Trendnet

Dúnmjúkt og bragðgott brioche brauð og þeyttur ricotta ostur með ofnbökuðum tómötum. Þegar ég fór til Berlínar um miðjan október þá fékk ég alveg dásamlegt brioche brauð með þeyttum osti. Ég hef ekki hætt að hugsa um þetta síðan og ég varð að prófa að útbúa svona sjálf. Ég leitað eftir góðri uppskrift og datt inn á þessa eftir einn af mínum uppáhalds matarbloggurum, Half baked Harvest. Þetta heppnaðist alveg ótrúlega vel og vá hvað ég mæli með að þið prófið. Þetta er smá tímafrekt en samt sem áður alveg þess virði. Það er einnig gott að bera brauðið fram með þeyttu smjöri eða þeyttum fetaosti og ekki skemmir að drekka gott rauðvín með. Tilvalið sem forréttur. Svo mæli ég með að útbúa french toast úr brauðinu daginn eftir.

Aðferð

1. Blandið saman mjólk, geri, hunangi, 4 eggjum, hveiti og salti í hrærivél og notið deig krókinn. Hærið í 4-5 mínútur eða þar til hveitinu er vel blandað saman við hin hráefnin.
2. Bætið við smjörinu við stofuhita og hrærið í 2-3 mínútur í viðbót.
3. Setjið viskastykki yfir skálina og leyfið að hefast í 1 klst eða þar til deigið hefur tvöfaldast.
4. Stráið smá hveiti á borð og setjið deigið ofan á. Fletjið út deigið í 30×45 cm rétthyrning.
5. Leggið þunnar sneiðar af köldu smjöri á annan helminginn af deiginu og þrýstið varlega til að það festist. Brjótið saman hinn helmingnum af deiginu yfir smjörið og hyljið það alveg.
6. Fletjið aftur út deigið í 30×45 cm rétthyrning. Brjótið nú ⅓ af deiginu í miðjuna og brjótið svo hinn yfir efsta hluta fyrsta lagsins þannig að nú hafið þið 3 deiglög (eins og umslag).
7. Pakkið deiginu inn í plastfilmu og setjið í ísskáp í 15-20 mínútur þar til það hefur kólnað (einnig er hægt að kæla deigið yfir nótt í ísskápnum).
8. Smyrjið tvö 22 x12 cm brauðform.
9. Takið deigið úr ísskápnum og rúllið deiginu í um 30×45 cm rétthyrning. Rúllið deiginu í pylsu og haldið því þétt að ykkur á meðan þið rúllið. Skerið deigið í tvennt og setjið í brauðformin. Hyljið það með viskastykki og látið hefast í 45 mínútur-1 klst.
10. Pennslið deigin með þeyttu eggi og bakið í ofni við 180°C í 30-35 mínútur eða þar til brauðið er orðið dökkbrúnt að ofan. Látið kólna aðeins og berið fram með þeyttum ricotta osti eða því sem ykkur langar í.

Innihaldsefnin

Hnoða í hrærirvél

Fletja deigið út í 30×45 cm rétthyrning

Raða smjöri á helminginn

Brjóta saman

Fletja aftur út í 30×45 cm rétthyrning

Pakka deiginu saman í umslag og kæla

Rúlla í pylsu

Setja í brauðform, leyfa að hefast

Baka í 35 mínútur við 185°C