Trendnet

Ég féll fyrir þessu heimili þegar ég sá eldhúsið sem er einstaklega sjarmerandi, bleik Flower Pot ljós eftir Verner Panton hanga yfir innréttingunni sem gefa eldhúsinu mikinn karakter en oftar sjáum við ljóskastara sem vinnuljós í eldhúsi. Veggirnir eru í grá-græn-brúnum lit (haha) sem teygir sig yfir í öll rými heimilisins sem gefur svo fágað yfirbragð. Heimilið er hlýlegt og með persónulegan stíl, ég er mjög hrifin af gamla glerskápnum yfir sófanum og háu vegglistarnir eru líka algjör draumur.

Kíkjum í heimsókn –

Myndir // My Scandinavian Home

Ég elska svona óræða og mjúka liti … hvorki grátt né grænt, heldur fullkomin blanda með dass af brúnum! Og svo þegar liturinn teygir anga sína yfir í fleiri en eitt rými verður útkoman nánast án undantekninga algjört æði! Hvað finnst ykkur?

Hér er á ferð hrikalega hugguleg 60 fm íbúð í risi þar sem vel hefur verið hugað að hverju smáatriði. Svefnherbergið er sérstaklega fallegt með veggfóðruðum fataskáp sem gerir herbergið svo hlýlegt, en það er sniðug lausn að nýta skápahurðar líka í litlum herbergjum eins og þessu. Birtan flæðir inn um þakglugga og plöntur skreyta hvert horn. Kíkjum í heimsókn –

Myndir : Alvhem

Litli garðskikinn er algjört æði með luktir hangandi í trjánum sem skapa góða stemmingu. Fyrir áhugasama um veggfóðrið í svefnherberginu og á sjónvarpsveggnum þá fæst samskonar hjá Sérefni hérlendis í miklu úrvali – svo smart! Er einmitt að íhuga að veggfóðra smá í einu herbergi hér heima…

Það getur varla annað verið en að hér sé gaman að búa og ætli litavalið lýsi ekki eigandanum vel – jákvæð og hressleikinn uppmálaður. Ég væri að minnsta kosti glöð að vakna hér í þessari litríku og fallegu 3ja herbergja risíbúð í hlíðunum sem nú er komin á sölu fyrir áhugasama.

Kíkjum í heimsókn –

Ljósmyndir : Fasteignaljósmyndun.is

Ljósmyndir : Fasteignaljósmyndun.is

Fyrir frekari upplýsingar um eignina smelltu þá hér.

Allt sem er gult gult finnst mér vera fallegt … ♡

Hér er á ferð dásamlegt sænskt heimili sem staðsett er í Gautaborg. Látlaus skandinavískur stíllinn heillar en barnaherbergið toppar allt – rúminu hefur nefnilega verið breytt í fallegt hús með leiklofti og litavalið í herberginu minnir á Astrid Lindgren ævintýri. Eitt veit ég þó, það ef sonur minn læsi bloggið mitt þá yrði suðað um svona rúm út árið…

Kíkjum í heimsókn –

Myndir : Kvarteret Mäkleri

Þrátt fyrir að flest okkar séum enn á ferðalögum um landið í sumarfríum er gott að staldra við með kannski einn kaffibolla í morgunsárið og sækja sér smá heimilisinnblástur. Þar sem sumarið fer að líða undir lok er tilvalið að byrja að huga að því núna hvað við ætlum að gera fyrir heimilið í haust – sem er minn uppáhaldstími til að gera & græja. Punkta niður hugmyndir að nýjum litum á veggi, nýjar uppraðanir fyrir húsgögn og hillur eða jafnvel stórkostlegar breytingar.

Þetta fallega heimili veitir innblástur. Gluggaveggurinn sem aðskilur eldhús og stofu er sérstaklega smart, það er líklega ekkert of flókið að útbúa svona vegg og myndi gjörbreyta hvaða heimili sem er. Ég er einnig orðin mjög spennt fyrir því að prófa að setja lista á veggi í t.d. svefnherberginu, það gerir rýmið svo sjarmerandi.

Kíkjum í heimsókn –

Myndir // Entrance Makleri

Ég vona annars að þið séuð að njóta síðustu daga sumarsins. Ég er svo sannarlega að því:)

// Fylgstu einnig með á Instagram @svana.svartahvitu

Nýlega opnaði danska hönnunarmerkið Ferm Living nýja og glæsilega flaggskipsverslun sína í Kaupmannahöfn, staðsetta í glæsilegu og sögulegu húsnæði frá árinu 1777 að Kuglegården 1-5. Ferm Living er eitt af mínum uppáhalds hönnunarmerkjum og bjóða upp á úrval af dásamlegum smávörum fyrir heimilið ásamt sífellt stækkandi húsgagnalínu. Heimili Ferm Living er stórglæsilegt, um 450 fermetrar og má þar skoða allar vörulínur þeirra stilltar upp í fallegu umhverfi og ásamt því er hægt að versla hér sérvalda vintage muni, plöntur, sófaborðsbækur og aðra fylgihluti fyrir heimilið.

