn kirkjugólfið. Ég mæli ekki með svoleiðis misskilningi, passa að allt sé á hreinu, en ég mæli þó með því að finna sig allar til saman. Það var frábær stemning. Ljósmyndarinn okkar hún Aldís Pálsdóttir sem ég mæli svo hjartanlega með, mætti uppá herbergi og myndaði okkur við undirbúninginn og einnig þegar við svo gengum öll saman yfir í kirkjuna þar sem pabbi beið mín. Og allir hinir :)

Ég sá mig ekki áður en ég fór út af hótelinu. Ég setti ekki heldur eyrnalokkana í mig sem ég vildi hafa og fleira í þeim dúr. Æji, það er ekki gaman og ég verð smá svekkt þegar ég hugsað um þetta.

Emanuel var allan tímann í öruggum og góðum höndum elsku Katrínu minnar. Ég vissi ekki af honum en hann var í veislunni að ganga 22 held ég. En þá fór hún með hann upp á Hótel Borg í herbergið okkar og svæfði hann þar. Við kusum að hafa hann hjá okkur því hann var bara 6 mánaða og það heppnaðist rosalega vel með þessu fyrirkomulagi.

Yndislegu systur mínar og vinkonur með elsku Sonju mína í fararbroddi voru svo búnar að skreyta herbergið okkar með heilum helling af kertum og skilja eftir stóra körfu fulla af góðgæti. Ég hakkaði í mig roastbeef samloku um miðja nótt og mér fannst það geðveikt, hahah !! Í körfunni hékk síðan hjartablaðra. Æji, þetta var bara allt fullkomið.

Ég geti ekki mælt nógu mikið með Hótel Borg. Fyrir utan að vera flottasta hótel borgarinnar ( Lady Gaga var þar t.d líka ;) að þá er þjónustan þar sú allra besta sem ég hef vitað um. Það var stelpa sem heitir Heiða sem sá um okkar mál og ég á enn eftir að hringja og segja yfirmanninum hennar að betri þjónustu hef ég ekki fengið. Heiða, sem ég þekki ekki neitt, sá um að gera daginn okkar enn betri með einstakri þjónustulund og almennilegheitum. Ef þið þekkið Heiðu þá bið ég að heilsa ;)

Að morgni 17.júní vöknuðum við, við íslenska þjóðsönginn spilaðan á Austurvöllum. Það var algjörlega til að trompa daginn. Þetta var í einu orði sagt ÆÐISLEGT !!!

.. og hvað það var síðan skemmtilegt að hitta marga vini Emils óvænt á KFC í hádeginu daginn eftir. Það var frábært ! haha !

Eru ekki allir löngu hættir að lesa núna ? haha..

Tökum þá saman nokkur meðmæli:

Ég mæli með:

