Þetta dásamlega heimili er nú til sölu fyrir áhugasama – en best væri að fá að flytja beint inn með öllu saman því glæsilegt er það! Vel valin húsgögn og hönnun má finna í hverju horni, og falleg barnaherbergin sem gefa góðar hugmyndir. Svefnherbergið er algjör draumur, með stærðarinnar fataherbergi og innangengu baðherbergi – draumur! Hér býr Alma Ösp Arnórsdóttir innanhússráðgjafi og annar stofnanda StudioVOLT sem tekur að sér allskyns ólík hönnunarráðgjafaverkefni, spennandi fyrirtæki sem er nýlega stofnað og á án efa eftir að vekja mikla athygli enda smekklegar dömur þar að baki. Hægt er að fylgjast með StudioVOLT á Instagram HÉR –
Það getur komið mjög vel út að mála heimilið allt í sama litnum og útkoman verður svo notaleg eins og sjá má á myndunum hér að neðan þar sem stofan og svefnherbergið er málað í sama gráa litnum. Bætið svo við nóg af textíl, mottum, púðum og dúkum og hengdu jafnvel fallegan slopp eða kimono á fataskápinn og útkoman verður samstundis hlýlegri. Hér er svefnherbergið í uppáhaldi hjá mér, fataskáparnir eru málaðir í sama lit og veggir og litapallettan er eitthvað svo mjúk og dásamleg, svo er rönótt rúmteppið við fótgaflinn og ljósið sérstaklega heillandi.
Gustaf Westman er sænskur hönnuður á hraðri uppleið á stjörnuhimininn en hönnun hans hefur vakið ótrúlega athygli á undanförnu ári – og þar má sérstaklega þakka samfélagsmiðlum fyrir. Spegillinn hans Curvy er alveg einstakur og hefur verið eftirsóttur í myndatökum hjá tískuskvísum á Instagram enda sérlega myndvænn í pastellitunum sínum, með bogadregnar línur og með smá 90’s fíling. Gustaf kom af stað trendi sem sér ekki fyrir endann á, bogadregnu 90’s Ikea Krabb speglarnir mjóu sem margir muna eftir síðan á unglingsárunum sínum eru jafnvel í kjölfarið orðnir hrikalega eftirsóttir en ég vil meina að það tengist fallega Curvy speglinum. Núna var verið að veita hönnunarverðlaun Elle Decoration og hlaut Curvy verðlaun sem “augnakonfekt ársins” – bravó! Vel verðskuldað!
Takið eftir frauðborðinu á myndinni sem er einnig hönnun Gustafs, en hann kom þar af stað risa tískubylgju þar sem áhugasamir um hönnun hans gerðu sínar eigin útgáfur ‘DIY’ af frauðklæddum speglum og borðum sem vekur í dag mikla athygli á Instagram. Sjá betur hér að neðan –
Myndir : Gustaf Westman
Fyrir okkur hönnunarnörda þá er Ultrafragola spegillinn frá 1970 eftir Ettore Sottsass sá sem trónir þó hærra en Curvy enda algjör gullmoli hönnunarsögunnar. Með baklýsingu og því ekki furða að hann sé einnig einn eftirsóttasti spegillinn í dag en aðeins á færi þeirra frægu og ríku. – Smá skemmtilegur útúrdúr en það er gaman að para þessa tvo saman!
Hvað finnst ykkur um augnakonfekt ársins, Curvy spegilinn? Ótrúlega fallegur eða hrikalega hallærislegur?
Ég gæti hreinlega ekki verið skotnari í öllum 2021 nýjungunum frá Iittala sem fagnar í ár 140 ára afmæli sínu og í tilefni þess eru nýjungar ársins einstaklega veglegar og fallegar. Litur ársins er undursamlega fallegur litur, Amethyst sem er fjólublár og með fallegri litum sem ég hef séð frá Iittala.
