Trendnet

Haustvörulínan hjá H&M Home er notaleg með áherslu á textílvörur, keramík í jarðlitum og kertaljós. Blár áhersluliturinn tónar vel á móti mjúkum jarðlitunum sem fylgja alltaf haustinu. Það þarf alls ekki alltaf að kaupa nýtt en þó getur verið gaman að breyta örlítið til fyrir hverja nýja árstíð – fyrir haustið er tilvalið að bæta við kertaljósum, færa til lampa og bæta við púðum og notalegu teppi á sófann. Hafa það smá huggulegt.

Myndir: H&M home 

Fylgstu einnig með á Instagram @svana.svartahvitu

Danska hönnunarmerkið Ferm Living hefur hafið samstarf við nútímalistasafnið Louisiana og er afrakstur samstarfsins glæsilega Pico sófasettið í djörfu röndóttu áklæði. Louisiana safnið er svo sannarlega heimsóknarinnar virði ef þú átt leið til Kaupmannahafnar en safnið er staðsett rétt utan við borgina, nánar tiltekið í Humlebæk og er tilvalinn áfangastaður fyrir stutta dagsferð, til að fá sér einn kaffibolla og njóta þess að sjá framúrskarandi list, arkitektúr og svo er garðurinn ekki síðri en safnið.

Pico sófinn í röndóttu er geggjaður!

Myndir : Ferm Living 

Fylgstu einnig með á Instagram @svana.svartahvitu

Danska hönnunarmerkið HAY hefur nú sameinað krafta sína við íslenska samtímalistamanninn Loja Höskuldsson í tilefni þess að norræni listaviðburðurinn CHART art fair stendur yfir í Kaupmannahöfn um helgina.

Loji útbjó æðislegt útsaumað listaverk úr 10 metra löngum Mags sófa frá HAY og ber verkið heitið “The aftermath of a garden party”. Má þar meðal annars sjá  íslenskan Opal á sófaarminum ásamt dönskum klassíkum á borð við Faxe Konde og Gammel Dansk. Loji hefur vakið verðskuldaða athygli fyrir listaverk sín sem einkennast af hefðbundum útsaumi á nútímalegan hátt.

Einstakt íslenskt – danskt listaverk!

Hér er á ferð sjarmerandi sænsk íbúð þar sem allt alrýmið er málað í mildum og fallegum bláum lit sem fer vel við ljós húsgögnin. Flowerpot loftljós ásamt borðlampa skreytir heimilið ásamt svörtum klassískum Maurum sem setja sterkan svip á borðstofuna. Fallega hvíta stofuljósið heitir Prisma og er frá Watt & Veke (Dimm). Svefnherbergið er málað í mildum ljósgrænum lit sem fer virkilega vel við viðarrúmgaflinn og ljós. Frábært litaval á bæði bláa og græna litnum sem gerir heimilið auk þess meira persónulegt.

Myndir : Entrance fasteignasala

Himnasængur eru einstaklega notaleg viðbót í barnaherbergið og hægt er að nota hana við rúmið eða útbúa lítið leikhorn undir þar sem hægt er að koma sér vel fyrir með bók í hönd. Himnasængur skapa hlýju og duga einnig vel sem hljóðísogandi lausn sem á að auðvitað líka við um mottur á veggi og gólf, púða og annan textíl.

Ég tók saman nokkrar myndir sem sýna hugmyndir auk þess að benda á nokkrar uppáhalds verslanir sem selja himnasængur.

Þú finnur himnasængur t.d. hjá eftirfarandi verslunum, smelltu á hlekkina til að sjá úrvalið.

Epal

Nine Kids

Dimm

Petit

Eigið góða helgi kæru lesendur,

Fylgstu einnig með á Instagram @svana.svartahvitu

Eigendur danska hönnunarmerkisins Vipp sem er jafnframt eitt fremsta hönnunmerki dana, hafa komið sér vel fyrir á undanförnum árum á Manhattan þar sem þeim hefur tekist að sameina heimili sitt við sýningarrými og taka hér á móti mögulegum viðskiptavinum og áhugasömum um danska hönnun og list.

