Trendnet

Í samstarfi við Innnes útbjó ég franskar andabringur með steiktum kartöflum, kantarella sveppasósu og rósakáli með rjóma og parmesan. Þar sem við ætlum að halda fyrstu jólin heima þetta árið þá langar okkur að búa til nýjar hefðir og elda eitthvað sem við erum ekki vön að borða á jólunum. Við erum mjög spennt fyrir önd og ég prófaði andabringur frá Vallette á sunnudagskvöldið. Vá hvað þær eru ljúffengar og verða því líklegast í matinn á aðfangadagskvöld, Ég skoðaði fjöldan allan af uppskriftum á vefnum góða og þetta var útkoman – alveg ótrúlega góð! Gott er að bera öndina fram með t.d. waldorfsalati og það er algjört „must“ að steikja kartöflurnar upp úr andafitunni. Rósakál með rjóma og parmesan setur punktinn yfir i-ið og allt rennur þetta svo ljúflega niður með góðu rauðvíni. MMMmmmm…!

Uppskrift fyrir 2-3

Andabringur
1 frosin andabringa frá Vallette
Salt og pipar
Ferskt timían
Ferskt rósmarín

Sósa:
1 dl þurrkaðir kantarella sveppir
Smjör til steikingar
1 tsk smátt skorið ferskt rósmarín og timían
1 ½ msk smjör
3 msk hveiti
1 ½ dl vatn
2-4 tsk andakraftur frá Oscar
1 tsk púðursykur
Salt og pipar
2 dl mjólk
1 dl rjómi

Rósakál
5 dl ferskt rósakál
Smjör til steikingar
Salt og pipar
½ dl rjómi
½ dl rifinn parmigiano reggiano

Kartöflur eftir smekk

Aðferð:

Andabringur

1. Skerið tígla í fituna á andabringunni og passið að skera ekki ofan í kjötið.
2. Hitið pönnu og steikið andabringuna með fituna niður í 7-9 mínútur eða þar til fitan er orðin stökk. Ausið fitunni af pönnunni jafnóðum og notið til að steikja kartöflurnar.
3. Snúið andabringunni við og steikið í 1-2 mínútur.
4. Saltið og piprið eftir smekk. Setjið ferskt rósmarín og timían á andabringuna og klárið eldunina í ofninum í 12-15 mínútur við 180°C. Gott er að nota kjöthitamæli en kjarnhitinn á að vera 60 gráður. Andabringurnar mega alls ekki vera of mikið eldaðar því þá eru þær ekki góðar.
5. Leyfið kjötinu að hvíla í 10-15 mínútur og njótið.

Sósa

1. Skolið þurrkuðu kantarella sveppina og látið þá liggja í bleyti samkvæmt leiðbeiningum.
2. Steikið þá upp úr smjöri og bætið við fersku timían, rósmarín, salti og pipar eftir smekk. Takið þá til hliðar.
3. Bræðið smjör og bætið hveiti saman við. Hrærið í brauðbollu.
4. Bætið vatni saman við og hrærið þar til blandan er orðin þykk og mjúk.
5. Bætið andakrafti, púðursykri, salti og pipar og hrærið vel saman.
6. Hellið mjólk og rjóma útí og blandið kantarella sveppunum saman við. Þynnið sósuna með rjóma og kryddið eftir smekk.

Kartöflur

1. Steikið kartöflurnar upp úr andafitunni þar til þær verða smá stökkar. Kryddið eftir smekk og klárið eldunina í ofninum.

Rósakál

1. Hreinsið rósakálið, skerið stilkana af og kálið í tvennt.
2. Steikið á pönnu upp úr smjöri og kryddið með salti og pipar.
3. Setjið í eldfast mót, hellið rjómanum yfir og stráið yfir rifnum parmigiano reggiano. Bakið í ofnið við 180°C í 6-8 mínútur. 

VERÐI YKKUR AÐ GÓÐU & NJÓTIÐ!♥

// HILDUR RUT

INSTAGRAM: @hildurrutingimars