“Afmælislínan gengur þvert á allt vöruúrvalið og inniheldur bæði borðbúnað og skrautmuni fyrir heimilið. Sem dæmi má nefna var Essence línan stækkuð, liturinn Dark Grey kemur í staðinn fyrir litinn Grey og liturinn Amethyst var valinn litur ársins.”
Sjáið þennan ótrúlega fallega lit – algjört konfekt fyrir augun og myndi lífga hvert heimili við.
Mæli svo sannarlega með því að horfa á þetta myndband sem gert var í tilefni afmælisins. Myndbandið hér að neðan er einnig mjög skemmtilegt fyrir áhugasama um hönnun, en það er frá árinu 2017 og sýnir okkur hvernig nokkrar af þekktustu vörum Iittala eru búnar til af ótrúlega færu handverksfólki. Það er einstakt að fá að sjá hvernig vörurnar okkar eru framleiddar, sjá vinnuna og hvernig nostrað er við hverja vöru. Fær mann til að kunna enn betur að meta vörurnar.
Það fallegasta sem ég hef séð – Aalto vasinn í Amethyst
Essence karafla í litnum Amethyst –
Kartio karaflan er geggjuð og svo ótrúlega klassísk –
Hár Aalto vasi í nýja litnum –
“Nýjir munnblásnir Aalto vasar í fjórum mismunandi litum (Clear, Copper, Moss Green og Dark Grey). Vasarnir komu í takmörkuðu upplagi (2.021 eintök) og byggja á sjaldgæfu formi úr smiðju Aalto, en í dag eru einungis 3 vasar til úr upphaflegu framleiðslunni frá árinu 1937. Vasarnir eru framleiddir með viðarformum og því er hver vasi einstakur.”
Sjá þetta krútt!
“Fugl ársins 2021 er fallegur og glaðlegur fugl sem ber heitið Kesuri. Fuglinn er í litnum Amethyst, en liturinn er töfrandi og bjartur litur sem breytir um tón eftir því hvernig birta fellur á hann. Segja má að þessi sérstaki litur lyfti hversdagslegum hlutum á annað plan.
Fuglinn er í stærðinni 217x115mm. Iittala fuglarnir eru munnblásnir í Iittala glerverskmiðjunni í Finnlandi. Sérhver fugl er því einstakur. Fuglarnir fegra heimilið og eru auk þess einstök og eftirminnileg gjöf. Fuglarnir henta vel fyrir áhugafólk um hönnun, glerlistasafnara og fuglaunnendur. “
Hér að neðan getur þú kynnst fuglunum betur í myndbandi sem sýnir hvernig þeir eru framleiddir. Ég hef sjálf mjög gaman af því að sjá “á bakvið tjöldin”. En fuglarnir eftir Oiva Toikka eru algjör listaverk.
Flycatcher “Sieppo” fuglarnir hafa aftur tekið á flug, nú í 5 nýjum og aðlaðandi litum. Sumarlegir og sætir!
“Frutta línan sem sjá má hér að neðan var hönnuð af Oiva Toikka en við hönnun hennar sótti hann innblástur í ávexti og ber. Í byrjun árs 2021 komu glösin á markað í litunum Lemon og Amethyst.”
Þá höfum við brot af 2021 nýjungum frá Iittala – já þetta er aðeins brot þar sem úrvalið er ótrúlegt af nýjungum. Sjáðu fleiri nýjungar með því að smella hér. Hvernig lýst ykkur annars á lit ársins? Fallega Amethyst sem er algjörlega einstakur. En hann verður aðeins í framleiðslu árið 2021 og því – safngripur framtíðarinnar ♡
Sambloggarar mínir á Trendnet hafa oft skrifað svo skemmtilegar færslur sem ég hef svo gaman af, þar má nefna t.d. Helga Ómars og Hildi Sif. Dálítið brot úr lífi – núna. Ég ætla að prófa ♡
Ég er að hlusta á : Snæbjörn talar við fólk, Rut Kára. Vá þetta er einn áhugaverður hlaðvarpsþáttur, Ítalska mafían, byssur, hönnun, heimili, greifingi – blanda sem ég vissi ekki að væri til. Rut Káradóttir kemur svo sannarlega á óvart!