Heimilið sem staðsett er í Tribeca hverfinu er einstaklega glæsilegt og má hér sjá allt vöruúrval Vipp, allt frá eldhúsi, baðinnréttingum, húsgögnum og smávörum. Sofie og Frank Christensen Egelund eigendur Vipp hönnuðu Vipp sýningarrýmið með það í huga að hér myndu þau búa ásamt tveimur börnum sínum. Hér var áður staðsett gömul verksmiðja og tók parið sér heilt ár í að koma sér fyrir og endurhanna rýmið í þessu húsi sem byggt var árið 1883. Vipp eldhúsið er stjarnan á heimilinu og sjá má Vipp húsgögn í hverju horni. Vipp á rætur sínar að rekja til ársins 1939 þegar klassíska Vipp ruslafatan leit dagsins ljós en í dag má finna draumahúsgögn, innréttingar og smávörur frá þessum danska hönnunarrisa.

Hver væri annars ekki til í að búa hér? Kíkjum í heimsókn –

Myndir frá Vipp.com / Ljósmyndari : Adrian Gaut

Ég er búin að ætla að skrifa þessa margumbeðnu bloggfærslu mjög lengi skal ég segja ykkur. En veit oft varla hvernig ég eigi að byrja ♡ Í dag eru komnir um rúmir 4 mánuðir síðan ég (og Andrés) hættum að borða sykur. Ég hafði áður hætt að borða sykur og tókst vel til en byrjaði óvænt að borða aftur sykur á síðustu meðgöngu þegar ég fór að fá óstjórnlega löngun í nokkur sykruð matvæli – sem ég augljóslega stóðst ekki. Þegar dóttir mín var að nálgast eins árs afmælið og eftir marga mánuði af því að vakna allar nætur með grátandi barn var ég komin með bauga niður á hné og ákvað að núna yrði ég aftur að taka út sykur. Þetta er því ekki ákvörðun sem ég tók til að missa einhver kíló, alls ekki og mér leiðist í hreinskilni orðið slíkt tal. Ég tók þessa ákvörðun eingöngu til að ná aftur orku og að sjálfsögðu heilsunnar vegna, því við vitum flest að sykur er ekki góður fyrir neinn.

Þetta er svo auðvelt að þið trúið því varla. Fyrst og fremst þá þarf bara að hætta. Á mjög einfaldan hátt sé ég þetta svona: Sykur kallar á meiri sykur, sem veldur þreytu svo þú sækir enn aftur í sykur.

Lykilatriðið er að hafa þetta auðvelt og sem eðlilegast. Ég er alls ekki að hanga yfir einhverjum krúsídúllu uppskriftum með hráefnum sem enginn skilur hvað eru, borðandi bara heimagerðan mat og bakandi allt brauð sjálf. Alls alls ekki haha. Það hentar kannski einhverjum að fara á matarkúr og sumir sleppa öllu brauði og jafnvel ávöxtum. Ég persónulega vil ekki fara þá leið sem endar líklega bara á einn veg… því hver fer í gegnum lífið án þess að fá sér aftur nýbakað brauð með smjöri eða pizzu mmmmm,… nei ég bara spyr:)

Ég hef í gegnum tíðina verið voðalega holl inná milli og leyft mér um helgar þá bragðaref, snúð og álíka og svo mánudeginum eftir helgi átt erfitt með að “rétta mig af” því líkaminn sækir ennþá í sykruð matvæli og blóðsykurinn í ójafnvægi með tilheyrandi þreytu. Það hentar mér því langbest hef ég fundið út að borða einfaldlega það sem ég vil (án sykurs), þegar ég vil. En les á umbúðir og kaupi ekkert með viðbættum sykri í, þannig helst orkan jöfn allan daginn og ég finn ekki fyrir þreytu á daginn eins og gat komið fyrir áður, þá t.d. eftir máltíðir eins og margir kannast líklega við. Það einfaldlega gerist ekki þegar þú tekur sykurinn burt.

