Trendnet

Það er allt fallegt sem hönnunarhjónin þau Karitas Sveinsdóttir og Hafsteinn Júlíusson koma að en þau reka bæði hönnunarstofuna HAF Studio og hönnunarverslunina HAF Store. Núna er einstaklega glæsilegt heimili þeirra við Laufásveginn komið á sölu og myndirnar eru stórkostlega fallegar og veita mikinn innblástur. Eitt fallegasta heimili landsins án efa og vá hvað það verður spennandi sjá næsta verkefni sem þau taka sér fyrir hendur.

Kíkjum í heimsókn,

    Ljósmyndari: Adela Auriga 

Sjá fleiri upplýsingar um eignina með því að smella hér 

Villa Copenhagen er eitt glæsilegasta hótelið sem ég hef heimsótt, staðsett í sögulegri byggingu frá árinu 1912 í hjarta Kaupmannahafnar við hliðina á Tívolí þar sem áður mátti finna pósthús borgarinnar. Byggingin var endurhugsuð með tilliti til nútímans og var gerð upp á einstakan hátt þar sem upprunalegum smáatriðum var vel viðhaldið,  en hér eru um 390 herbergi, veitingastaður, bar, gym, sauna og sundlaug ásamt ráðstefnu & veislusal. Ég mæli alveg innilega með heimsókn hingað ef þú átt leið til borgarinnar. Nú á dögunum kynntu þau glæsilega nýja íbúðarsvítu þar sem lúxusferðalangar geta haft það einstaklega ljúft í rúmgóðri íbúð og auk þess verið umkringd fallegri hönnun frá Ferm Living. Kíkjum í heimsókn,

Villa Copenhagen er eitt af mínum uppáhalds hótelum og ég gæti ekki mælt meira með.

“Out of the blue… something new” voru skilaboð frá Royal Copenhagen þegar aðdáendur danska postulínsstellsins voru á dögunum látin vita af væntanlegum nýjungum. Og ég varð strax spennt að sjá hvaða spennandi nýjungar væru að koma –  & VÁ ég átti ekki von á þessari fegurð. Coral Lace og Coral Fluted Half Lace eru tvær nýjar línur sem lit dagsins ljós en um er að ræða klassískar línur sem við flest þekkjum en nú í nýjum lit og engum öðrum en kóralbleikum – Coral! Innblásturinn var sóttur í litaskjalasafn Royal Copenhagen þaðan sem liturinn á rætur sínar að rekja til seinni hluta 19. aldar eftir að Arnold Krog var gerður listrænn stjórnandi og voru þá gerðar nokkrar sérframleiðslur fyrir Tiffany’s í New York, og urðu fyrir valinu ljósblár litur, emerald grænn og skær hindberjableikur sem varð núna að innblæstri fyrir splunkunýju Coral vörulínurnar.

Markmið hönnunarteymis Royal Copenhagen var að finna lit sem væri látlaus á borði og blandast vel saman við klassíska bláa stellið. Coral er bæði mjúkur og líflegur litur og er í senn nútímalegur og með tímalaust yfirbragð.

Algjörlega fullkomin viðbót og ég get ekki beðið eftir að eignast einn hlut í Coral litnum!

Fallegt ekki satt?

HönnunarMars er loksins hafinn og eins og síðustu þrjú ár þá er hátíðin ekki haldin í mars heldur í maí sem er að mínu mati miklu skemmtilegri tími til að vera úti að leika sér og labba á milli sýninga. Ég er nú þegar búin að drekka í mig íslenska hönnun sl. tvo daga og með helgina framundan er tilvalið að deila með ykkur mínum tipsum! Ég tók saman fyrir ykkur nokkrar sýningar sem ég mæli með að kíkja á um helgina en fyrir þá sem vilja baða sig í HönnunarMars þá er hægt að skoða dagskrána í heild sinni hér.

Hér má einnig sjá HönnunarMars tips í boði Andreu okkar –

UPPSPRETTA – VEST, Ármúli 17

Íslensk hönnun í sinni litríkustu mynd – Epal Skeifunni

“Sýningin Íslensk hönnun í sinni litríkustu mynd sýnir áhugaverða hönnun eftir hóp íslenskra hönnuða sem hafa náð góðum árangri á sínu sviði bæði hérlendis og sumir einnig erlendis.” Sýnendur: Arkitýpa, Anna Thorunn, Gæla, Ihanna Home, Urð, Dögg Design, Chuck Mack, Kormákur og Skjöldur ásamt Minarc. – Ath. Síðasti dagur sýningar er á laugardaginn”

ÁSMUNDARSALUR

Það er alltaf gaman að heimsækja Ásmundarsal og tilvalið að taka svo röltið niður Skólavörðustíginn á fleiri sýningar. “Átján hönnunarstúdíó frá Reykjavík og Seattle velta fyrir sér og túlka þýðingu orðsins „saman“ í gegnum persónulega reynslu, hugmyndir eða efnislega túlkun. Á sýningunni eru níu verkefni sem öll eru samstarfsverkefni hönnuða frá Reykjavík og Seattle, þar sem bæði ferlið og útkoman er túlkun þeirra á því hvað „saman“ þýðir. “

Smelltu hér til að skoða allar sýningarnar í Ásmundarsal.