Föt dagsins: Þröngar íþróttabuxur og kósý peysa er staðalbúnaður – er einnig búin að taka ástfóstri við lillabláu húfuna mína frá Andreu og lillabláa trefilinn minn í stíl sem poppar upp dressið þegar ég er á leið út. Ég bíð þó spennt eftir að AndreA framleiði trefla í nýja lillabláa litnum. Minn trefill er frá Asos úr 100% polyester og þannig efni eru ekki langlíf, en ég á bleikan trefil frá Andreu úr 100% bómull sem ég hef notað í mörg ár. Gæði skipta máli og ég er oftast mjög meðvituð um það, en gerði skyndikaup með þennan “plast” trefil minn því ég var sko skotin í litnum haha. Fjólublái liturinn er gleðilitur skal ég segja ykkur – mæli með í skammdeginu!
Skap dagsins: Svo ótrúlega gott – undanfarnir mánuðir finnst mér ég hafa verið frekar dofin. Fæðingarorlof, lítill svefn, ástandið í þjóðfélaginu og að missa ömmu og afa tók mjög stóran toll og finnst ég fyrst núna farin að kannast aftur við mig. Svo góð tilfinning en tók sinn tíma.
Lag dagsins:Spurningar með Birni og Páli Óskari. Þetta er ekki beint tónlistin sem ég hlusta venjulega á – en það hitti í mark og kemur mér í svo gott skap samstundis. Einnig Ef ástin er hrein með Jón Jónssyni og GDRN, svo ótrúlega fallegt.
Það sem stóð uppúr í vikunni:Að hafa keypt nýjan blandara eftir að ég braut minn í desember þegar ég setti hann í gang með skeið ofan í (típískt ég haha). Mikil gleði skal ég segja ykkur að fá aftur boost! Og að fá uppáhalds dagbókina mína í hendurnar frá MUNUM sem ætlar að koma mér í gegnum þetta þokutímabil. Lagði einnig inn pöntun fyrir draumaljósinu mínu sem ég er ótrúlega spennt að fá heim.
Matur dagsins:Boost með kaffibragði…. ég slumpa yfirleitt einhverju saman, kaffi, vanilluskyr, frosið mangó, banani, hnetusmjör og annað ef til. Mjög gott!
Óskalisti vikunnar:Ég skrifaði færslu í gær með óskalistanum mínum sem finna má hér. Þar má finna ýmislegt fallegt ♡
Plön helgarinnar:Fullt skemmtilegt, bröns með vinkonum, gistipartý heima með Bjarti Elíasi og uppáhalds frændanum, og svo er ég einnig að aðstoða mömmu með bás í Extraloppunni þar sem við ætlum að selja fallegar flíkur af ömmu skvísu (langmest var gefið) en þarna eru allskyns fallegar úlpur og vesti (fleirtala) frá Uniqlo og vandaðar blússur fyrir smekklegar konur.
Þetta var skemmtilegt – held ég skrifi oftar færslur í þessum dúr. Eigið góða viku kæru lesendur!