Það sem helst kemur á óvart er að það er viðbættur sykur í ótrúlega mörgum matvælum og tekur nokkur skipti í búðinni að lesa á bakvið allar flatkökur, sósur, múslí, jógúrt og slíkt til að finna út hvað á að kaupa. En útkoman er mjög skemmtileg vegferð sem verður auðveldari með hverjum deginum. Í rauninni er þetta bara erfitt í 3 daga. Þegar ég nefni að ég lesi á umbúðir þá á ég við að lesa þar sem talið er upp innihaldsefnin (hveiti, salt, krydd…) og á ég því ekki við næringarinnihaldslistann / orka, fita, kolvetni – þar sem mjólkur og ávaxtasykur er talinn með undir sykurtegundir.) Tek aftur fram að svona geri ég þetta – þið þurfið ekki að gera þetta eins;)

Lykilatriðið hjá mér var að eiga til sykurlaust súkkulaði og nýbakað súrdeigsbrauð fyrstu dagana (þau eru flest án sykurs). Það má vel vera að það flokkist ekki undir hollustu en þegar þú ert að ná sykrinum úr líkamanum og ert sælkeri eins og ég þá mæli ég með að eiga eitthvað gott til að narta í. Þessi færsla hljómar kannski ekki eins og það hollasta á plánetunni, en minn raunveruleiki var sá að ég var algjör sykurfíkill og því var eina leiðin fyrir mig að finna að það væri líka hægt að borða gott og sætt þó það væri sykurlaust. Svo jafnast það út því þörfin fyrir sætindi minnkar ósjálfrátt.

Ég myndi mæla með að byrja um helgi, eiga t.d. til gott brauð og gúrme álegg í hádeginu og jafnvel skella í pönnukökur (mínus sykur) með rjóma og sykurlausri sultu (ég kaupi þessar hreinu í háu krukkunum) eða sykurlausa súkkulaðiköku (uppskriftir hér). Ef þú drekkur ekki kaffi þá eru margir safar hreinir og án viðbætts sykurs, og ég mæli hvort sem er með að kaupa slíkt ef það eru börn á heimilinu því þau hafa ekkert að gera við safa með viðbættum sykri í (Svali, Capri sun og allt það.). Þá er betra að velja t.d. Floridana og the Berry Company sem eru án viðbætts sykurs og án efa margir aðrir kostir í boði.

Í sumar reyndi stundum á í grillveislum því það er sykur í flestum hamborgarabrauðum, pulsubrauðum, nánast öllum tilbúnum sósum og jafnvel í klassískum pulsum úff! En þið eruð líklega sloppin við mesta grilltímabilið haha! Auðvitað er auðveldast að grilla bara kjöt en það er ekki alltaf þemað og þá er lykilatriði að vera útsjónasamur:) Til eru t.d. kjúklingapulsur (sem eru auk þess með hærra % af kjöti og því hollari), hægt að vefja þeim í venjulegt brauð eða súrdeigsbrauð, nota tómatsósu með steviu, steiktan lauk og bernaise;) eða nota hugmyndaflugið einfaldlega! Varðandi hamborgarana þá eru svosem til sykurlaus brún ketóhamborgarabrauð í búðinni en ég hef einnig fundið mjúk hvít rúnstykki sem innihalda ekki sykur, gott að nota bara annan helminginn í einu og hlaða á nóg af grænmeti og ostum. Varðandi sósur þá eru heimagerðar alltaf bestar en við kaupum oft bernaise (mjög góð t.d. til í Nettó án sykurs).

Helsti munurinn sem ég hef fundið er meiri orka og það sama má segja um Andrés, hann hjólaði í kringum landið þegar við vorum nýlega búin að taka út sykur og fann hann mikinn mun á þoli og krafti – ég hef svosem engin slík afrek að monta mig af en hlakka til að bæta við meiri hreyfingu þegar dóttir okkar byrjar í daggæslu í haust. Ég vil alls alls ekki að þessi bloggfærsla snúist um kíló svo ég ætla ekki að fjalla um þann þátt hjá okkur hjúum en get einfaldlega lofað því að þér mun líða betur. Og að heimsins mestu sælkerar geta þetta ef ég get þetta ♡