BLÍÐUR LJÓMI – Gallerí Port, Laugavegi

“Hanna Dís Whitehead sýnir hér nýtt safn af verkum með áherslu á tvo staðbundna efniviði sem báðir finnast innan 3 km. radíuss við vinnustofu hennar í Nesjum, Hornafirði – hafra strá og ull. Á sýningunni má sjá fleti spónlagða með handlituðum hafra stráum, þæfða ull sem staðgengil viðar í húsgögnum auk annarra tilrauna með efniviðinn.”

BREEZE – Yeoman, Laugavegi.

HAFNARTORG

Á Hafnartorgi er ótrúlega mikið um að vera og margar spennandi sýningar að sjá. Ég mæli t.d. með að kíkja við í Mikado, GK Reykjavík, FÍT sýninguna, Handverk, Fólk Reykjavík og margt fleira. Smelltu hér til að sjá frekari upplýsingar eða skelltu þér á röltið og rambaðu inn á skemmtilegar sýningar í miðbænum.

„Af jörðu“ – Hverfisgata 50

“Á sýningunni má sjá glasagarða frá Vessel, húsgagnahönnun frá VIGT og Granítsmiðjunni ásamt sjónrænni nálgun Graen Studio á viðfangsefninu.” Ég er spennt að sjá þessa sýningu en hún er staðsett þar sem Mikado var áður.

GRANDI

BESPOKE RUGS – Sjöstrand Granda

“Kynnt verður lína af handunnum tuftuðum gólfmottum. Motturnar eru hannaðar af Lilý Erlu Adamsdóttur. Innblástur í hönnunina sækir hún í nátturuna; heiðarlyng, mosa og íslenskar bergtegundir. Hægt verður að panta mottu úr línunni en framleiðslan verður staðbundinn, hæg og handgerð.”

KIOSK – Grandagarði

Nýtt og fallegt frá Anitu Hirlekar og fleira fallegt. “Við fögnum komandi sumri og sýnum það nýjasta sem er í boði hjá merkjum Kiosk Granda.”

Smelltu hér til að sjá hvað er meira um að vera á Granda 

HÖNNUNARSAFN ÍSLANDS – Garðabæ

“Á sýningunni Hönnunarsafnið sem heimili má finna í kringum 200 dæmi um íslenska hönnun en safneign Hönnunarsafns Íslands telur í heild um 5000 muni frá árinu 1900 til dagsins í dag. Sýningin er sett upp sem grunnmynd af heimili en líkt og á heimilum fólks má sjá þar hlið við hlið muni frá mismunandi tímabilum. Húsgögn, borðbúnaður, fatnaður, bækur og textíll frá ólíkum tíma koma saman og varpa ljósi á brot af því sem íslenskir hönnuðir og handverksfólk hefur skapað.”

SAFNAHÚSIР– Hverfisgötu

GERÐARSAFN – Kópavogur

“ÞYKJÓ opnar sýningu í Gerðarsafni með fjölbreyttum hönnunarvörum teymisins; frá búningum til húsgagna og upplifunarhönnunar fyrir börn. ÞYKJÓ er þverfaglegt hönnunarteymi sem sérhæfir sig í hönnun fyrir börn og fjölskyldur.”

Þetta og svo miklu miklu meira – sjá hér! 

Eigið góða helgi ♡

VÁ er líklega það sem við flest hugsum þegar þessar myndir eru skoðaðar af glæsilegu heimili sem staðsett er í Stokkhólmi. Skrautlistar setja mikinn svip á heimilið og hver einasti veggur er sem konfekt fyrir augun skreyttur fallegum listum frá gólfi og uppí loft og útkoman er bæði glæsileg og hlýleg. Svíarnir kunna eins og svo oft áður að útbúa falleg heimili sem veita okkur mikinn innblástur. Sjáið þessa fullkomnu litapallettu í stofunni þar sem loftið er málað í mildum ljósgrágrænum lit á móti hlýjum ljósgráum veggjum og hvítir vegglistarnir og gereftin birta aðeins til og punkturinn yfir i-ið er að lokum gyllt smáatriðin. Ah svo fallegt heimili!