Það er óvenjulegt að ég uppfæri ekki bloggið mitt nokkrum sinnum í viku og fæ ég hálfgerð fráhvarfseinkenni þegar ég næ ekki að skrifa sem oftast og leyfa huganum að reika um falleg heimili, þetta er jú eitt af mínum uppáhalds áhugamálum, að blogga sem ég fæ einnig að deila með nokkrum uppáhalds vinum sem skrifa hér með mér á Trendnet. Mööögulega hefur smá svefnleysi einkennt síðustu vikur en ég er þó vopnuð bjartsýni og í kvöld er ég viss um að síðasta slæma nóttin sé búin hjá okkur mæðgum og ég kem þá tvíefld tilbaka ♡
Það er ótrúlega margt sem mig hlakkar til að sýna ykkur og segja frá, auk þess sem að framkvæmdarlisti heimilisins hefur legið í dvala frá því sl. haust og mig kitlar í puttana að komast í nokkur verk. Dagarnir eru farnir að lengjast og það er ekki annað hægt en að vera bara þokkalega bjartsýn/n ♡
Hér höfum við nokkrar gersemar sem verma óskalistann að þessu sinni og eiga það nokkrar sameiginlegt að vera ansi litríkar. Ég þrái smá meiri litagleði á heimilið mitt og er með augun á nokkrum skemmtilegum vörum sem ég ætla að næla mér í á næstunni.
Mynd á vegginn úr seríunni Flower Market eftir sænsku listakonuna Astrid Wilson eru draumur! Honolulu og Tunis mættu svo sannarlega prýða stofuna mína. Fæst hjá Mikado á Hverfisgötu.
Litrík rúmföt hljóta hreinlega að gera lífið aðeins skemmtilegra, þessi gordjöss lillabláu rúmföt hafa setið lengi á óskalistanum mínum en merkið Tekla fæst hjá Norr11.
Þessir fluffy inniskór eru með þeim allra flottustu – frá elsku Andreu minni sem hefur verið að bæta við einstaklega vel völdum skóm við vöruúrvalið sitt! Spennó! Fást hjá AndreA.
Fallegasti vasi sem ég hef augum litið er Aalto vasinn í litnum Amethyst sem gefinn er út í ár í tilefni af 140 ára afmæli iittala. Fjólublái draumavasi – þennan verð ég að eignast!
Dekur fyrir húðina er eitthvað sem er orðið nauðsynlegt. Þetta svefnleysi undanfarna mánuði er farið að sjást vel á mér og því fær smá húðdekur að fylgja með á óskalistanum. Bioeffect andlitsmaskar sem ég hef bara heyrt gott af.
Gott ilmkerti og jafnvel nýtt tímarit væri draumur – Hing ilmstráin eru þau allra bestu sem ég hef prófað og ilmurinn Sítrónugras toppar allt og ég hef sjaldan verið jafn oft spurð af gestum hvaða heimilisilm við værum með. Næst á dagskrá er því að prófa ilmkertin þeirra líka. Fæst hjá Ramba –
Montana náttborð væri draumur í svefnherbergið – þau fást í allskyns spennandi litasamsetningum og að sjálfsögðu líka klassískum hvítum. Það er eitthvað við þessa mynd sem er alveg extra djúsí. Fæst í Epal.
Pappelina motturnar frá Kokku eru æðislegar – ég var að skoða nýju línuna en datt þá niður á þessa litríku úr eldri línu frá þeim. Ég þrái fleiri liti á heimilið mitt og þessi er frekar skemmtileg. Fæst í Kokku.
Núna er kominn tími á lokahnykkinn á herbergi heimasætunnar og gera það smá huggulegt. Leikföngin frá Liewood ásamt textílnum er einstaklega fallegt og í þægilegum litum, þessi staflanlegu hringir er eitthvað sem mín dama hefði gaman af því að leika með og er á sama tíma fallegt á hillu þegar leikurinn er búinn. Fæst hjá Dimm.
Svo er það síðast en ekki síst karfa drauma minna frá Korbo, það eru nokkur ár síðan ég gaf svona gyllta körfu í samstarfi við Kokku í gjafaleik hér á blogginu og hef verið með þær á heilanum síðan. Ótrúlega vandaðar og flottar og til í mörgum stærðum. Fæst í Kokku.
Þá er febrúar óskalistinn upptalinn – þangað til að fleira bætist við!
Fallega skandinavíska heimili sem veitir innblástur inní helgina –
Þessi litríka motta í stofunni heillar mig alla leið uppúr skónum og gæti ég vel hugsað mér að eiga eina slíka á mínu heimili. Ég vona annars að helgin verði ykkur ljúf!