Það sem ég á alltaf til á heimilinu (sem þýðir alls ekki að ég borði það alla daga), en þegar mig langar í eitthvað gott eða smá sætt. Það er sykurlausa Valor súkkulaðið, í dag á ég alltaf til m.a. Dark sem minnir mikið á Suðusúkkulaði frá Nóa og mjólkursúkkulaðið með möndlum. Ég fór í gegnum margar súkkulaðiplötur þegar ég tók fyrst út sykurinn fyrir 2 árum og svo líka núna í sumar og valdi alltaf Valor því það er minnsta gervisætubragðið af því, einfaldlega virkilega gott súkkulaði og hjálpaði mér mikið. Í dag er ég í samstarfi við Valor – en var það ekki í upphafi þegar ég smakkaði alla sykurlausu deildina og féll fyrir þessu vörumerki og keypti í tugatali haha. Valor fæst í flestum verslunum, en öll vörulínan er t.d. í Fjarðakaup og Bónus, og í Krónunni eru nokkrar tegundir (mættu þó bæta úrvalið;). Ég kaupi líka oft döðlur sem eru æðislegar frystar með hnetu/möndlusmjöri og einnig til tilbúnar í búð með lakkrísdufti t.d. Mmmm.

Ég borða oft m.a. hafragraut (spari með rjóma, chia, hampfræum og döðlusýrópi), og stundum morgunkorn (til frá Bear í t.d. Nettó og Fjarðarkaup sem er eina morgunkornið sem ég hef fundið sem er sykurlaust), ávexti, egg, avakadó, flatkökur með góðu áleggi, eða ristað heimilisbrauð (þetta klassíska), stundum boozt með allskyns gúrmi í og með hreinu skyri eða grískri jógúrt, gríska jógúrt með hnetusmjöri + rúsínum + múslí + döðlusýrópi mmm. Allt kjöt og allan fisk (margir tilbúnir réttir þó með sykri í). Hakk, spagettí og hvítlauksbrauð (grófkorna eru oft án sykurs í frystinum). Ef það er grjónagrautur á óskalistanum hjá syni mínum þá fæ ég mér með honum en nota hreinan kanil og jafnvel smá döðlusýróp ofan á fyrir sætuna. Ef ég kaupi tilbúið salat þá sleppi ég sósunni (nánast allar sykraðar) og bið um ólívuolíu í staðinn. Um helgar og oftar… þá eigum við alltaf til súrdeigsbrauð, eða stundum rúnstykki úr bakarí (þau eru sum án sykurs það þarf bara að spurja). Eins og þið sjáið þá er hægt að borða allan venjulegan mat eins og áður, bara mínus sykurinn.

Á meðan ég skrifaði þessa færslu þá lagði ég þetta undir Andrés hvað honum þætti erfiðast við að vera sykurlaus, svarið var að honum þykir þetta mjög auðvelt og hefur gaman af því að lesa á bakvið umbúðir og læra alltaf eitthvað nýtt. Einu skiptin sem væru erfið eru í matarboðum og afmælum ef ekkert sykurlaust er í boði (gerist mjög sjaldan) á meðan aðrir gestir borða kökur eða annan eftirrétt. Að þá væri mikilvægt að vera búin að undirbúa sig, jafnvel bjóðast til að koma með eitthvað á borðið og mætti það vera t.d. döðlukakan góða, ostabakki (nokkrar kextegundir til án sykurs þarf að rifja upp tegundina), bananar til að grilla með smá súkkulaði og rjóma (líka til sykurlaus ís í boxi og á pinna (með ljóni framan á), eða jafnvel snakk og dýfu því þrátt fyrir að vera alls ekki hollt þá eru margar snakktegundir án sykurs – sem eru gleðifréttir fyrir minn mann haha.

Hér má sjá nokkrar sykurlausar uppskriftir sem ég hef verið að prófa mig áfram með en ég elska að geta bakað eitthvað gott um helgar eða fyrir skemmtileg tilefni. Kíktu endilega á flokkinn “Matur og bakstur” sem ég ætla að reyna að bæta við sem fyrst fleiri sykurlausu gúrmi.