Ég er svo ótrúlega hrifin af hvernig hægt er að leika sér endalaust með lista og þeir gera öll rými glæsilegri. Ég mæli með að skoða þessar myndir vel og sjá hvernig listanir eru notaðir á fjölbreytta vegu, til að skipta upp veggjum, búa til fulningar á hurðir og útkoman er alveg æðisleg.

Ég hef verið að nota hér heima lista og rósettur frá ORAC DECOR sem eru frá Sérefni en úrvalið frá þeim er ótrúlega veglegt og einmitt í þessum anda sem sjá má á myndunum. Þú getur smellt hér til að sjá úrvalið. 

Myndir : Sjöman/Frisk fasteignasala

Þetta heimili er einmitt það sem ég þurfti að skoða til að finna aftur hvatninguna að klára að setja upp listana á okkar heimili ♡

// Ég kann ótrúlega vel að meta hverja deilingu eða smell við hjartað á þær færslur sem þér líkar vel við og það veitir mér mikla hvatningu að halda áfram og svo er auk þess svo miklu skemmtilegra að skrifa blogg þegar fleiri lesa færslunar. Takk fyrir lesturinn ♡

Ein af mínum uppáhalds verslunum Dimm fagnar 6 ára afmæli og í tilefni þess verður 20% afmælisafsláttur alla helgina. Auk þess mun einn heppinn viðskiptavinur sem verslar um helgina ( fimt – föst – lau – sun ) eiga möguleika á því að vinna 100.000 kr. gjafabréf! Það má svo sannarlega nýta þennan afslátt í æðisleg kaup en hjá Dimm má finna svo ótrúlega margt fallegt fyrir heimilið, fyrir sælkera og fyrir barnið.

Ég mæli með að skoða t.d. fallegustu stofumottur sem ég hef augum litið sem eru frá merkinu Cappelen Dimyr og eru núna með 20% afslætti, stofumottan mín er einmitt frá því merki og ég gæti ekki mælt meira með henni svo ótrúlega falleg og mjúk. Hörloftljósin frá Watt og Weke eru einnig í uppáhaldi hjá mér og er ég með eitt í svefnherberginu. Eden Outcast er einnig mjög skemmtilegt merki með litríkum kristalskertastjökum og geggjuðum speglum. Aida er einnig í uppáhaldi hjá mér, ég á frá því merki geggjuð gyllt hnífapör – sem mega fara í uppþvottavél! Það er mikill kostur en hnífapörin eru úr miklum gæðum og á góðu verði ásamt því að fást í fleiri litum. Ég er líka hrifin af keramíkstellinu Aida Raw sem eru fallegt og stílhreint matarstell, ég á einmitt matardiskana í ljósgráum lit:)

Önnur merki sem ég mæli með að kíkja á eru: ilmkerti og ilmstangir frá Remoair – alveg geggjaðir ilmir. Eilífðarblómin frá Abigail Ahern – ég elska þetta merki! Liewood barnaföt og leikföng er æðislegt barnavörumerki sem heillar mig mikið – tilvalið að græja sumargjöf þar. Studio About er með fallega og litríka gler blómavasa. Og svo eru geggjaðar handofnar ullarmottur frá White Rug og My Moroccan rug. Þetta allt er á 20% afslætti!

// Færslan er unnin í samstarfi við Dimm

P.S. Afslátturinn er að sjálfsögðu einnig í vefverslun – smelltu hér til að skoða! ♡

Heimsþekkti listamaðurinn Ólafur Elíasson og Ikea tóku höndum saman fyrir nokkru síðan með þá sameiginlegu trú að vel ígrunduð hönnun geti skipt sköpum, og þannig hefur Little Sun verkefni Ólafs hafið nýjan kafla, en þar sameinar hann list og vísindi til að gera sólarorku áþreifanlega og aðgengilega fleirum. Little Sun stofnaði Ólafur árið 2012 ásamt danska athafnamanninum Frederik Ottesen með það markmið að bæta lífsgæði fólks og lýsa upp rafmagnslaus heimili með sólarorku. Yfir milljarður manna um allan heiminn hafa ekki aðgang að rafmagni og hefur sólarorkudrifni lampinn Little Sun víða haft góð áhrif, m.a. í dreifbýlum Afríku en einnig vakti hann mikla athygli í listaheiminum og er í dag seldur á mörgum virtustu listasöfnum heims.