• Fyrst og fremst mæli ég með að hafa ALLT skriflegt þegar kemur að kostnaði og verðtilboðum. Ef þú ert ekki búin að sjá pistilinn minn varðandi það hér að neðan þá mæli ég með að þú lesir hann.
• Hörpu og starfsfólki Hörpudisks ! Þau fá 100% meðmæli. Allt algjörlega tipp topp hjá þeim eins og við var að búast.
• Hótel Borg. Flottasta hótel landsins með bestu þjónustuna.
• Dómkirkjunni – fullkomin að stærð og góð staðsetning
• Hlýralausum kjól ef þú ert með barn á brjósti. Ég kippti svo kjólnum bara niður og smellti Emanuel á í miðjum ræðuhöldum. Það er ekkert gaman að þurfa að fara bakvið til að klæða sig úr og gefa.
• Prestinum okkar honum Hafliða Kristins.
• Páli Óskari og Monicu. Þau spiluðu og sungu eins og englar, eins og þeim einum er lagið.
• Ingó Veðurguð. Betri partýhaldari er ekki til.
• Pétri Jóhanni, hann kemur öllum til að hlægja
• Aldísi Páls ljósmyndara. Ótrúlega fær á sínu sviði
• Fara á KFC og fá sér “post wedding” mat !
• Óskari Guðjóns og Ómari Guðjóns sem spila einstaklega flotta live tónlist.
• Live dinnertónlist gefur góða stemningu.
• Að vera með mömmu sinni, systrum eða vinkonum daginn/kvöldið fyrir brúðkaupið !
• Að finna sig til með þeim líka !
• Að hafa dresscode. Íslendingar klæða sig alltof mikið í svart, líka í brúðkaupum !
• Díönu Björk Eyþórsdóttur fyrir að gera neglurnar mínar svona fínar.
• Súrefnisandlitsmeðferð í Systraseli.
• Að hafa smáréttahlaðborð. Þá fá allir eitthvað við sitt hæfi og hópurinn hristist vel saman.
• Rib-eye, franskar og bernaise – það er killer blanda og allir fara glaðir heim.
• Að brúðguminn keyri sjálfur bílinn eftir kirkjuna. Það er talsvert meira kúl en að hafa bílstjóra.
• Sminkunni henni Guðbjörgu Hulddís og hárgreiðsludömunum þeim Theodóru og Sigríðu Dúnu.
• Hamborgara eða pulsupartý daginn fyrir brúðkaupið fyrir fjölskyldu og vini.
• Jóhönnu Bertu Bernburg – hún er snillingur í brúðardönsum.
• Að verðandi brúður fari í kalt fótabað og gangi í stuðningsokkum á meðan á undirbúningi stendur. Það hjálpar til að halda fótunum ferskum í háu hælunum.
• Að hafa hringborð sem háborð.
• Að gestirnir ráði sjálfir hvar þeir sitja við borðið – það er algjör óþarfi að raða fullorðnu fólki niður í sæti, finnst mér. 
• Að skrifa stutta og fyndna lýsingu á öllum gestum veislunnar og hafa á hverju borði fyrir sig. Þannig er kominn grundvöllur fyrir samræður innan borðsins og góð stemning skapast. Ég ætlaði að gera þetta en hafði að lokum ekki tíma.
• Að fara úr veislunni á undan gestunum. Þú vilt ekki lenda í því að standa og kveðja alla gestina..

Og svo það sem ég mæli ekki með:

• Að gleyma að taka mynd af ykkur brúðhjónunum með foreldrum og systkinum. Það er agalegt að hafa gleymt því !
• Að spara þegar kemur að ljósmyndaranum. Ég sé mjög mikið eftir því að hafa ekki haft professional ljósmyndara í veislunni líka.
• Að vera í tímaþröng með hár og förðun.
• Að brúðguminn sé steggjaður tvisvar sinnum vikuna fyrir brúðkaupið.

——-

Smá um brúðkaupsferðina þar sem ég fékk fyrirspurn í kommentunum.

Ég mæli með því að öll nýbökuð hjón fari í smá brúðkaupsferð. Sama hvort það er út á land eða erlendis. Það er svo hátíðleg stemning í loftinu dagana eftir brúðkaupið, maður vill helst svífa bara um á bleika skýjinu sínu og gera ekkert annað. Mér finnst líka vel við hæfi að hjón fari smá í burtu tvö ein og haldi uppá það að vera orðin gift !! Ég upplifði reyndar algjört spennufall líka. Sumir ( lesist við Emil ) höfðum var

la talað saman dagana fyrir brúðkaupið og því fannst mér brúðkaupsferðin mjög kærkomin til að endurnýja kynnin, ef hægt er að orða það þannig. Við fórum til Dubai í algjöra afslöppun en það hentaði líka Emil vel því hann var nýkominn heim eftir mjög langt season með Hellas. Fyrir áhugasama eru nokkrar myndir úr ferðinni okkar hér.

Það eru örugglega flest brúðhjón sammála mér en eftir brúðkaupsdaginn stendur eftir þessi djúpa og ólýsanlega þakklætistilfinning. Það er svo ótrúlegt hvað allri lögðust á eitt fyrir okkur og voru tilbúnir að leggja hönd á plóg svo að dagurinn yrði sem bestur. Ég hélt í alvörunni að ég myndi springa úr þakklæti dagana á eftir og ég verð ævinlega þakklát öllum fyrir þetta.

Ef þið hafið einhverjar spurningar varðandi brúðkaup eða brúðkaupsundirbúning og viljið spurja mig getið þið haft samband við mig á asareginsdottir@gmail.com en svo finnið þið mig einnig á facebook.