Þessi útgáfa af klassískum rækjukokteil er aðeins öðruvísi og slær alltaf í gegn. Ljúffengur réttur sem hentar sérlega vel sem forréttur um áramótin. Þetta hefur verið fastur réttur á mínum matseðli um áramót og er alltaf jafn gott! Avókadó og risarækjur með chili og hvítlauk, þessi hráefni smellpassa saman og ekki skemmir að þetta er bráðhollt. Hvítvín passar svo sérlega vel með. Mæli mikið með!
Uppskrift fyrir 4
2 avókadó
12 stórar tígrisrækjur, óeldaðar
1/2 chili
1 hvítlauksrif
Salt og pipar
Cumin
Ólífuolía
2 dl smátt söxuð gúrka
1-2 msk steinselja (eða kóríander) + til að skreyta
1/2 sítróna
Sósa
1 msk majónes
3 msk sýrður rjómi
Safi úr 1/2 sítrónu
1/2 tsk dijon sinnep
1/2-1 msk tómatsósa
5 dropar tabasco sósa
Salt og pipar
- Skerið chili og steinselju smátt, pressið hvítlauk og blandið saman við risarækjurnar ásamt ólífolíu og smá sítrónusafa. Kryddið þær með cumin, salti og pipar.
- Blandið saman í sósuna. Mæli með að þið smakkið ykkur til.
- Steikið risarækjurnar upp úr olíu á vel heitri pönnu þar til að þær eru orðnar bleikar. Ef þið viljið hafa þær vel sterkar þá mæli ég með að bæta við chili.
- Skerið avókadó og gúrku í litla bita. Blandið því saman í skál ásamt 1-2 msk af safa úr sítrónu og kryddið með salti og pipar eftir smekk.
- Dreifið öllu í fjórar litlar skálar eða glös og setjið risarækjurnar ofan á.
- Að lokum hellið sósunni yfir og skreytið með steinselju. Gott að bera fram með sítrónubátum.
Ég fékk glösin í gjöf frá Ramba store. Ótrúlega falleg!
Mér finnst alltaf gaman að heyra frá ykkur ef að þið prófið :)
VERÐI YKKUR AÐ GÓÐU & NJÓTIÐ ÁRAMÓTANA Í BOTN !
// HILDUR RUT
INSTAGRAM: @hildurrutingimars
Skrifa Innlegg