Gleðilegt sumar. Loksins er komið að árstímanum sem við höfum flest beðið eftir með eftirvæntingu, enda er veturinn búinn að vera langur og strangur. Með hækkandi sól verður allt betra. Í matreiðsluþáttunum mínum á Stöð 2 sem sýndir eru á fimmtudagskvöldum var ég með sérstakt sumarþema í síðasta þætti og lagði áherslu á einfalda, þægilega og bragðmikla rétti. Sumarið er tími til að njóta með fjölskyldu og vinum, það er fátt skemmtilegra en að fá góða gesti í mat og drykk og spjalla langt fram eftir kvöldi. Tala nú ekki um ef hægt er að sitja úti á palli eða svölum, með von um að við fáum hlýtt og gott sumar. Hér að neðan deili ég með ykkur tveimur sumarréttum sem ég mæli með að þið prófið. Njótið vel.
Sælkerasalat og frískandi sumardrykkur
Salat með hráskinku og melónusalsa
1 canteloup melóna
1 gul melóna
1 msk smátt skorin minta
1 msk smátt skorin basilíka
1 tsk hunang
300 g klettasalat
1 pakki góð hráskinka
Hreinn fetaostur, magn eftir smekk
150 g ristaðar furuhnetur
Balsamikgljái, magn eftir smekk
Aðferð:
Skerið melónur smátt niður, saxið kryddjurtir og blandið öllu saman í skál ásamt hunangi. Leggið klettasalat á fallegt fat eða disk, raðið hráskinkunni yfir salatið og dreifið melónusalsa yfir. Sáldrið fetaosti og ristuðum furuhnetum yfir salatið. Í lokin er mjög gott að dreifa balsamikgljáa yfir.
Frískandi sumardrykkur
3 greipaldin
2 límónur
Handfylli mintulauf
Sódavatn, magn eftir smekk
Aðferð:
Kreistið safann úr greipaldinn og límónu, hellið safanum í könnu og fyllið upp með sódvatni. Bætið mintulaufum út í drykkinn og hrærið í honum með sleif. Berið strax fram.
Fylgist með mér hér á Trendnet í sumar þar sem ég verð sérstakur gestabloggari.
Eva Laufey
Skrifa Innlegg