Afrakstur samstarfs Ólafs við Ikea sem nú hefur litið dagsins ljós nefnist SAMMANLÄNKAD sem þýðir „tengdur“ á sænsku, og eru tveir sólarknúnir LED lampar sem hannaðir eru til að vekja áhuga okkar á sólarorku og vekja í leiðinni athygli á ójöfnum aðgangi jarðarbúa að orku, frá sjónarhóli listarinnar.

Annar lampinn sameinar lýsingu og hleðslu og er hægt að hafa hangandi eða sem borðlampa. Hægt er að taka ljósgjafann úr standinum og nota sem vasaljós. Að mínu mati mjög fallegur skúlptúr og mjög svo í anda Ólafs. Hinn lampinn er lítið flytjanlegt ljós sem hentar vel utandyra og með gulri ól er hægt að halda á ljósinu eða hengja upp.

„Í minni list nota ég ljós til að móta rými og umhverfi í því skyni að vekja fólk til umhugsunar, hvetja það til að spyrja sig hvernig það upplifir heiminn og tekst á við hann. Ég held að listin geti breytt heiminum með því að beina kastljósinu að máli á borð við aðgang að orku. Ekki aðeins með því að gera það skiljanlegt fyrir hugann, heldur einnig áþreifanlegt í orðsins fyllstu merkingu. Slík reynsla getur leitt til þess að við áttum okkar á innbyrðis tengslum okkar, á því hvað sameinar okkur og hvatt okkur til aðgerða.” Textabrot frá Sameinuðu þjóuðunum Unric.org

Ljósin er nú þegar komin í sölu í mörgum Ikea verslunum víða um heim en eru væntanleg í lok mánaðar eða byrjun maí hér heima. Virkilega fallegt verkefni sem heldur áfram að hafa góð áhrif. Ég hvet ykkur til að kynna ykkur nánar Little Sun verkefnið með því að smella hér. 

Það er alltaf jafn ánægjulegt að skoða hollensk heimili en þau eiga það gjarnan sameiginlegt að vera aðeins litríkari eða hressari en við eigum að venjast. Hér er á ferð einstaklega glæsilegt heimili leikkonunnar Carice van Houten, sem hefur meðal annars leikið í Game of Thrones. Stíllinn hennar er eins og “gangandi litasprengja” segir hún sjálf frá og með aðstoð innanhússhönnuðarins Nicole Dohmen hjá Atelier ND Interior tókst þeim að dempa litasprengjuna aðeins svo að allri fjölskyldunni gæti liðið vel að búa hér og útkoman er vægast sagt geggjuð!

Eins og þið vitið líklega nú þegar þá heilla litrík heimili mig afskaplega mikið og hér er farið alla leið með litríkum veggfóðrum með allskyns mynstrum, skærum litum og geggjuðum hönnunaríkonum og útkoman er sem konfekt fyrir augun.

Myndir: House Beautiful / Living Inside

Verner Panton FUN skeljaljósin yfir eldhúseyjunni eru alveg gordjöss og Ultrafragola spegillinn ásamt borðstofuborði eftir Sabine Marcelis eru ekkert nema draumur einn. Forstofan er þó í sérstöku uppáhaldi hjá mér, þessi ljósfjólubláa hurð við skræpótt veggfóðrið og hvernig því er parað saman við glæsilega glerljósakrónu og klassískt málverk sem stendur ofan á veglegu viðarborði sem dempar þetta aðeins niður svo útkoman er fullkomin að mínu mati.

Vá hvað svona heimili gefa mér mikinn innblástur – vonandi ykkur líka!

Ég elska að það séu ennþá eftir nokkur stór verkefni á heimilinu því mér finnst svo ótrúlega gaman að skoða og spá í hugmyndum. Þegar allt á listanum klárast þá hlýtur manni að byrja að leiðast… eða kannski verður það ansi ljúft bara? Þvottahúsið á okkar heimili er algjört ástand svo vægt sé tekið til orða, það er jú líka eina geymslan á heimilinu og opnar hillurnar gjörsamlega flæða út á gólf með tilheyrandi drasli og stöku sinnum blóti að komast ekki almennilega að þvottinum haha. Þvottahúsið er í endanum af eldhúsinu okkar og með einum besta glugganum á heimilinu sem horfir í átt að sólsetri og því algjör synd að þar sé alltaf lokað inn. Draumurinn er því að taka allt út og setja upp fallegar innréttingar og nýtt gólfefni, mála veggi og setja upp nýtt ljós og þannig geta haft opið inn og hleypa meiri dagsbirtu í eldhúsið og í leiðinni “stækka” rýmið.

Ég tók mig því til og fann nokkrar myndir til innblásturs…

Takk fyrir lesturinn – eigið góða helgi ♡

Fylgstu einnig með á Instagram @svana.svartahvitu