Sjáið myndirnar frá fallega Ferm Living heimilinu, algjört möst að kíkja við í næstu Köben ferð –

 Myndir // Ferm Living 

Ferm Living heillar svo sannarlega, ég held sérstaklega upp á barnavörulínuna þeirra en það eru nokkrir hlutir á myndunum hér að ofan sem ég er ansi hrifin af! Fyrir áhugasama þá fæst Ferm living hjá Epal.

Þið finnið Ferm Living heimilið hér : 

Kuglegårdsvej 1-5
1434, Copenhagen K

Opnunartímar:
Mán-Fös: 12-18
Lau: 10-16

// Fylgstu einnig með á Instagram @svana.svartahvitu

Látum okkur aðeins dreyma um að búa í þessum bleika og ævintýralega kastala sem er svo fallegur að það hálfa væri hellingur – og er nú kominn á sölu. Gärsnäs kastalinn á sér merkilega sögu sem nær aftur til 14. aldar og er talinn einn af fallegri kastölum í Svíþjóð og hefur birst í fjölda kvikmynda, m.a. Walt Disney mynd. Það væsir ekki um þann sem festir kaup á þessari dásemd, með 27 svefnherbergi, endalausar stofur, fjölda baðherbergja, matsalir, veitingarstaðaeldhús og fleira. Ótrúlegt en satt þá býr hér í dag fjölskylda í afmörkuðum hluta kastalans ásamt hundi sem er án efa ánægður með allt plássið til að hlaupa um.

Mikið af húsgögnunum og innréttingum hefur verið hluti af kastalanum frá upphafi og fær að fylgja með ásamt draugum og öllu hafi kaupandi áhuga. Vá hvað þetta er falleg bygging.

Kíkjum í heimsókn –

Myndir // Fantastik Frank

Þvílíkur draumur ekki satt! Getum við ekki lagt í púkk nokkur og keypt kastalann saman, en hann kostar rúmar 300 milljónir ekki nema. Hver sem þó festir kaup á Gärsnäs kastalanum mun lifa ævintýralega fallegu lífi. Bleikur draumur alveg hreint!

// Fylgstu einnig með á Instagram @svana.svartahvitu

Ég má til með að sýna ykkur þetta dásamlega fallega heimili sem staðsett er í firðinum fagra og var að koma á sölu. Eins og þið vitið mörg þá fæ ég seint leið á því að dásama bæinn minn og hér er á ferð heimili sem er á frábærum stað í bænum, með sundlaugina í bakgarðinum, stórt leiksvæði fyrir utan og stutt í alla þjónustu. Stofan og borðstofan eru í algjöru uppáhaldi hjá mér, svo líflegur og persónulegur stíllinn með blöndu af fallegri hönnun, íslenskri list og nóg af plöntum. Sjáið hvað þetta er hrikalega smart!

Kíkjum í heimsókn –

Ljósmyndir : Fasteignaljósmyndun.is

Ljósmyndir : Fasteignaljósmyndun.is

Fyrir frekari upplýsingar um eignina smellið hér – 

// Fylgstu einnig með á Instagram @svana.svartahvitu

Kristalskrónan setur punktinn yfir i-ið á þessu fallega heimili þar sem klassísk hönnun skreytir hvert rými. Hér er á ferð smekklega innréttað heimili sem gefur góðar hugmyndir. Sjáið til dæmis hvernig myndirnar eru hengdar upp við sjónvarpið svo úr verður lítill myndaveggur og athyglin fer af sjónvarpinu.

Kíkjum í heimsókn –

Myndir // Bjurfors

Virkilega falleg litapalletta á þessu heimili, brúnt og grátt fer svo vel saman ♡

// Fylgstu einnig með á Instagram @svana.svartahvitu

Svefnherbergið okkar hefur setið á hakanum í langan tíma en núna er loksins komið að því að klára að gera það tilbúið. Ég bíð spennt eftir að setja upp fallegar síðar gardínur, hengja myndir á veggi og finna nýtt náttborð og rúmteppi svo það verði örlítið huggulegra herbergið. Fyrir utan skreytingarnar þá vantar einnig lista og sólbekk í gluggann eftir að við fengum nýja glugga. Þau eru jú ófá verkefnin á þessu heimili en mikið sem það er gaman að sjá heimilið hægt og rólega verða tilbúið. Eini mínusinn við að fara hægt í framkvæmdir verð ég þó að segja að núna finnst mér helst vera kominn tími á að mála í herbergið í nýjum lit þar sem ég er að verða leið á þeim sem við erum með núna haha. Svo myndi ekki skemma heldur fyrir að skipta út loftljósinu…

Hér eru nokkrar myndir sem ég hef pinnað í svefnherbergis möppuna mína á Pinterest – 

Myndir via Svartahvitu Pinterest

// Fylgstu einnig með á Instagram @svana.svartahvitu