Mannréttindahreyfingin Amnesty stendur fyrir ljósainnsetningu í Hallgrímskirkju á morgun, föstudaginn 30.nóvember. Bréf til bjargar lífi er alþjóðleg herferð þar sem undirskriftum er safnað vegna 10 áríðandi mála fólks sem sætir mannréttindabrotum og þess krafist af stjórnvöldum að réttlætið nái fram að ganga.
Hin eina sanna Eliza Reid, forsetafrú, mun opna innsetninguna og við hvetjum ykkur til að kynna ykkur þessi 10 átakanlegu málefni sem lesa má um í stuttu máli neðar í færslunni.
GRÍPTU TIL AÐGERÐA — BRÉF ÞITT BJARGAR LÍFI!
Hvað er bréf til bjargar lífi?
Tilgangurinn er að vekja athygli á undirskriftaherferð Amnesty International, Bréf til bjargar lífi, sem í ár er helguð tíu baráttukonum fyrir mannréttindum um heim allan sem sæta grófum mannréttindabrotum. Hægt er að skrifa undir öll málin 10 í einu á www.amnesty.is.
Góðverk dagsins og tekur um 1 mínútu að skrifa undir öll málin!
Gestir geta lýst upp myrkrið sem mannréttindabrotin eru og tekið þátt í ljósainnsetningunni með því að skrifa undir málin á spjaldtölvu fyrir framan kirkjuna. Á framhlið kirkjunnar verður varpað 70 metra háu kerti og margvíslegu töfrandi sjónarspili og saman geta þátttakendur lagt sitt af mörkum til að halda loga kertisins lifandi auk þess sem undirskrift þeirra verður hluti af innsetningunni. Í ár kynnum við enn áhrifameira myndefni og skreytingar fyrir ljósainnsetninguna til sögunnar.
Málin sem tekin eru fyrir í ár eru allt mál báráttukvenna.
Nánar um öll málin:
Marielle Franco, Brasilía
Marielle Franco var óttalaus í baráttu sinni fyrir réttlátari og öruggari Rio de Janeiro. Hún barðist fyrir réttindum ungs fólks, blökkukvenna og hinsegin fólks. Hún gagnrýndi líka ólögmæt dráp lögreglu. Það var þaggað niður í henni þegar hún var skotin til bana í bíl sínum. Hún er ein af a.m.k. 70 mannréttindafrömuðum sem myrtir voru í Brasilíu 2017.
Amal Fathy, Egyptaland
Þann 9. maí síðastliðinn birti Amal Fathy myndband á Facebook þar sem hún deildi reynslu sinni af kynferðislegri áreitni, vakti athygli á umfangi vandans í Egyptalandi og gagnrýndi stjórnvöld fyrir að vernda ekki konur. Hún var handtekin í kjölfarið.
Pavitri Manjhi, Indland
Pavitri Manjhi tilheyrir samfélagi frumbyggja sem á það á hættu að verða rekið af landi sínu til að rýma til fyrir tveimur orkuverum. Pavitri stofnaði samtök sem lögðu fram næstum 100 kvartanir. Nú verður hún fyrir hótunum.
Sengwer-fólkið, Kenía
Sengwer-fólkið hefur aldagömul tengsl við Embobut-skóg. Skógarverðir hafa kveikt í heimilum og neytt þúsundir af landi forfeðra þeirra. Einn karlmaður hefur verið skotinn til bana og annar særðist alvarlega. Sengwer-fólkið er staðráðið í að verjast ofsóknunum.
Atena Daemi, Íran
Atena Daemi hefur verið ötul í baráttunni gegn dauðarefsingunni í Íran. Hún skrifaði stöðufærslur á samfélagsmiðlum, dreifði bæklingum og tók þátt í friðsamlegum mótmælum. Hún var dæmd í sjö ára fangelsi. Réttarhöldin tóku bara fimmtán mínútur og hún hefur sætt ofbeldi og niðurlægjandi meðferð í fangelsi.
Gulzar Duishenova, Kirgistan
Gulzar Duishenova er baráttukona. Drifkraftur hennar er að tryggja að fólk með fötlun fái að lifa lífinu með reisn. Hún verður daglega fyrir mismunun í samfélagi þar sem konur eiga ekki að hafa hátt og litið er á fólk með fötlun sem „ónytjunga.“
Nawal Benaissa, Marokkó
Nawal Benaissa berst fyrir bættum mannréttindum í Marokkó, þar sem margir íbúar upplifa afskiptaleysi af hálfu stjórnvalda. Hún hefur sætt árásum af hálfu stjórnvalda og hlaut skilorðsbundinn dóm fyrir að „hvetja til lögbrota“.
Nonhle Mbuthuma, Suður-Afríka
Nonhle Mbuthuma leiðir baráttu fyrir samfélag sitt gegn námufyrirtæki sem vill vinna títaníum á landi forfeðra hennar. Hún er áreitt, henni hótað og hefur lifað af morðtilræði. Reynt er að þagga niður í henni en hún hættir ekki baráttu sinni: „Ef land mitt er tekið er sjálfsmynd mín tekin frá mér.“
Vitalina Koval, Úkraína
Vitalina Koval leggur á sig mikla vinnu til að styðja við bakið á hinsegin fólki í heimabæ sínum í Úkraínu. Hún varð hins vegar fyrir hrottafenginni árás í kjölfar þátttöku sinnar í skipulagningu friðsamlegrar kröfugöngu. Vitalina neitar að láta hótanir og ofbeldi þagga niður í sér.
Geraldine Chacón, Venesúela
Geraldine Chacón aðstoðar við valdeflingu ungs fólks í heimabyggð sinni og hvetur það til að verja réttindi sín. Hún er hins vegar hundelt af yfirvöldum fyrir það eitt að reyna að bæta lífið í landi sínu.
Trendnet hvetur lesendur til að fjölmenna á þennan mikilvæga viðburð – látum ljós skína á þolendur mannréttindabrota og þrýstum saman á bjartari framtíð fyrir þessa einstaklinga og heiminn allan.
Innsetningin verður í gangi frá frá 30. nóvember til 2. desember, alltaf á milli kl. 17 og 22. Meira: HÉR
Trendnet vill einnig vekja athygli á netverslun samtakanna þar sem ágóði af vörum gerir þeim kleyft að halda áfram að vernda mannréttindi út um allan heim – mikilvægt. Verslun: HÉR
//TRENDNET
Skrifa Innlegg