Þið getið fundið ótal greinar á vefnum um það að verða sykurlaus, en mér hefur þótt þær allar ganga útfrá því að það sé bara ekkert mál að fara úr því að vera sælkeri yfir í einhvern sem vill narta í sellerí með hummus á kvöldin og baka hveitilaust brauð úr allskyns dúlleríi – smá ýkjur kannski:) Þannig er þó ekki raunveruleiki allra, og þau okkar sem erum sykursæt í gegn þurfum að sjá að það er líka hægt að borða allt þetta góða, það þarf bara að fara smá krókaleiðir að því stundum. Eins og t.d. þegar við Andrés föttuðum eitt föstudagskvöld að við gætum pantað pizzu með sykurlausum (laufléttum) botni, sleppt sósunni (sykur í henni á flestum pizzastöðum) og sett á hvítlauksolíu í staðinn mmmm.. það kalla ég sko life hack haha ♡

Ég gæti þó skrifað enn lengri færslu um þetta og mun án efa koma aftur inná þetta sykurleysi með fleiri tipsum og trixum sem ég læri á leiðinni og deili kannski helstu matvælunum sem ég á alltaf til. Rauði þráðurinn í þessu öllu er sá að ef þú leyfir þér þessar kræsingar sem ég nefni þá vaknar þú ekki daginn eftir ennþá með löngun í enn meira sætt því það er enginn sykur til staðar sem kveikir í þeirri “fíkn”. En ég tek aftur fram að þetta er sú leið sem ég kýs, og þó þú hafir aðrar skoðanir á hvernig eigi að borða eða hafir lesið eitthvað um að hveiti breytist í sykur eða um ávaxtasykur og neyslu á honum þá er það bara líka frábært og ég segi bara GANGI ÞÉR VEL ♡

Endilega skildu eftir athugasemd ef þú ert með einhverjar spurningar eða fleiri tips eða trix varðandi sykurleysi! Þú getur einnig fylgst með mér á Instagram @svana.svartahvitu

Allt sem er blátt blátt…

Fagurgrænblá og pastellituð gömul eldhúsinnréttingin á heimilinu er sjarmerandi og setur sterkan svip á heimilið og fer liturinn vel við dökkbláan litinn sem prýðir stofuna. Yfir 30 veggspjöld skreyta veggina sem eru ansi líflegir og má þar sjá gott bland af teikningum, ljósmyndum og öðrum listaverkum. Persónulegur og flottur stíll hér á ferð…

Myndir // Alvhem fasteignasala / Kungalvsgatan

Fylgstu einnig með á Instagram @svana.svartahvitu

Regnbogi í barnaherbergið er tilvalin hugmynd fyrir næsta DIY verkefni og það þarfnast ekki mikilla teiknihæfileika við verkið. Myndin hér að neðan er vissulega af vegglímmiða frá Studio Loco, sem fæst m.a. hjá Smallable en undanfarin ár hafa regnbogar í allskyns ólíkum formum notið mikilla vinsælda sem sést t.d. í vinsælum staflanlegum tré regnbogum sem finna má í flestum barnaherbergjum í dag ásamt regnboga óróum. Algjört æði ef þú spyrð mig!

Hægt er að mála regnboga í öllum stærðum á veggina og hægt að leika sér endalaust með litasamsetningar, láttu hugmyndaflugið ráða för eða leyfðu jafnvel litlum aðstoðarmönnum að hjálpa til.

Mynd // A Beautiful Mess

– Smelltu hér til að sjá frekari leiðbeiningar hvernig regnboginn hér að ofan var gerður – 

Regnbogar geta verið í öllum litum og einnig hægt að hafa litaþema, allt í bleikum pasteltónum eða jafnvel grænum og bláum pasteltónum fyrir strákaherbergi?

Ef allt klikkar þá er einfaldlega hægt að mála stóra sól yfir listaverkið haha – elska samt þessa mynd hér að ofan ♡ Ég gæti vel hugsað mér að leika mér smá með pensilinn í herbergi dóttur minnar en to do listinn er að verða ansi langur af verkefnum sem mig langar að spreyta mig á – regnbogi hefur nú bæst við ♡

Fylgstu einnig með á Instagram @svana.svartahvitu