Danska hönnunarfyrirtækið Montana getur ekki annað en heillað uppúr skónum með litríkum innblástursheimi þar sem klassísku Montana hillunum er stillt upp í fallegum pastellitum í vandlega stíliseruðum rýmum. Ég fylgist með þeim á samfélagsmiðlum og finnst þau alveg “meðetta” þegar kemur að nútímalegri markaðssetningu á annars klassískri hönnun.
Montana er eitt þekktasta hönnunarmerki dana, stofnað árið 1982 af Peter J. Lassen. Montana hillurnar er hægt að sérsníða að smekk hvers og eins og er hægt að velja úr óteljandi litum.
Þið sem hafið lesið bloggið í einhver ár munið kannski eftir fyrstu Montana hillunni sem ég keypti mér, mikil skyndikaup þar sem Peter J. Lassen var hliðiná mér eftir að ég hafði nýlokið að taka viðtal við þennan meistara. Ég vildi nefnilega fá áritun á hilluna mína sem varð að mjög góðum brandara þar sem sá gamli tók sér í hönd stóran olíutússpenna og krotaði veglega ofan á hana, SVANA – love Peter L. ásamt skissu af hans fyrstu Montana teikningu – og á meðan horfði ég stjörf á. Hann lést í lok síðasta árs svo mér þykir ansi vænt um mína hillu í dag, og kem líklega einn daginn til með að bæta enn meira við safnið.
Litaúrvalið heillar mig að minnsta kosti mjög mikið.
Myndir : Montana Press
// Fylgstu einnig með á Instagram @svana.svartahvitu
Superfront er sænskt hönnunarfyrirtæki sem býður upp á fallegar höldur, skápahurðir og fleiri vörur sem er sérstaklega hannaðar fyrir Ikea innréttingar. Ótrúlega sniðug lausn til að fá þetta sérhannaða útlit fyrir minni pening. Ég hef áður skrifað um Superfront en þá aðeins til innblásturs þar sem þau sendu þá ekki til Íslands. En gleðifréttir fyrir ykkur sem ekki vissuð en núna hægt að panta til Íslands. Ég hef verið að leita að hentugum höldum fyrir skápa í forstofuna okkar sem eru festar að innan svo ekki þurfi að bora í spegilinn og fann fallegar stílhreinar höldur hjá Superfront sem ég hef áhuga á að panta mér. Sendingarkostnaður er um 44 evrur svo það gæti verið góð hugmynd að panta með fleirum til að spara kostnað.
Sjáðu meira hjá Superfront.com
Sjá þessar fallegu innréttingar, ég er með augun á nokkrum hurðum líka sem væri gaman að setja inná baðherbergið. En það fær þó að bíða betri tíma –
// Fylgstu einnig með á Instagram @svana.svartahvitu
Þetta glæsilega íslenska heimili hefur verið til sölu í nokkurn tíma en á svo sannarlega skilið enn meiri athygli í netheimum enda sérlega fallegt. Húsið er byggt árið 1977 og er teiknað af Kjartani Sveinssyni sjálfum sem stundum var kallaður arkitekt þjóðarinnar og skildi eftir sig mörg merkileg hús – eitt þeirra sem hefur heillað mig síðan ég var barn. (Líklega íburðarmesta húsið á Arnarnesinu til að gefa ykkur vísbendingu..)
En aftur að þessu húsi – innréttingar eru teiknaðar af Arnari Þór Jónssyni arkitekt, eldhúsið er einstaklega vel heppnað, ljóst og nútímalegt með marmaraklæddum hvítum innréttingum. Hér býr mikið smekkfólk, það sjáum við á vali á húsgögnum en klassísk hönnun skreytir hvert rými… alla leið inní fataherbergi!
Kíkjum í heimsókn –
Ljósmyndir : Fasteignaljósmyndun.is
Ljósmyndir : Fasteignaljósmyndun.is / Fasteignavefur Vísis
// Fylgstu einnig með á Instagram @svana.svartahvitu
Eldhúshillur eru ofarlega í mínum huga þessa dagana, við erum í smá eldhúsframkvæmdum hér heima og fengum langþráða nýja borðplötu í vikunni sem ég hlakka til að sýna ykkur betur frá og núna er á dagskrá að klára eldhúsið. Hugmyndin er að græja borðkrók með upphengdum bólstruðum bekk og ásamt því vil ég setja hillur fyrir ofan eldhúsinnréttinguna. Ég er mjög hrifin af svona opnum hillum þar sem fallegir hlutir fá vel sín notið, og þá er alltaf góð hugmynd að skoða myndir í tímaritum eða á vefnum til að sjá fyrir sér hvað heillar mest. Mér sýnist ég sjá nokkurnveginn í hvaða átt ég hallast ♡
Myndir : Svartahvitu Pinterest
Eigið góða helgi!