The Darling er glæsilegt hönnunargistihús í hjarta sögulega miðbæjar Kaupmannahafnar.Ef þú elskar danska hönnun og danska samtímalist þá muntu elska The Darling.
Ég gæti vel hugsað mér að búa hérna en eldhúsið er alveg guðdómlega fallegt með listaverk á veggjum og klassíska danska hönnun í hverju horni. Það væri nú notalegt að taka sunnudagsbollan í þessu eldhúshorni ekki satt? Sjáið líka hvað það gerir mikið að hengja upp list í eldhúsið, algjör draumur.
Myndirnar eru fengnar að láni frá Instagramsíðu The Darling sem ég mæli með að kíkja á @thedarlingcph
Það lítur svo sannarlega út fyrir að það væri gaman að prófa að gista hér í kóngsins Köben!
Ein smartasta kona landsins – Marta María býr hér ásamt fjölskyldu sinni í Fossvoginum og þvílík veisla sem þetta heimili er fyrir augun. Hér má sjá fallega hönnun í bland við íslenska list og antík muni, speglaklæddir efri skáparnir í opnu eldhúsinu setja mikinn svip á heimilið ásamt litríkum stólum eftir Arne Jacobsen í bleikum og bláum litum sem mætti segja að séu einkennandi litir fyrir stílinn hennar Mörtu Maríu sem þykir eftirsóttur. Heimilið er dásamlega vel innréttað, með auga fyrir smáatriðum og á sama tíma persónulegt, bækur fá sín hér notið með áhugamálum þeirra hjúa, – myndir af börnunum og jafnvel skopmynd á veggnum ef vel er að gáð.
Opið eldhúsið er vel hannað með veglegum vinnuskáp með rennihurðum þó svo mér sýnist lítið um ólekkera hluti sem betra væri að loka inni í skápum.
Alvöru borðstofuborð með snúningsdisk sem kemur sér vel í matarboðum – en Marta María er mikill ástríðukokkur og hefur gefið út ansi ljúffenga matreiðslubók.
Speglaklæddir skápar eru frábær lausn þegar eldhúsið er opið inní stofuna og kemur einnig inn með smá glamúr.
Það má vel sjá að húsráðendur eru með ansi gott auga fyrir smáatriðum og list.
Áhugaverðar bækur, falleg hönnun og plöntur – hér er án efa gott að sitja í lok dags.
Gullfallegt heimili þar sem allt er svo vandað og lekkert. Myndirnar tók enginn annar en Gunnar Sverrisson af sinni einskæru snilld. Ég get skoðað þessar myndir aftur og aftur og alltaf fundið til eitthvað nýtt sem heillar. Er það nokkuð bara ég eða eruð þið líka spennt að sjá hvernig fjölskyldan mun koma sér fyrir á sínu næsta heimili? Eitthvað verður það! ♡
Wire hillurnar frá Montana eru klassísk hönnun eftir danska hönnuðinn Verner Panton frá árinu 1971. Panton Wire er hægt að setja saman á ólíka vegu og hentar ekki aðeins sem bókahilla heldur einnig sem náttborð, hliðarborð, skilrými og hægt að raða nokkrum saman sem sófaborð. Ég sé alltaf dálítið eftir því að hafa ekki keypt mér á sínum tíma gylltu útgáfuna sem kom í takmörkuðu upplagi sem náttborð – en hægt er einnig að bæta við toppum á hillurnar í ólíkum útgáfum eins og gleri, marmara og í lituðu MDF.
Klassísk dönsk hönnun eins og hún gerist best.
Fyrir áhugasama þá fæst Montana vörumerkið og Panton Wire hjá Epal. Ég gæti vel hugsað mér Panton Wire fyrir náttborð, en ég hef einmitt verið með augun opin fyrir rétta náttborðinu undanfarið.
Myndirnar tók Gunnar Sverrisson