// Fylgstu einnig með á Instagram @svana.svartahvitu
Það er vandasamt val að velja rétta liti fyrir heimilið, það þekki ég bæði af eigin raun ásamt því að fá reglulega sendar fyrirspurnir frá lesendum hvaða litum ég geti mælt með, og er grár litur sérstaklega vinsæl fyrirspurn og það sem flestir láta vefjast fyrir sér. Best er að mínu mati að velja gráan lit með örlítið hlýjum undirtón því annars verða þeir oft smá bláir sem er sjaldnast það sem við leitumst eftir í hlutlausum lit fyrir alrými. Fjölmargir hafa gert tilraunir til að finna hinn fullkomna gráa lit en hér að neðan má sjá glæsilegt heimili málað í nokkrum hlýlegum og náttúrulegum litartónum, margir hverjir gráir og eiga það allir sameiginlegt að vera með hlýjan og djúpan undirtón sem gerir heimilið hrikalega smart. Sjáið svo hvernig loftið og listarnir eru málaðir í nokkrum tónum dekkri lit og hvert herbergi fær sinn einkennandi en þó mjúka lit. Hér er líka allt málað, hurðar og innréttingar og það er varla hægt að finna hvítan blett á heimilinu!
Einstaklega fallegt og elegant heimili, kíkjum í heimsókn –
Myndir / Innerstadsspecialisten
Varðandi gráu litapælingarnar þá væri gaman að taka saman nokkra fallega liti og deila með ykkur, við erum með núna hér heima með lit á alrýminu sem heitir Soft Sarceilles frá Sérefni, hann er mjög mildur og hlýr grár litur með brúnum undirtón. Ég er virkilega ánægð með hann og finnst hann passa vel við aðra liti sem ég hef valið hingað inn, m.a. bleikan, grænan og ljósbláan. En eins og alltaf þá er svo mikilvægt að fá litaprufur og prófa í þeirri birtu sem er á ykkar heimili, þá fyrst sérðu hvernig liturinn verður í raun og veru!
// Fylgstu einnig með á Instagram @svana.svartahvitu
Í dag er fullkominn dagur til að stússast í smá páskaskreytingum, föndri eða byrja að huga að skemmtilega dekkuðu páskaborði. Tauservíettur brotnar sem kanínueyru eru klassísk hugmynd og svo er einnig fallegt að taka egg og brjóta tauservíettu í kringum það og binda svo, það er einfaldari aðferð sem allir ættu að geta gert.
Ef þið eruð ekki nú þegar búin að mála á egg þá er helgin fullkomin til þess, því við geymum svo eggin ár eftir ár og þau verða að minningum fyrir börnin. Mér finnst fátt skemmtilegra en að dúlla mér við svona pælingar og það má finna endalausar hugmyndir að páskaafþreyingu á Pinterest.
Hér eru nokkrar fallegar myndir til að veita ykkur innblástur –
Myndir : Pinterest
// Fylgstu einnig með á Instagram @svana.svartahvitu
Þessi fallegi dagur, ó þessi fallegi dagur, ég er ekki frá því að ég hafi komist í örlítið sumarskap. Við Bjartur skelltum sólarvörn á kinnarnar og vorum úti í veðurblíðunni, það þarf ekkert annað þegar veðrið er svona dásamlegt.
Myndirnar af vorlínu H&M Home eru því viðeigandi með tropical stemmningu fyrir allt heimilið! Risavaxin Strelitzia í stofunni sem skreytir einnig heimilistextíl, púða, dúka og handklæði. H&M home deildin er alltaf skemmtilega skrautleg og langt frá því að vera minimalísk, mér sýnist vortískan eiga að vera ansi lifandi að minnsta kosti.
Myndir : H&M Home
// Fylgstu einnig með á Instagram @svana.svartahvitu
Ein uppáhalds hönnunin mín eru klassísku sænsku String hillurnar sem hannaðar voru árið 1949. String hillurnar fást í ótalmörgum útfærslum og getur hver og einn sniðið þær eftir sínum hugmyndum og heimili. String Pocket hefur notið gífulegra vinsælda, lítil og nett vegghilla sem hentar vel undir punt og aðra smámuni en String hillukerfið er síðan heill heimur fyrir sig.
Ég hef lengi hrifist af öllum ljósmyndunum sem String lætur útfæra fyrir sig með hjálp fremstu stílista Skandinavíu, en það veitir oft jafnvel enn meiri innblástur að sjá hillurnar inni á ekta heimilum. Ég tók saman nokkrar sem finna má á Instagram síðu String @stringfurniture en ég datt inná síðuna þeirra í hugmyndavinnu fyrir eldhúsið okkar.
Hér að neðan má svo finna nokkrar myndir sem stíliseraðar eru af String teyminu –
Fyrir áhugasama þá fást String hillurnar hjá Epal
Við erum með String skrifborð inni hjá stráknum mínum og í eldhúsinu er lítil String Pocket hilla. Einfaldar String vegghillur eru komnar ofarlega á listann hjá mér í eldhúsið þannig að ég geti raðað þar smá stelli eða öðrum eldhús nauðsynjum…. mmmm.
Falleg og klassísk hönnun sem hentar flestum heimilum.
// Fylgstu einnig með á Instagram @svana.svartahvitu
Þetta er einmitt svefnherbergið sem mig dreymir um… falleg litasamsetning af grænum og bleikum sem er svo mjúk og notaleg. Svefnherbergið okkar er einmitt í þessum lit eða mjög svipuðum að minnsta kosti. Hann heitir Deep Paris og er frá Sérefni, á rúminu okkar eru einnig antík bleik rúmföt og undanfarið hef ég látið mig dreyma um bleikar gardínur – ætli þetta sé merki um það að ég eigi að klára að græja svefnherbergið? Það sem vantar eru jú bara gardínur, skápahöldur og svo myndir á vegginn.
Ji hvað það verður pretty ef útkoman verður svona ♡
Myndir via Alvhem
// Fylgstu einnig með á Instagram @svana.svartahvitu
